Bara tímaspursmál hvenær ritstjórinn yrði látinn fara

Fyrir mér var það bara tímaspursmál hvenær Ólafur Þ. Stephensen ritstjóri Morgunblaðsins yrði látinn fara. Frá því þessum kjarna í Landsambandi íslenskra útvegsmanna, LÍÚ, var leyft að kaupa Morgunblaðið fyrr á þessu ári þá var það bara tímaspursmál hvenær Evrópusinninn á stóli ritstjóra blaðsins yrði látinn fara.

Til hvers eru Íslenskir útvegsmenn að kaupa Morgunblaðið? Af hverju eru þessir fiskimenn að halda úti blaði sem þeir reka með tapi?

Af hverju ákveða Íslenskir útvegmenn að kaupa Morgunblaðið þegar til valda kemst ríkisstjórn sem hefur það á stefnuskrá sinni að sækja um aðild að Evrópusambandinu, ESB?

Af hverju er ritstjóri Morgunblaðsins látinn fara nú þegar Alþingi er nýbúið er að ákveða að hefja aðildarviðræður við ESB?

Það er ljóst að Íslenskir útvegsmenn munu kosta öllu til í baráttu sinni við að halda þjóðinni utan ESB.

Morgunblaðið verður bara eitt af þeim mörgu vopnum sem þeir munu beita á næstunni í þeirri baráttu sinni að verja sína eigin hagsmuni.

Það eina sem er vitað um þann sem sest í stól ritstjóra Morgunblaðsins er að það verður yfirlýstur andstæðingur aðildar Íslands að ESB.

 

Ólafur kvaddi starfsmenn Morgunblaðsins

Hernaðaraðgerð Breta gegn Íslandi heldur áfram

Tilgangur Breta með beitingu hryðjuverkalaga gegn Íslandi var að valda hér eins miklu tjóni og hægt var. Kaupþing hefði aldrei fallið ef ekki hefðu komið til þessi hryðjuverkalög. Það fjárhagslega tjón sem þessi hernaðaraðgerð Bretana gegn okkur Íslendingum hefur valdið samsvarar því að þeir hefðu lagt stóran hluta Reykjavíkur í rúst með loftárásum.

Nýjast útspil þeirra afhjúpar hvert langtíma markmiðið með þessum hernaðaraðgerðum er. Langtímamarkmiðið er að lama allt Íslensk efnahagslíf næsta aldarfjórðunginn og tryggja að í lok þess tímabils verði allt samfélagið komið efnahagslega aftur til ársins 1970. Þannig ætla þeir að og koma í veg fyrir frekari "innrás" Íslendinga og Íslenskra fyrirtækja inn í breskt athafna- og fjármálalíf næsta mannsaldurinn. 

Ánægjulegt er að Íslenskir stjórnmálamenn gerðu lítið með leynimakk þeirra og pukur þegar Bretar og Hollendingar heimtuðu að fá að semja um framhald Icesave fyrir luktum dyrum.

Það var hámark ósvífninnar þegar Bretar og Hollendingar kröfðust þess af Íslenskum ráðamönnum að almenningur yrði ekki upplýstur um það gagntilboð sem þeir lögðu fram. Frekju þessara manna eru engin takmök sett. Þessir menn hafa engan rétt og eiga ekkert með að koma hér og leggja fram gagntilboð sem gerir að engu fyrirvarana sem Alþingi setti við ríkisábyrgðina á Icesave og ætlast til þess að Íslenskir ráðamenn þegi um málið gagnvart þjóð sinni. Þingmenn, látið ekki bjóða ykkur þetta.

Segið við Bretana: Við tökum ekki þátt í frekari samningum við ykkur um þetta mál nema allt sé upp á borðum. Tilboð sem þið viljið ekki að komi fyrir augu almennings, slík tilboð skulið þið ekki leggja fram.

Þetta er ótrúlegt, þessir menn vinna eins og þjófar á nóttu. 

Alþingi og þjóðin öll eyddi öllu sumrinu í að ræða Icesave og niðurstaðan var ríkisábyrgð á þessum innistæðureikningum þar sem þjóðin teygir sig eins langt og nokkur kostur er, og að flestra mati allt of langt, til að koma til móts við kröfur Breta og Hollendinga.

Auðvita finnst Bretum og Hollendingum þetta ekki nóg enda tilgangurinn ekki að fá þetta fé til baka heldur að "kenna" Íslendingum lexíu og hefna ófaranna á eigin heimamarkaði.

Þeir hafa ekki treyst sér til að hegna okkur með því að senda hingað sprengiþotur og varpa sprengjum á Reykjavík þó einhverjir þessara "snillinga" í þjónustu hennar hátignar hafi ábyggilega stungið upp á því á einhverjum tímapunkti þegar ljóst var að 20% af öllu sparifé þegna breska heimsveldisins var geymt á reikningum í Íslenskum bönkum, bönkum sem voru komnir í gjaldþrot.

Þeir hafa ábyggilega margir svitnað þá, Bretarnir sem áttu að gæta hagsmuna breskra sparifjáreigenda, þegar þeir áttuðu sig á þessu en höfðu sofið á á verðinum eins og íslenskir starfsbræður þeirra. Nú á að sækja þetta fé með góðu eða illu en aðallega samt að hefna þessara ófara.

Í stað flughersins var efnahagherdeildin kölluð í Dawningstræti 10. Við höfum verið að njóta "ávaxtanna" af þeim vopnum og þeim aðferðum sem sú herdeild hefur yfir að ráða í vopnabúri sínu.

Þessir hermenn hennar hátignar eru mættir hér með saltið og plógana. Nú á að plægja yfir Íslensk efnahagslíf og strá salti í plógförin. Nú að að tryggja að Íslendingar rísi ekki aftur upp næstu 100 árin.

Ég skil ekki af hverju ekki er búið loka sendiráði okkar í Bretlandi, selja eignirnar og kalla sendiherrann heim.

Ég skil ekki af hverju ekki er búið að reka breska sendiherrann, sem er enginn venjulegur sendiherra, þetta er einn af æðstu embættismönnum bresku utanríkisþjónustunnar, yfirmaður annarra sendiherrana í bresku utanríkisþjónustunni, með allt hans lið úr landi.

Hann og hans menn eru hér til að ráðleggja hvaða aðgerðum þarf að beita til að valda Íslensku þjóðinni sem mestu efnahagslegu tjóni og ná fram þeim áhrifum sem hernaðaraðgerðum þeirra er ætlað að skila í því hefndarstríði sem Bretar og Hollendingar eru í gagnvart okkur.

Mynd: Kerlingarfjöll

 

 

Icesave í utanríkismálanefnd

Hét góðri uppskeru fyrir kynlíf

Ætli Íslendingur standi líka á bak við þetta svindl? Það er viðbúið að reynt verið að klína þessu á okkur.

Eða er það bara þegar kemur að fjármálum og einhver hefur verið hlunnfarinn að þar leynist Íslendingur á bak við?

Það þótti svo sem ekkert tiltökumál hér á árum áður að menn færu í víking, hvort sem þeir voru frá Grundarfirði, Svarfaðardal eða Rauðasandi.

Þessir forfeður okkar, þeir rændu og nauðguðu.

Það er rétt, menn voru ekki að eiða tíma sínum í að narra fólk til einhverra kynlífsathafna.

Nei, líklega er enginn Íslendingur á bak við þetta mál.

 

Hét góðri uppskeru fyrir kynlíf

Eitt núll fyrir íslensku Thatcheristunum í orkumálum

Eflaust hefur víða verði skálaði í kampavíni í gær þegar íslenskir Thatcheristar fögnuðu fyrsta sigri sínum í átökunum um eignarhaldið á orkuauðlindunum.

