Eftir misheppnuðustu einkavæðingu í heimi endar, á Fullveldisdaginn, helmingurinn af þjóðarauðunum í höndum útlendinga.

Eftir misheppnuðustu einkavæðingu Íslandssögunnar ef ekki heimssögunnar þá enda tveir af þrem gömlu ríkisbönkunum í höndum útlendinga.

Afleiðing einkavæðingar ríkisbankana fyrir sex árum, árið 2003, endaði með þriðja og sjötta stærsta gjaldþroti heims þegar Kaupþing og Landsbankinn féllu. Þessu til viðbótar er svo stærsta persónulega gjaldþrot heims þegar stjórnarformaður Landsbankans og ábyrgðarmaður númer eitt á Icesave reikningunum lýsti sig gjaldþrota fyrr á þessu ári.

Með það í huga að þetta þrennt gerðist allt á fimm árum, stærsta persónulega gjaldþrot heims og þriðja og sjötta stærstu gjaldþrot í heimi "í flokki fyrirtækja" þá held ég það muni fáir mótmæla því mjög hátt þó ég láti það eftir mér að fullyrða að einkavæðing íslensku bankana hafi verið misheppnasta einkavæðing heimssögunnar.

En það er ekki bara íslenska þjóðin sem mun njóta ávaxtanna af þessari einkavæðingu um ókomin ár. Erlendir aðilar, bankar, sjóðir, fyrirtæki og einstaklingar hafa tapað tugum þúsunda milljarða króna.

Allar áætlanir sem hér voru uppi þegar neyðarlögin voru sett um að við ættum ekki að borga skuldir óreiðumanna og bankarnir okkar, Seðlabankinn og viðskiptabankarnir, myndu á endanum koma mjög vel út úr þessum gjörningi sem neyðarlögin voru, öll eru þessi loforð horfin. Gufuð upp.

Í staðin er þjóðin að axla ábyrgð á skuldum þessara óreiðumana og erlendir aðilar eru að eignast tvo stærstu banka landsins. Þar með talin lán þúsunda einstaklinga, fyrirtækja, útgerðarfélaga, sveitarfélaga og orkufyrirtækja. Það eru allar líkur á því að það verði útlendingar sem munu eiga á morgun, fullveldisdaginn 1. des., stærstan hluta lána okkar Íslendinga og þar með talin þau veð sem á bak við þessi lán eru.

Með því að erlendir aðilar hafa eignast stærstan hluta í Kaupþingi og Glitni þá hafa erlendir aðilar í raun "eignast" hálft Ísland.

Á fimm árum tókst í misheppnuðustu einkavæðingu veraldarsögunnar

• að gera Seðlabankann gjaldþrota,
• veðsetja þjóðina með Icesave reikningunum um sem samsvarar landsframleiðslunni
• skuldsetja ríkissjóð um sem samsvarar landsframleiðslunni
• og þar að auki missa helming allra lána okkar Íslendinga í hendur erlendra aðila og þar með í raun um helminginn af þjóðarauðnum í hendur útlendinga.

Hvað er til ráða?

Halda áfram á braut ríkisstjórnarinnar sem gengur aðallega út á það að skuldsetja samfélagið enn meira með Icesave og lánum frá AGS?

Halda áfram að fylgja stefnu Davíðs Oddsonar með íslensku krónuna sem gjaldmiðil og einangra okkar frá Evrópu á sama hátt og búið er að einangra okkur frá Bandaríkjunum?

Nú þarf nýjar lausnir og nýtt fólk!

Mynd: Við Skerjafjörðinn, 1.11.09.

 

Kröfuhafar eignast Arion

Góðar fréttir því nú er rétti tíminn til að byggja skóla

Það eru ánægjulegar fréttir að Framkvæmdasýsla ríkisins skuli vera að bjóða út hönnun Framhaldsskólans í Mosfellsbæ. Áætluð verklok fyrsta áfanga eru 2012 - 2013. 