Allir þeir sem fylgst hafa með þessum málum vita að þessi barátta þeirra að koma orkuauðlindunum úr sameiginlegri eign þjóðarinnar er búin að standa lengi.

En þetta eru hugsjóna menn og í þessari baráttu þeirra hefur það hjálpað að verðið sem fæst fyrir auðlindina er algjört auka atriði í þeirra huga, það er prinsippið sem skiptir öllu máli, að einkaaðili fái að njóta arðsins af nýtingu auðlindarinnar, ekki almenningur eða samfélagið.

Það sjá það allir að það er ómögulegt að svona orkuveitur sem hafa einokun á sínu svæði og geta þar með haldið orkuverði í lámarki almenningi til hagsbóta séu í eigu almennings. Það er álíka mikið rugl og að gamlir barnaskólar standi skuldlausir í eigu sveitarfélaga "engum til ánægju". Auðvita á að selja alla barnaskóla landsins fjárfestum svo einhverjir geti hagnast á að eiga þá.

Með þessa stefnu fyrir Stafni auglýsti ríkisstjórn Geirs Haarde hlut ríkisins í Hitaveitu Suðurnesja til sölu og bannaði jafnframt að opinberir aðilar mættu kaupa.

Nú er málið loks í höfn, búið að tryggja að allur arður af nýtingu orkuauðlinda þeirra Suðurnesjamanna munu renna heill og óskiptur næstu 65 til 130 árin í hendur erlendra fjárfesta.

Jafnframt er þessum erlendu fjárfestum tryggð einokun á sölu á öllu rafmagni og heitu vatni á Suðurnesjunum næstu tvo mannsaldrana eða svo. Með því er þeim veittur frír og frjáls aðgangur að tína það sem þeim þóknast upp úr vösum þeirra Suðurnesjamanna fyrir rafmagn og hita.

Innrás íslenskra Thatcherista inn í orkugeirann er hafin og búið er að blása til nýrrar sóknar í kjördæmi fjármálaráðherra. Nú á að beygja allt sem hægt er að beygja og í framhaldi mun Landsvirkjun falla.

Eftir mun þjóðin sitja arðrænd þar sem allur arður af nýtingu náttúruauðlinda landsins mun renna til útlanda næstu mannsaldrana.

Þegar engar tekjur koma lengur inn af nýtingu auðlindanna og orkuverð hefur hækkað hér 5 til 10 fallt hver verður þá staða okkar Íslendinga?

Sú sama og staða fátækra sveitarfélaga hér suður með sjó sem eru nú að reyna að greiða leiguna fyrir að fá að nota barnaskólana sína, skóla sem þau áttu skuldlausa hér fyrir nokkrum árum?

Mynd: Kerlingafjöll

Stærsti álframleiðandi Kína spáir í Þeistareyki

Auðvita á að selja mjólkurkýrnar.

Auðvita á að selja mjólkurkýrnar. Menn hafa alltaf grætt á því, það vita allir. Þá fær maður líka svo mikinn pening úr að moða meðan maður er sjálfur við stjórnvölin. Þetta hljóta allir að skilja.

Það er svo bara annarra að hafa áhyggjur af því sem gerist þegar þarf að fara á næsta bæ á komandi árum og áratugum til að kaupa mjólk handa börnunum. "Den tid den sorg" eins og Danirnir segja.

Er ekki bara um að gera á meðan gengið er svona hagstætt erlendum fjárfestum að reyna að selja þeim enn meira af þessum mjólkurkúm okkar?

Er ekki einmitt tækifærið nú að reyna að koma hinum orkufyrirtækjunum og fiskveiðiauðlindinni í hendurnar á útlendingum þegar þeir sjá hér kauptækifæri þegar krónan hefur lækkað um 50% til 60% gagnvart evru og dollar?

Ætli það sé ekki líka möguleiki að selja Gvendarbrunnana og aðrar vatnsveitur sveitarfélaganna? Gæfi það ekki líka pening?

Við getum þá lifað hér fínu lífi út þetta kjörtímabil og það er ekki svo langt eftir hvort sem er, rétt rúmt hálft ár í næstu sveitarstjórnarkosningar. Menn hljóta að skilja það að borgin verður að hafa einhverja peninga úr að moða nú fyrir kosningar. Það verður að sýna lit í borginni fyrir kosningar í vor, slá og mála gangstéttar við kjörstaði og svona.

Ég meina, það er ekki okkar vandamál hér í borginni þó orkureikningar þeirra Suðurnesjamanna komi til með að hækka um heil ósköp á næstu árum þegar einkaaðili verður komin með einokun á sölu á öllu rafmagni og hita á svæðinu, er það?

Ég meina, þeir voru fyrstir til að selja sinn hlut fyrir slikk til einkaaðila. Af hverju mega Reykvíkingar ekki gera það líka?

Hvað með næstu kynslóð, spyr kannski einhver, sem verður þá hér eignarlaus þjóð án auðlinda í eigin landi ofurseld einokun þeirra erlendu manna sem sitja á orkuauðlindunum, neysluvatninu og fiskimiðunum?

Ég spyr þá bara á móti fyrir hönd okkar Íslenskra Thatcherista, er það ekki bara þeirra vandamál?

Hvernig er það annars, eru ekki einhverjar altaristöflur og kirkjugripir til í kirkjunum hér í Reykjavík sem væri líka hægt að koma í verð?

Já, það stefnir allt í stórsigur okkar Sjálfstæðismanna í borgarstjórnarkosningunum nú í vor, enda framsýni, almannaheill og gamla kjörorðið "Íslandi allt" verði okkar leiðarljós þetta kjörtímabil.

Borgarbúar munu án efa verða flokknum gjöfulir á atkvæðin sín og verðlauna okkur í samræmi við verkin okkar. Borgarbúar sjá öruggleg líka til þess að Framsóknarmenn í borginni njóti þess sem þeir hafa sáð til.

Með öðrum orðum, ég er æfur yfir því að við erum að selja orkuauðlindirnar úr landi.

Hvað erum við án auðlindanna?

Mynd: Dómadalsvatn

 

Endurskoðendur í svaðið?

Af hverju er Viðskiptanefnd ekki kölluðu úr sumarfríi til að ræða vanda heimilana?

Auðmenn Íslands eiga og áttu mikla fjármuni í Íslensku bönkunum í Lúxemborg. Nú þegar upp kemur kvittur um að hugsanlega megi finna að vinnubrögðum skilanefndar Landsbankans vegna útibúsins í Lúx, þá er "eðlilegt" að þeir sem telja sér málið skylt hlaupi upp til handa og fóta og heimti að nefndarmenn í Viðskiptanefnd Alþingis verði kallaðir til starfa í miðju sumarfríi til að ræða þetta mál því "hugsanlega" gæti verið fótur fyrir þessum kvitti.

 

Þessir bankar og starfsmenn þeirra í Lúxemborg aðstoðuðu þá Íslendinga sem það vildu og áttu að minnsta kosti 100 milljónir króna við að koma hluta eða öllu þeirra fé úr landi og geyma það undir bankaleynd og í skattaskjóli í Lúxemborg.

Gekk þessi þjónusta undir heitinu "Einkabankaþjónusta" því þessir bankar tóku í framhaldi að sér að ávaxta þetta fé á mjög háum vöxtum. Hæstu vextir sem hægt var að fá í Evrópu voru á Íslandi í seðlabankatíð Davíðs Oddssonar. Samkvæmt mínum heimildum kom þetta fé því mikið til aftur heim til Íslands og er kjarninn í þessum svokölluðu Jöklabréfum.

Þegar bankamenn tala um að á bak við Jöklabréfin hafi verið "Austurrískir tannlæknar" sem hafi verið að leita sér að hárri ávöxtun þá er átt við "Íslenska auðmenn".

Eðlilega má ekkert til spara og einskis má láta ófreistað þegar slíkir hagsmunir eru annars vegar. Eða eins og þingmaðurinn sem biður um þennan neyðarfundi í Viðskiptanefnd Alþingis orðaði það:

,,Það er nauðsynlegt að fá allar upplýsingar um hvernig eigi að vernda þá hagsmuni sem þarna eru undir," segir Guðlaugur Þór

Á sama tíma titrar allt Íslenska samfélagið.

Mörg þeirra lána sem hafa verið fryst, þeirri frystingu líkur 1. október næstkomandi. Bæði á það við um erlend bílalán og íbúðalán. Eins fellur þá úr gildi það tímabundna bann sem sett var á nauðungaruppboð.

Nú er sláturtíðin að hefjast. Og ekki bara hjá bændum landsins. Það er líka að hefjast sláturtíð í bönkunum landsins og hjá sýslumönnum.

Alþingi var slitið eftir sumarþing í lok ágúst án þess að nokkuð væri tekið á málum þessara fjölskyldna sem verst eru settar. Gálgafresturinn sem mörgum var gefinn rennur út 1. okt. Ljóst er að sá frestur verður látinn renna út með þingið allt í sumarfríi og fyrir liggur að margar fjölskyldur fara þá beint undir hamarinn.

En það er gott að vita til þess að það eru þó hér menn sem standa vörð um það sem mestu máli skiptir í þessu samfélagi og krefjast þess að Viðskiptanefnd þingsins verði kölluð saman úr sumarfríi á þessum ögurtímum til að ræða það hvort standa hefði mátt öðruvísi að uppgjöri á bankaútibúi niðri í Evrópu.

Og þessar fjölskyldur sem eru að fara undir hamarinn, "Who fucking cares?"

Varla hvarflar það að nokkrum manni að ætlast til þess að Viðskiptanefnd Alþingis verið kölluð saman í miðju sumarfríi til að ræða málefni þessara fjölskyldna?

 

Vill fund um Landsbanka

Versta leiðin valin að fara með Alþjóða gjaldeyrissjóðnum?

Fréttir bárust af því að Rússar vildu lána hingað mikið fjármagn, 5 milljarða dali, síðasta haust. Það tilboð staðfesti Sendiherra Rússlands í viðtali við Netvarpið.is fyrir skömmu. "Þið völduð Alþjóða gjaldeyrissjóðinn" sagði hann svo.

Nú berast af því fréttir að hópur Japan hafi viljað koma hingað inn með einn milljarð dala, 126 milljarða króna.

Eins eru sögusagnir í gangi um að Bandaríkjamenn hafi boðið stórt lán síðasta haust.

Allt er þetta fé sem þarna var verið að bjóða hugsað til uppbyggingar og atvinnusköpunar.

Öllu þessu hafa Íslensk stjórnvöld hafnað og valið leið Alþjóða gjaldeyrissjóðsins, AGS, sem vill að við tökum lán upp á 4,6 milljarða dala, um 700 milljarða króna, til þess eins að láta það liggja inni á bankabók í USA sem gjaldeyrisforða og borga af því vexti. Þetta fé eigi ekki að nota til neins annars en láta það liggja þarna.

Fram til ársins 2000 var gjaldeyrisforði okkar 7 milljarðar króna og hafði verið svo um áratuga skeið. Jú, jú sjálfsagt var eðlilegt að hafa hann eitthvað meiri þegar bankarnir voru orðnir tíu sinnum stærri en umsvif þjóðarbúsins. En nú eru þetta aftur orðnir litlir bankar með enga starfsemi erlendis. Til hvers þarf þá nú að 100 falda stærðina á gjaldeyrisforðanum frá því það sem hann var árið 2000? Auðvita er þetta algjört yfirskot.

Í mínum huga er það óskiljanlegt að við skulum vera að taka þetta lán. Verst af öllu er að aðalhagfræðingur Seðlabankans í aðdraganda hrunsins er nú orðinn Seðlabankastjóri og allir gömlu starfsfélagarnir hans sitja enn þarna í bankanum. Hvað haldið þið á að það taki Seðlabankann langan tíma að sóa þessum 700 milljörðum?

Einn dag?

Eina viku?

Einn mánuð?

Eitt ár?

Ég fer ekki ofar. Það er því miður mín spá þetta fé verður allt horfið á innan við 12 mánuðum. Við sitjum þá áfram uppi með ónýtan gjaldmiðil og búin að skuldsetja þjóðina um hálfa landsframleiðslu til viðbótar við allt hitt sukkið.

Til að kóróna allt þá þurftum við að samþykkja Icesave nauðasamninginn til að fá þetta lán.

Af hverju í ósköpunum völdu menn AGS í stað þess að fara með Rússunum eða Japönunum? Þá hefðum við fengið fé inn í landið til að fara í uppbyggingu. Þá værum við ekki að fara þennan stíg niðurrifs, samdráttar, okurvaxta og gjaldeyrishafta sem virðist vera ær og kýr AGS.

Og takið eftir, ekkert fé er að koma frá AGS til að byggja hér upp eitt eða neitt.

Hefðu ekki allar leiðir verið skárri en þessi leið sem verið er að feta í dag með AGS?

Er AGS og þær þjóðir sem stjórna AGS, þjóðirnar sem eiga bankana sem eru sem að tapa mest á Íslensk bankahruninu, ekki að leiða okkur beint í gríðarlega skuldsetningu þannig að við eigum okkur ekki viðreisnar von næstu áratugina?

Er tilgangurinn ekki sá eini að skuldsetja okkur svo gríðarlega að hægt verði að féfletta okkur og hirða af okkur auðlindirnar og allt það sem fémætt kann að finnast hér?

Rekum AGS úr landi og hættum við að taka þetta lán frá þeim!

Mynd: Kerlingafjöll

 

Vilja fjárfesta fyrir milljarð dala

Ánægjuleg þróun í menntamálum.

Það er ánægjulegt að sjá það staðfest hvað við Íslendingar erum að standa okkur vel í fjárframlögum til menntamála. Eins verð ég að lýsa yfir sérstakri ánægju minni með skólana okkar og stjórnvöld að það skuli hafa tekist að koma öllum þeim mikla fjölda sem sótti um skóavist í haust í nám.

Eins og atvinnuástandið er þá hefði það bara verið hræðilegt ef ekki hefði verið hægt að koma því unga fólki sem sótti um skólavist í nám. Þeirra hefði ekkert beðið nema atvinnuleysi.

Þar fyrir utan vantar okkur meira af menntuðu fólki inn í atvinnulífið. Fjöldi ófaglærðra á Íslandi er of hár, það eru of fáir doktorar o.s.frv., ef við miðum okkur við nágranalöndin.

Þetta er það svið, menntamálin, sem við eigum með kjafti og klóm að standa vörð um í kreppunni.

Hitt er annað mál að án ef má spara stórfé með skipulagsbreytingum og samruna skóla. Í Kaupmannahöfn er til dæmis bara einn Háskóli sem kennir verkfræði.

Af hverju erum við með tvo Háskóla hér í Reykjavík , sitt hvoru megin við Vatnsmýrina, að kenna verkfræði?

Ég held að allt of mikið af fé fari í að borga rektorum og ýmis konar skrifstofufólki laun og halda úti allskonar starfsemi sem sjálfstæður Háskóli þarf að halda úti, heimasíðum o.s.frv , o.s.frv. sem hægt er að spara ef þessir skólar eru sameinaðir.

Fyrir utan svo gæði kennslunnar. Hver fylgist með gæðum kennslunnar í öllum þessum litlu Háskólum út um allt? Það eru margir sem halda því fram að þessir Háskólar séu einfalt framhald Menntaskólanna á viðkomandi stað og kennslan þar eigi ekkert skylt við eiginlega Háskólakennslu eins og hún þekkist í Evrópu.