Ég vil sjá fleiri svona verkefni. Verkefni sem fækka þeim atvinnulausu sem margir eru úr byggingariðnaði. Verkefni sem nýta starfskrafta sem engin er að nota í dag. Starfskrafta sem hægt er að nota til að skapa og búa til verðmæti sem munu nýtast samfélaginu um ókomin ár.

Að borga mönnum laun eru vissulega meiri kostnaður en borga þeim atvinnuleysisbætur og til viðbótar kemur efniskostnaður en eftir standa mannvirkin og í þessum mannvirkjum felast mikil verðmæti fyrir utan notagildi þeirra.

Í dag fær "engin neitt" fyrir þessa 20 milljarða sem fara í atvinnuleysisbæturnar á þessu ári.

Byggingaverkefnin bíða okkar um allt.

Hvenær ætla menn að fara í gang með að ljúka þessum íbúðum sem standa í dag hálfkláraðar? Bankarnir eiga þær flestar og þar með við. Af hverju nýta menn ekki þennan slaka sem er á byggingamarkaðnum í dag og setja atvinnulausa iðnaðarmenn í að klára þessar íbúðir í rólegheitunum?

Væri það ekki skynsamlegra og betur farið sem peningana okkar en vera að borga þessum iðnaðarmönnum atvinnuleysisbætur? Við vitum að það er þörf á þessum íbúðum og þær munu á endanum seljast. Af hverju ekki að klára þær?

Ætla menn að flytja inn iðnaðarmenn í stórum stíl frá útlöndum þegar stíflan springur og allt fer hér aftur á fljúgandi ferð?

Mynd: Við Skerjafjörðinn, 1.11.09.

 

Hönnun framhaldsskóla boðin út

Eru sjómenn yfirstétt eða ölmusumenn?

Eru sjómenn yfirstétt á Íslandi? Yfirstétt sem nýtur sérstakra forréttinda? Yfirstétt sem borgar ekki skatta af launum sínum á sama hátt og aðrir þegnar þessa samfélags?

Eða eru sjómenn ölmusumenn sem eru á svo lágum launum og búa við svo bág kjör að öllum finnst rétt og eðlilegt að jafnvel einstæðar mæður og ekkjur þessa lands borgi hærra hlutfall af launum sínum en þeir til að hægt sé að senda börn sjómanna í skóla og tryggja heilsugæslu þeirra sjálfra? 

Hvernig má það vera að ákveðin stétt mann býr hér við sérstök skattafríðindi áratugum saman? Af hverju er það svo að ákveðnir hópar í þessu samfélagi leggja lægra hlutfall af launum sínum til samneyslunnar, til skólanna, heilsugæslunnar o.s.frv. en aðrir þegnar þessa lands?

Ég fagna tillögum fjármálaráðherra um afnám þessara forréttinda. Þessar tillögur eru þar fyrir utan eins mildar og hægt er að hafa þær. Þessi sjómannaafsláttur nemur að meðaltali á sjómann um kr. 190.000 á ári og sjómenn og útgerðarmenn fá fimm ár til að leysa þetta mál sín á milli.

Í hálfa öld hefur engin fjármálaráðherra haft pólitískan kjark né þor til að taka á þessu misrétti, þessum forréttindum, fyrr en nú. Steingrímur J. Sigfússon á heiður skilið nái hann þessu í gegn.

Í hálfa öld höfum við Íslendingar þurft að bíða eftir að eignast fjármálaráðherra sem skynjar það ranglæti sem felst í þessum sjómannaafslætti og hefur haft pólitíska burði til að taka á þessu máli. Ég fagna því að við höfum eignast slíkan ráðherra.

Fyrir sjómenn hlýtur afnám þessa sjómannaafsláttar að vera ákveðið fagnaðarefni. Þeir verða efir 50 ára mismunum aftur fullgildir þegnar í þessu samfélagi og taka þátt í því á jafnréttisgrundvelli.