Mynd: Skriðuklaustur

 

Ísland ver hlutfallslega mestu til menntamála

Umhverfisvænar veiðar framtíðin.

Ég er ekki sammála framkvæmdastjóra LÍÚ þegar hann gagnrýnir auknar línuveiðar á kostnað togveiða. Í mínum huga ætti að vera búið að takmarka mjög ef ekki banna alveg togveiðar. Veiðar með snurvoð átti aldrei að leyfa að yrðu hafnar á ný hér á Íslandsmiðum.

Ég hefði vilja sjá okkur Íslendinga taka upp vistvænar veiðiaðferðir að fyrirmynd Normanna og Rússa og bannaðar verði veiðar með botntroll og snurvoð. Hættum að slétta hafsbotninn umhverfis landið og breyta með því vistkerfinu og þar með lífsskilyrðum nytjastofnanna. 

Markmið Normanna og Rússa er meðal annars að vernda kóralinn og svæðin þar í kring. Gríðarlegt lífríki er í kring um þennan kóral, þar eru miklar uppeldisstöðvar. Mikill kórall er allt í kringum Ísland og þennan kóral er verið að brjóta daglega niður á miðunum um allt land. Við það eyðileggjast lífsskilyrðin og fiskgengd minnkar.

Áratuga rannsóknir liggja fyrir hjá Normönnum og Rússum á skaðsemi þessara veiðarfæra. Veiðar með botntroll eru bara leyfðar á ákveðnum svæðum þar sem botninn er sléttur og mat fiskifræðinga að þar sé ekki verið að eyðileggja neitt með því að nota þessi veiðarfæri. Eins til veiða á rækju og skel.

Við ættum að taka áratug eða svo í slíka aðlögun og færa aflaheimildir yfir á neta–, línu- og krókabáta. Íslenskir bátasmiðir eru að búa til slíka báta hér heima. Við eigum í framhaldi að geta átak í því að setja í þessa báta þessar nýju metanvélar sem m.a. eru komnar í fullt af bílum. 

Þá getum við sótt þennan afla á bátum sem við smíðum sjálf og notað til þess orku sem við framleiðum sjálf.

Þessir bátar skipa öllum sínum afla á land í sjávarplássunum kring um landið. Aukin hlutur dagróðrarbáta mun veita á ný súrefni inn í þessa bæi. Landsbyggðin mun þá ganga í endurnýjun lífdaga sinna.

Þegar allar aflaheimildir eru að mestu komnar á hendur dagróðrabáta og aflanum öllum þar með landað á Íslandi þá erum við um leið búin að tryggja dreifða eignaraðild á auðlindinni og að nýting hennar verður um ókomin ár í höndum aðila sem lifa og búa í sjávarplássunum á Íslandi.

Mynd: Sér yfir Vopnafjörð.

„Sérkennileg aðferðafræði“

Fjárhagstjón vegna Hryðjuverkalaganna sambærilegt og ef Reykjavík hefði verið jöfnuð við jörðu?

Hernaðarárásin á Ísland. 

Það fjárhagslega tjón sem ríkisstjórn Gordon Brown hefur valdið hér á landi með því að setja Hryðjuverkalög á Íslenska ríkið og frysta allar eigur allra Íslenskra banka í Bretlandi, þar með talið gull- og gjaldeyrisforða Seðlabanka Íslands hefur valdið þjóðinni gríðarlegu tjóni.

Vissulega settum við Íslendingar mjög hæpin lög sem eru og voru Neyðarlögin en þurftu Bretar að gera okkur gjaldþrota vegna þeirra?

Áttum okkur á því að Bretar vissu nákvæmlega hvað þeir voru að gera þegar þeir settu á okkur hryðjuverkalögin og frystu meira að segja eignir Seðlabanka Íslands í Bretlandi.

Þeir vissi nákvæmlega að með því að fyrsta eigur þriggja stærstu banka Íslands og Seðlabankans voru þeir að setja þessa banka í gjaldþrot og um leið lama efnahagslíf landsins og vinna þar með eitt mesta efnahagslega hryðjuverka á einni þjóð sem sést hefur í Evrópu frá lokum seinni heimstyrjaldarinnar.

Þeir vissu nákvæmlega hvað afleiðingar það myndi hafa að setja hryðjuverkalögin á okkur.

Í framhaldi féllu allir Íslensku bankarnir, krónan féll um 50% sem þýddi að allar erlendar skuldir hækkuðu um 100%. Um 70% af öllum skuldum fyrirtækja í landinu voru í erlendum gjaldeyri þegar þetta gerðist og urðu mörg þeirra þá þegar tæknilega gjaldþrota. 

Ríki, sveitarfélög og orkufyrirtækin okkar sem tekið hafa háar fjárhæðir að láni í erlendum gjaldeyrir eru líka mjög illa stödd þegar skuldirnar og afborganir af þeim hafa tvöfaldast.

Að ekki sé minnst á almenning og erlendu lánin hans, íbúðarlán, bílalán o.s.frv.

Vegna þessa gengishruns þá hefur allur innflutningur tvöfaldast í verði með tilheyrandi verðbólgu og vísitöluhækkunum verðtryggðra lána.

"Hit them where it hurts" segja Bretarnir og í stað þess að senda herþotur til að sprengja Reykjavík í loft upp þá settu þeir á okkur hryðjuverkalög sem hafa valdið okkur sambærilegu tjóni og ef Reykjavík hefði verið jöfnuð við jörðu.

Stór hluti landsmanna hefur verið í afneitum frá því fyrir hrun og ekki viljað enn horfast í augu við raunveruleikann og það sem hér gerðist. Eitt af því sem við höfum ekki viljað horfast í augu við er að við urðum fyrir nútímalegri hernaðarárás þjóðar sem við tölum vera vinaþjóð okkar.

Þessi árás hafið þann eina og sama tilgang og aðrar hernaðaraðgerðir og það er að valda óvininum eins miklu tjóni og hægt er án þess að verða sjálfur fyrir tjóni. Tilgangur hernaðaraðgerðarinnar var að mola niður óvininn og fá hann til að gefast upp og samþykkja nauðarsamninga sem sigurvegaranum eru þóknanlegir.

Við sem þjóð þurfum að fara að horfast í augu við veruleikann. Það var ráðist á okkur eins og ef um hernaðaraðgerð hafði verið um að ræða og samfélagið okkar mölbrotið fjárhagslega af nágrannalandi okkar, Bretlandi. Tjónið samsvarar því að Reykjavík hafi verið jöfnuð við jörðu.

Við höfum í framhaldi verið neydd til þess að skrifa undir nauðasamningana.

Hvers vegna í ósköpunum erum við enn með sendiráð og sendiherra hjá þessum kúgurum okkar?

Af hverju er ekki fyrir löngu búið að slíta stjórnmálasambandi því Breta?

Af hverju er ekki búið að selja sendiráðið og sendiráðsbústaðinn í London?

Af hverju er ekki búið að reka sendiherra Breta og allt hans lið burt úr landinu?

 

Hegðun Breta og Hollendinga ekki sæmandi

Að missa auðlindir landsins í hendur útlendinga.

Svo illa er nú komið fyrir þessari þjóð að erlendir fjárglæframann eru byrjaðir að kaupa upp auðlindir þjóðarinnar og gengur það vel. Fjárglæframenn segi ég því það er ekki hægt að kalla þá annað, menn sem bjóðast til að kaupa hlut Reykjavíkurborgar í hitaveitu þeirra Suðurnesjamanna með því að greiða út 25% kaupverðs og fá 75% kaupverðsins lánað hjá Seljanda á 1,5% vöxtum með veði í bréfunum sjálfum.

Svona og svipaða "díla" höfum við séð á síðustu árum hjá þeim mönnum sem gerðu þessa þjóð gjaldþrota. Þeir þurrkuðu upp allt fé úr bönkum landsins og allt fé í öllum okkar helstu og stærstu fyrirtækjum hvort heldur voru tryggingarfélög, flutningsfyrirtæki eða fisksölufyrirtæki og voru langt komnir með að féfletta lífeyrissjóðina þegar ruglið loks stöðvaðist.

Er ekki komið nóg að svona "dílum" í þessu samfélagi? Erum við ekki búin að sjá nóg af vinnubrögðum af þessum toga?

Er stór hluti forystumanna okkar í sveitarstjórnum og á Alþingi virkilega orðnir eins og þessar "meðvirku" konur sem alltaf sækja í ný og ný sambönd við drykkfelda menn sem berja þær?

Liggur ekki ljóst fyrir hvað þessir menn ætla sér að gera við þetta félag ef þeir ætla sé að fá 75% af kaupverðinu lánað hjá Seljanda og einu veðin eru bréfin sjálf? Hversu mikils virði verða þessi bréf þegar búið er að tvöfalda skuldir Hitaveitunnar frá því sem nú er?

Er ekki öllum ljóst að þessir menn líta ekki á þessi kaup sem langtíma fjárfestingu? Skilja menn það ekki að ef þetta væri langtíma fjárfesting hjá þessum aðilum þá kæmu þeir með sitt eigið fé og keyptu þennan hlut OR?

Liggur ekki fyrir að nái þeir meirihluta í félaginu þá munu þeir "taka á því snúning". Eftir mun standa orkufyrirtæki enn verr sett en það er í dag, skuldsett upp fyrir haus og þær skuldir munu eins og allt hitt ruglið lenda á þjóðinni. Þegar búið verður að veðsetja og taka lán út á vinnsluleyfi Hitaveitunnar  sem er til 65 ára með vilyrði um framlengingu í önnur 65 ár þá munu allar skuldir Hitaveitunnar á endanum lenda á þjóðinni ætli menn að nýta orkuna á þessu svæði til húshitunar og rafmagnsframleiðslu. Og af hverju er verið að veita mönnum vinnsluleyfi í svona mörg ár? Erlendis eru slík leyfi veitt í 5 til 10 ár með vilyrði um framlengingu.

Þessa taglhnýtinga Alþjóða gjaldeyrissjóðsins eigum við að senda til síns heima. Þessa menn sem koma hér og vilja komast yfir orkuauðlindir þjóðarinnar þegar hægt er að kaupa þær fyrir tíu sent á dollar en finnst það ekki nóg og hafa til að bera þá óskammfeilni að reyna að komast yfir þær án þess að borga fyrir þær með því að reyna að fá kaupverðið lánað hjá okkur Reykvíkingum, slík fyrirtæki og slíka menn getum við verið án.

Við eigum sjálf nóg til af fólki af þessu sauðahúsi. Það er óþarfi að vera að flytja slíkt fólk til landsins. 

Þar fyrir utan þá eiga auðlindir þessa lands að vera í höndum og eigu þjóðarinnar. Það minnsta sem við getum gert nú þegar Alþingi er nýbúið að samþykkja að skuldsetja næstu kynslóð upp fyrir haus með því að samþykkja Icesave er að við höldum auðlindunum í eigu þjóðarinnar þannig að afraksturinn af þeim nýtist þjóðinni um ókomin ár, ekki útlendingum.

Mynd: Á Löngufjörum.

 

 

Eignast meirihluta í HS Orku

Að sitja á Alþingi í boði Landsbankans.

Eins og við var að búast þá valdi Alþingi auðveldustu leiðina út úr Icesave málinu. Að láta börnin borga.

Að óska eftir breytingum á samningum sjálfum var of erfitt og of mikið mál. Auðveldast var að samþykkja óbreyttan samninginn frá því í haust, samning sem gerður var af fyrri ríkisstjórn á strandstað í óðagoti, með fársjúkt fólk í forystu.

Mikil er ábyrgð stjórnar Landsbankans sem ákvað að veðsetja þjóðin fyrir 1.400 milljarða króna til þess að fjármagna eigin rekstur.

Meðan Landsbankinn veðsetti þjóðina fyrir 1.400 milljarða settu þeir milljónir á milljónir ofan inn í prófkjörsbaráttu flestra þeirra þingmanna sem sátu, og sitja enn, á Alþingi meðan þessi veðsetning fór fram.

Meðan Landsbankinn veðsetti þjóðina fyrir 1.400 milljarða settu þeir tugir milljóna inn í stjórnmálaflokkana á Íslandi.  Bara er búið er að upplýsa um hluta af þeim greiðslum. Upplýst hefur verið um greiðslur sem aðalskrifstofurnar fengu frá Landsbankanum. Ekkert hefur verið upplýst um fjárstuðning sem einstök flokksfélög þessara flokka um land allt hafa fengið.

Meðan Landsbankinn veðsetti þjóðina fyrir 1.400 milljarða þáðu starfsmenn Fjármálaeftirlitsins, Seðlabankans og annarra eftirlitsaðila gjafir, greiða, kauprétti og boð á ýmiskonar uppákomur, golfmót, móttökur, utanlandsferðir, endalaust áfengi fyrir jól, áramót og páska. Svo má áfram telja. Sjá þessa grein hér.

Nú er komið að þjóðinni að axla ábyrgð á þessari veðsetningu. 

Veðsetningu sem er til komin vegna þess að bankinn fór og féfletti almenning í Bretlandi og Hollandi. Féfletti segi ég því fram hefur komið að vitað var þegar bankinn hóf að safna innlánum í Hollandi vorið 2008 að bankinn var gjaldþrota.

Nú er komið að þjóðinni að axla ábyrgð á aðgerðum og aðgerðarleysi þingmanna / ráðherra þegar þeir leyfðu þessum Landsbankamönnum að féfletta almenning á Bretlandi og Hollandi um leið og þeir veðsettu þjóðina. 

Nú er komið að þjóðinni að axla ábyrgð á aðgerðum og aðgerðarleysi starfsmanna eftirlitsaðila þegar þeir leyfðu þessum Landsbankamönnum að féfletta almenning í Bretlandi og Hollandi um leið og þeir veðsettu þjóðina. 

Hvenær rennur sá dagur að þeir sem komu okkur í þessa stöðu, að eigur þeirra verið gerðar upptækar og þeir dæmdir af verkum sínum?

Hvenær rennur sá dagur að þeir alþingismenn / ráðherrar sem komu okkur í þessa stöðu þurfi að axla sín skinn?

Hvenær rennur sá dagur að þeir starfsmenn Fjármálaeftirlitsins og Seðlabankans sem komu okkur í þessa stöðu verði látnir sæta ábyrgð fyrir sín afglöp í starfi?

Hvenær nær réttlætið fram að ganga?

Mun það nokkurn tíma ná fram að ganga meðan á þingi situr fjöldi þingmanna í boðið, ekki bara Landsbankans heldur líka í boði Kaupþing og Glitnis?

Við þekkjum hvernig þetta fólk vinnur. Það sáum við þegar núverandi og fyrrverandi ríkissaksóknurum var falið að rannsaka syni sína þegar til stóð að rannsaka hvort eitthvað saknæmt hefði verið gert í aðdraganda bankahrunsins. Þessi blygðunarlausa tilraun til yfirhylmingar er fordæmalaus í vestrænum réttarríkjum.

Með allt þetta fólk enn á þingi í boðið bankana, með alla sömu starfsmennina í Fjármálaeftirlitinu og Seðlabankanum, nú og fyrir hrun, með ríkissaksóknara sem tók að sér að rannsaka hvort sonur hans hefði framið lögbrot, þá mun aldrei nást fram neitt réttlæti á Íslandi.

Auðvita samþykkti þetta fólk óbreyttan Icesave samning. Í framhaldi mun fara í gang þöggun og yfirhylmingar og öllum óþægilegum málum verður sópað undir teppi. Engin mun verða ákærður og engin mun þurfa að axla ábyrgð.

Málið er leyst með því að þjóðin er látin borga. Og það besta við "dílinn" er að þetta lendir á næstu kynslóð. Einfalt og þægilegt.

Sem áhorfandi héðan utan úr samfélaginu þá er það þessi mynd sem blasir við og hún er sorgleg.

Mynd: Við Deildartunguhver

 

Icesave-frumvarp samþykkt

MP banki beint í spillinguna

Frá því Sparisjóðirnir fóru að bera fé á helstu forystumenn samfélagsins, á fulltrúa í sveitarstjórnum, alþingismenn, sýslumenn, o.s.frv. með því að bjóða þeim eða gefa þeim stofnfé í Sparisjóðnum þá er eins og fjandinn hafi orðið laus í þessu samfélagi.

Það er eins og það þyki sjálfsagt mál í dag að fjármálastofnanir beri fé, gjafir og greiða á helstu trúnaðarmenn almennings.

Nú hefur einn nýjasti banki landsins afhjúpað hvernig hann starfar. Því miður virðist engin munur vera á hvernig hann starfar og hvernig gömlu gjörspilltu bankarnir störfuðu.

Miklar sögur hafa gengið á undanförnum árum hvernig bankarnir unnu. Við þekkjum flest þessar sögur. Eftirlitsaðilar, stjórnmálamenn, embættismenn og forkólfar lífeyrissjóðanna þáðu meðal annars eftirfarandi:

•Áfengi sem mælist í baðkörum. Koníak, Viskí, rauðvín og hvítvín, allt það flottasta sem völ var á var sent á hundruð manna fyrir jól, áramót og páska. Kepptust bankarnir um að toppa hver annan í magni og gæðum.

•Ferðir á erlenda knattspyrnuleiki voru stöðugt í gangi og ferðir á slíka leiki þáðu flestir þessara manna.

•Veiðiferðir, í lax og hreindýr. Í þessar ferðir fór meira og minna öll stjórnsýslan ásamt þingmönnum og stór hluti sveitarstjórnarmanna minnst einu sinni á sumri í boði bankana. Áhugamenn um veiði þáðu ferðir í boði allra bankana og margra sparisjóða.

•Sérstakar veiðiferðir til útlanda í lax, hreindýr og til veiða á villisvínum í Austur Evrópu og safaríferðir til Afríku. Háttsettum var boðið í slíkar ferðir. Villisvínaveiðar úr þyrlum voru vinsælar. Þar var mönnum keyrt milli staða í Bens jeppum og gist í glæsihöllum þar sem rauður dregill var út á götu og á móti “veiðimönnum” tóku logandi kyndlar og þjónar. Inni biðu svo vín og villtar meyjar.

•Ferðir á allskonar sýningar, vörusýningar, listviðburði o.s.frv.

•Farið var með þetta fólk í endalausar kynnisferðir að sýna starfsemi og fyrirtæki þar sem bankarnir komu að fjármögnun.

Allur kostnaður og allur viðurgjörningur á þessum ferðum var alltaf greiddur af bankanum. Í mörgum þessara ferða var mökum boðið með.

Í slíkum ferðum þekktist það að menn fengu sérstök kredit/debit-kort til notkunar á meðan á ferðinni stóð. Oft var síðan ekki gengið eftir að menn skiluðu þeim þó heim væri komið. Menn voru aldrei rukkaðir fyrir notkun á þessum “bankakortum”.

Þetta er svo fyrir utan allt fjármagnið sem flóði úr bönkunum til stjórnamálaflokkanna og stjórnmálamannanna. Sagt er að allir þeir sem gengt hafa ráðherraembættum á síðustu árum og fjöldi þingmanna eigi bankareikninga erlendis.

Þetta eru þær sögur sem mér hafa verið sagðar af ýmsum á síðustu 5 til 6 árum og ég sel þær ekki dýrari en ég keypti þær.

Sé bara hluti að þessum sögum réttar þá er stjórnsýslan og kjarninn í þingmannahópnum svo djúpt sokkinn í net bankana og fyrrum eigenda þeirra að þeir geta ekkert gert. Hendur þessa fólks eru bundnar eftir allt það sem það hefur þegið og þeirra heitasta ósk er að þessum málum sé sópað undir teppi og þessi mál öll þögguð niður. Það er það sem stjórnsýslan okkar er að reyna að gera og hefur verið að reyna að gera frá því Valtýr Sigurðsson og Bogi Nílsen voru skipaðir til þess að rannsaka hvort hugsanlega hefðu verið framin lögbrot í tengslum við hrun bankana. Þessum mönnum var falið að rannsaka syni sína. Sá gjörningur var einhver mesta tilraun til yfirhylmingar sem sést hefur í ríki sem telur sig vera réttarríki.

Hér átti svo sannanlega að þagga allt niður.

Dapurlegt að nýr banki skuli vera að að taka upp þessa ósiði. Ég sem vonaði og hélt ...

Mynd: Inni í Fljótsdal.

 

Fékk sér léttvín með mat

Það er enginn búmaður nema hann kunni að barma sér.

Hvað ætli stór hluti af þessum fjármunum sem þeir telja sig hafa tapað hafi verið "loftbólupeningar"? Eða peningar sem búnir voru til með allskonar loftfimleikum til að hækka hlutbréfin í bankanum? Fyrir liggur að þessir menn reyndu að hækka gengi hlutabréfa Kaupþings með öllum ráðum. Til dæmis með því að lána vildarvinum og eigendum fé til að kaupa hlutabréf í Kaupþingi með veði í bréfunum sjálfum.

Þannig svindluðu þeir upp verðið á hlutabréfunum og blekktu almenning hér heima og erlendis til að kaupa bréf í bankanum. Að ekki sé minnst á aðgerðir bankans þegar hann tók árum saman stöðu gegn krónunni og þar með Íslensku þjóðinni.

Þessi menn voru ekki að tapa fé. Þeir voru að tapa lofbólupeningum og froðu sem var í raun einskis virði.

Menn sem reka banka með þessum áherslum eru menn sem ég vil ekki eiga viðskipti við.

Vonandi að það verði góðir og grandvarir menn sem taka við rekstri Kaupþings í framtíðinni og reki bankann eins og á að reka banka.

Annað máltæki er á þennan veg: "Allt er það eins, liðið hans Sveins".

Víst er að  eigi sú von að ganga eftir þá verður að skipta út öllum stjórnendum í þessum Kaupþings banka niður í útibústjóra.

 

 

Fengum langmesta höggið

Er fólkið okkar í fjármálageiranum allt skaddað eftir "Íslenska efnahagsundrið"?

Hvað hefur gerst í þessu samfélagi okkar? Er þetta siðblinda eða veruleikafirring eða hefur þetta fólk sem kom að þessum fjármálageira okkar á síðustu árum skaddast svona mikið að það er úr öllum tengslum við það sem almenningur í þessu landi metur rétt og eðlilegt?  

Það segir mér engin neitt um það að það hafi ekki allir vitað af þessum tengslum þegar þessi bankaráðsmaður var settur í bankaráð nýja Kaupþings. Af hverju gera menn svona og setja þessa tvo einstaklinga í þessa stöðu? Og af hverju sjá þessir einstaklingar ekki að þetta er ekki í lagi?

Þessi kona hefði sjálfsagt verið flott í bankaráði nýja Landsbankans eða nýja Íslandsbanka og engin hefði gert við það nokkra athugasemd. Af hverju var hún ekki sett í þessa banka? Að setja hana í Bankráð Kaupþings þar sem fyrirtækið sem eiginmaður hennar er að reka, eitt umfangsmesta fasteignafélag landsins, er í milljarða viðskiptum er annað tveggja hreint og klárt dómgreindarleysi eða aðrar og verri ástæður liggja þar að baki.

Ekki ætla ég að vera með getgátur hverjar þær aðrar ástæður geta verið en nóg höfum við séð af tilraunum til yfirhylminga, þöggunar og hreinum og klárum lögbrotum þessa fólks sem vinnur í þessu spillta umhverfi sem búið er að afhjúpa að íslenski fjármálaheimurinn er.

Hvor heldur ástæðan sem er fyrir því að þessi bankaráðsmaður er settur í bankastjórn nýja Kaupþings þá er vera hennar þar óásættanleg í banka sem eru í eigu þjóðarinnar. Það hefði ekki verið hægt að argast yfir slíku ef bankinn væri í einkaeign nema þá sem hluthafi en bankinn er ekki í einkaeign. Hann er í eigu almennings og almenningur getur ekki treyst því að bankaráðið sé að gæta hagsmuna eigandans, þ.e.a.s almennings, þegar svona hagsmunatengsl eru milli eins af æðstu stjórnenda bankans og eins af stærstu viðskiptavinum hans.

Mynd: Áð í Fljótsdrögum, séð yfir á Stórasand.

 

Skuldar milljarða og eiginkona forstjórans í bankaráði

Setning neyðarlagana stærstu mistökin?

Fjöldi manna hefur haldið því fram frá því neyðarlögin voru sett að setning þeirra hafi verið stærstu mistökin sem Þingvallastjórnin gerði á sínum 18 mánaða valdatíma. Eru þá ólastaðar aðgerðir hennar og aðgerðarleysi í aðdraganda bankahrunsins.

Ef 93% þeirra banka sem töpuðu fé í hruni íslensku bankana ætla að höfða mál vegna þess hvernig þeim hefur verið mismunað sem lánadrottnum á kostnað innistæðueigenda og hvernig ríkið yfirtók eignir/útlán gömlu bankana og setti í þá nýju án samráðs þá erum við sem þjóð í mjög erfiðum málum.

Að breyta leikreglum eftirá og gera einum lánadrottninum hærra undir höfði en öðrum eins og gert var með neyðarlögunum þegar innistæðueigendum voru tryggðar allar sínar innistæður að fullu, það þýðir að þeir lánadrottnar sem nú eru að tapa öllu sínu hljóta að vera æfir. Þeir lánuðu sitt fé á sínum tíma á þeim grundvelli að allir lánadrottnar sætu við sama borð færu bankarnir í þrot.

Nú ætlar ríkið allt í einu að breyta því öllu og setja nýjar leikreglur sem nú á að sila eftir. Hvað halda menn að þeir séu? Er þetta land okkar orðið algjört bananalýðveldi?

Ég er einn af þeim sem hef aldrei skilið af hverju menn settu þessi neyðarlög. Mér fannst með ólíkindum hvernig þau voru hugsuð, að mismuna lánadrottnum með þessum hætti eftir á að maður tali nú ekki um þegar lá fyrir að tryggja ætti allar innistæður Íslendinga hér heima að fullu en útlendingum bara lágmarkið í útibúunum erlendis.

Datt mönnum virkilega í hug að menn kæmust upp með þetta?

Ef nú tekur við þriggja til fimm ára ferli með endalausum fréttum af málaferlum tuga ef ekki hundruða fjármálastofnana á hendur ríkinu nú eftir 13 mánuði þá líst mér ekki á blikuna.

Tapi ríkið einhverjum að þessum málum fyrir dómstólum og ríkið verður dæmt til að greiða þessum lánadrottnum skaðabætur sem og innistæðueigendum sem fá ekki sínar innistæður að fullu greiddar út úr íslensku bönkunum af því þeir eru útlendingar, Icesave og Edge reikningarnir erlendis eru bara tryggðir að ákveðnu hámarki, förum við þá ekki endanlega á hausinn?

Tapi ríkið eitthvað af þessum málaferlum eða öllum þá erum við ekki að tala um neinar smá tölur í skaðabætur. Neyðist ríkið til að framlengja neyðarlögunum næstu 5 til 10 árin og afhjúpa okkur þar með endanlega sem bananalýðveldi?

Hvað var þetta fólk að hugsa þegar þessi neyðarlög voru sett?

Mynd: Við Flóðið í Grenlæk

 

Höfða mál vegna neyðarlaganna

En hvað með Landsbankamennina sem komu okkur í þessa stöðu?

Hvað ætla menn að gera við þetta fólk sem veðsetti þjóðina fyrir á annað þúsund milljarða í eigin hagnaðarskyni? Hvernig fólk er það sem gamblar með þjóð sína með slíkum hætti? Hvernig má það vera að þetta fólk skuli ekki enn hafa verið látið sæta refsingu og að ekki skuli vera búið að gera eignir þeirra upptækar?

Það er með ólíkndum ef ákæruvaldið ætlar ekkert að gera gagnvart þeim aðilum sem stýrðu og stjórnuðu Landsbankanum, einstaklingar sem láta nú hundruð milljarða falla á þjóðina.

Það verður aldrei sátt í þessu samfélagið ef þetta fólk fær að ganga laust og halda öllum eigum sínum meðan þjóðin þarf beygð og buguð að vinna sig út úr þessu Icesave máli næstu 14 árin.

Hér ganga líka um göturnar menn sem fullyrða að hér muni aldrei neitt réttlæti ná fram að ganga. Einhver gögn gangi nú milli stofnana og verið sé að skoða einhver mál en það sé bara sýndarmennska. Þessir menn fullyrða að þeir sem höfðu hér fullar hendur fjár á síðustu árum þeir höfðu vit á því að kaupa sér velvild í stjórnsýslunni, hjá stjórnmálamönnum og hjá fjölmiðlamönnum. Hundruð manna og kvenna voru "keypt" með gjöfum og greiðum, beinum peningastyrkjum og óbeinum greiðslum, veiðiferðum og matarboðum, utanlandsferðum og VIP þjónustu.

Þessir menn segja stjórnsýsluna svo djúpt sokkna í spillinguna með "brotamönnunum" í Íslenska bankahruninu að hér nái aldrei neitt réttlæti fram að ganga meðan þetta fólk situr þar og verndar sig og sína.

Hagvöxtur stýri greiðslum

Dráttarvextir skv. ákvörðun Seðlabanka Íslands eru 19,0%.

Seðlabanki Danmerkur hefur ákveðið að lækka stýrivexti um 0,10 prósentur. Frá og með morgundeginum verða stýrivextir í landinu því 1,45%.

Það er ólíkt umhverfið sem okkur Íslendingum er ætlað sem grunnur til að vinna okkur út úr kreppunni annars vega og hins vegar það umhverfi sem Dönum og öðrum nágrönnum okkar er boðið upp á.

Fyrirsögnin hér fyrir ofan er tekin upp af heimasíðu eins ríkisbankans þar sem verið er að kynna vexti á inn- og útlánum. Þar stendur: "Dráttarvextir skv. ákvörðun Seðlabanka Íslands eru 19,0%."

Hvað er þetta óheyrilega vaxtaokur Seðlabankans með dráttarvextina um um og yfir 20% búið að standa lengi? Er það ekki farið að nálgast á þriðja eða fjórða ár?

Með þessari gjaldþrotastefnu Seðlabankans að halda dráttarvöxtum þetta háum þá hefur bankinn náð miklum árangri og er að takast fella hvert fyrirtækið á fætur öðru og nær þá líka oft að krækja um leið í nokkra einstaklinga. Það er vitað mál að engin rekstur eða einstaklingar geta staðið undir slíkum dráttarvöxtum í eðlilegu árferði, hvað þá mestu kreppu sem yfir okkur hefur gengið frá stríðslokum. Tilgangurinn með þessu stýrivötum getur því aðeins verið einn. Að taka til.

Þeir Seðlabankamenn fagna sjálfsagt á sinn hátt þegar þeir lesa tölur um fjölda gjaldþrota fyrirtækja og einstaklinga þegar þær byrtast.

Þeir bíta vel þessir dráttarvextir Seðlabankans. Hún hefur líka bitið vel ráðgjöf hans fyrir og eftir hrun. Þá stóð hann sig vel og náði að fella marga með ráðgjöf sinni, aðgerðum og aðgerðarleysi. Svo eru menn að tala um að þeir vilji ganga í ESB til að losna undan efnahagsráðgjöf Íslenska Seðlabankans og fela þessa ráðgjöf Seðlabanka Evrópu. Og við sem eigum þennan líka fína Seðlabanka.

Að mönnum skuli láta sér detta þetta í hug eins vel og Seðlabanki Íslands hefur reynst okkur. Hann hefur leitt okkur út úr fastgengisstefnu sinni yfir í fljótandi gengisstefnuna sína. Og alltaf hefur þetta bara batnað hjá okkar. Nú er bankinn ábyggilega að finna einhverja aðra snilldar leið fyrir okkar að fara í gengismálum sem mun tryggja okkur enn frekari og meiri hagsæld um ókomin ár, byggða á reynslu þessara grandvöru og góðu manna sem þar hafa dvalið undanfarna áratugi.

Maður fyllist bara bjartsýni þegar maður hugsar til þess að senn leggur þjóðina aftur af stað í enn eina vegferðina með Seðlabanka Íslands við stýrið og Íslensku krónuna fyrir Stafni.

Já, ég er strax farinn að finna reykinn af réttunum sem bíða okkar þar.

 

Stýrivextir lækkaðir í Danmörku

Öll stjórnsýslan á flótta undan Rússaláni

Enn eitt furðumálið bætist nú við önnur furðumál sem snúa að Íslensku stjórnsýslunni og bankahruninu. Engin eru þessi mál til að auka á trúverðugleikann í samfélaginu. Á nýjum óháðum vefmiðli, Netvarpinu, lýsir sendiherra Rússlands því yfir að Íslendingar hafi í haust hafnað fjögurra milljarða evra láni frá Rússum.

Tvennt vekur athygli mína.

Í fyrsta lagi að nýr óháður netmiðill skuli koma fram með þetta mál en ekki einn af okkar hefðbundnu fjölmiðlum. Það hefði verið hið eðlilegasta mál að einhver þeirra hefði átt þetta viðtal við sendiherrann til fylgja eftir umræðunni um þetta mál frá í haust.

Á þessu geta verið tvær skýringar:  

• Íslenskir fréttamenn og fréttamiðlar eru ekki starfi sínu vaxnir.
• Ákveðið hafi verið að þagga þetta mál niður.

Einhvern vegin er fyrri skýringin ekki trúverðug. Ég trúi ekki að þeir séu svona slappir. Þá er það spurningin, hverjir hafa hag af því að upplýsa ekki þjóðina um það að okkur hafi staðið til boða þetta lán og því verið hafnað? Davíð Oddson fær nú uppreist æru í þessu máli en hverjir tapa æru þegar þetta er upplýst?

Í öðru lagi vekur það athygli að engin í stjórnsýslunni skuli kannast við málið. Allir eru komnir á flótta þegar sendiherra Rússlands á Íslandi kemur og lætur hafa eftir sér í viðtali að okkur hafi staðið til boða 4 miljarða evra lán í haust en láninu hafi verið hafnað.

Ég get ekki séð neina ástæðu fyrir því af hverju þessi sendiherra ætti að vera að ljúga þessu.

Ég get hins vegar séð margar ástæður fyrir ýmsa að halda þessu máli leyndu eftir að þeir höfnuðu láninu.

Eftir hrun bankana komust "frjálsu" fjölmiðlarnir tveir líka undir hæl ríkisins eins og RÚV. Morgunblaðið og 365 Miðlar eru og voru komnir upp á náð skilanefnda bankana. Þessir fjölmiðlar dansa og syngja fyrir ríkið eins og þeim er sagt. 

Trúverðugleiki þessa viðtals við Rússneska sendiherrann er enn meira af því að það er birt í þessum nýja óháða netmiðli. Hvorki sendiherrann né netmiðillinn hafa hagsmuni af þessu máli.

Hér er bara verið að upplýsa almenning.

 

Enginn hafnaði láni Rússa

Fasteignamarkaðurinn og byggingaiðnaðurinn látinn taka höggið.

Stjórnvöld, bæði ríkisstjórn og sveitastjórnir, eru sammála um að láta fasteignamarkaðinn og byggingaiðnaðinn taka á sig stærsta höggið í þessari kreppu. Á undanförnum árum hafa okkar helstu stjórnmálamenn lofað því og sagt að ríki og sveitarfélög muni halda að sér höndunum í framkvæmdum í uppsveiflunni til þess að geta komið sterk inn þegar og ef að kreppti. Orð þessa fólks eru í dag jafn mikils virði og orð eigenda og stjórnenda bankana. Efndirnar á loforðunum þær sömu.

Eftir situr ein best menntaða og fjölmennasta starfsgrein þessa samfélags í rústum. Allir arkitektar og tæknimenn þessa lands ganga um stofur sínar og reita hár sitt. Ekkert er í sjónmáli og engin von er gefin. Það eina sem kemur frá opinberum aðilum og ráðgjöfum þeirra er að atvinnuhorfur í Noregi og Kanada séu ekki svo slæmar.

Frekar virðast menn vilja borga milljarða á mánuði í atvinnuleysisbætur en brydda upp á einhverju nýju og nýta með öðrum hætti það fé sem fer í atvinnuleysisbætur. Af hverju nýta menn þessa milljarða ekki frekar í opinberar framkvæmdir?

Verkefnin eru ótæmandi. Af hverju fækka menn ekki á atvinnuleysisskrá og fara í að tvöfalda eitthvað af þessum einföldu brúm sem enn eru á hringveginum kringum landið. 80% til 90% af kostnaði við slíka brúarsmíð er innlent hráefni (steypa) og vinna. Stálið og timbur í mót er það eina sem þarf að kaupa að utan.

Á heimasíðu Vegagerðarinnar undir "Fyrirhuguð útboð" stendur í dag: 

"Verkum, sem áætlað var að bjóða út á síðari hluta þessa árs, er frestað um óákveðinn tíma vegna lækkunar á fjármagni til vegagerðar."

Af hverju velja menn að fara þessa niðurskurðarleið í bullandi atvinnuleysi í byggingariðnaðinum? Af hverju velja menn að fjölga enn á atvinnuleysisskrá og setja hundruð manna á atvinnuleysisbætur? Af hverju nálgast men þessi atvinnumál ekki með öðrum hætti og setja í gang þjóðhagslega arðbær verkefni og nýta í þær framkvæmdir það fé sem annars færi í að borga atvinnuleysisbætur? Þetta er leiðin sem löndin hér í kring eru að fara og hafa alltaf valið þegar kreppir að, af hverju förum við þessa leið ekki líka?

Ef opinberir aðilar vilja ekki fara sömu leið og nágrannar okkar og fjölga atvinnutækifærum með sama hætti og þar er gert með því að setja fjármagn í framkvæmdir af hverju skipta menn þá þessum byrgðum ekki jafnt á milli þjóðfélagshópa? Af hverju er í lagi að þúsundir manna sem starfa í byggingariðnaði missi vinnuna en ekki má segja upp einum einasta opinbera starfsmanni?

Er ekki tími til komin að við förum að sjá nýjar áherslur í atvinnumálum?

Mynd: Ein af gömlu brúnum í Róm.

 

65 makaskiptasamningar í júlí