Gangi afnám þessa sjómannaafsláttar eftir þá verður hvorki litið á þá sem yfirstétt né heldur ölmusumenn.

Mynd: Við Nauthólsvík, horft til Öskjuhlíðar.

 

Sjómenn búa við betri kjör

Embætti sérstaks saksóknara byrjað að standa undir væntingum.

Á síðustu tveim mánuðum hafa þeir atburðir gerst að ég er byrjaður að fyllast bjartsýni á að embætti sérstaks saksóknara ætli að taka á málum tengdum hruninu.

Það að frysta eigur fyrrverandi ráðuneytisstjóra fjármálaráðuneytisins sem seldi hlutafé sitt í Landsbankanum rétt fyrir hrun var fyrsta alvöru yfirlýsing embættisins þess efnis að það verður tekið á öllum málum þar sem einhver grunur er á að um ólögmæta háttsemi hafi verið að ræða og að við rannsókn embættisins munu allir sitja við sama borð, bæði Jón og séra Jón.

Þegar sparisjóðsstjóri BYR hrökklast í dag úr starfi í kjölfar húsleitar sérstaks saksóknara nú í vikunni hjá BYR og MP banka vegna gruns um ólöglegt athæfi þá er ég byrjaður að hafa trú á þessari rannsókn og þessu embætti.

Til að endurreisa traust í samfélaginu þá þarf að draga þá til ábyrgðar sem sem brutu lög og brugðust í aðdraganda hrunsins.

Það er nauðsynlegt fyrir okkur Íslendinga að þetta fólk sé dregið til ábyrgðar og það er líka nauðsynlegt fyrir þá erlendu aðila sem hafa tapað óhemju fé á viðskiptum við íslensku bankana.

Bara þannig getum við endurreist traust hér heima og erlendis.

Ég hvet sérstakan saksóknara og samstarfsfólk hans til að láta engan bilbug á sér finna og halda óðrauð áfram.

Mynd: Horft fram Fossvoginn.

 

Sparisjóðsstjóri Byrs í leyfi

Dansað á bryggjunni í Nauthólsvík.

Þó á móti blási nú um stundir í efnahagsmálum þá er ljóst að kreppan hefur takmörkuð áhrif á okkur Íslendinga.

Í það minnsta var ekki að sjá á þessu pari sem tók danssporin á bryggjunni í Nauthólsvík nein merki drunga, kvíða eða lífsleiða, nú rúmu ári eftir Hrun. Þvert á móti geislaði af þessu fólki lífsgleði og ánægja.

Á meðan Íslendingar dansa í vetrarsólinni við undirleik öldugljáfursins á bryggjum landsins þá þarf í engu að kvíða framtíðinni.

Mynd: Bryggjan í Nauthólsvík, 1.11.09.

 

Daniel Gros: Samningamenn Íslands skildu ekki grundvöll Icesave samningsins.

Allir, innlendir sem erlendir aðilar sem kynna sér Icesave samning gera við hann mjög alvarlegar athugasemdir. Nú er það Daniel Gros, hagfræðingur og nýr bankaráðsmaður í Seðlabankanum.

Hann bendir á að helstu rök Breta fyrir því að Íslenska þjóðin eigi að greiða allar Icesave innistæður í Bretlandi að fullu er jafnræðisregla samningsins um Evrópska efnahagssvæðið, EES. Nú bendir Daniel Gros á að ef þessi regla eigi að gilda þá eigi hún ekki bara að gilda á einu sviði samningsins heldur á öllum sviðum hans. Þar á meðal á hún að gilda um vaxtakjörin.

Daniel Gros telur það brot á jafnræðisreglu EES að Bretar lána Íslenska innistæðutryggingasjóðnum á hærri vöxtum en Breska innistæðutryggingarsjóðnum. Vegna jafnræðisreglunnar þá eigi þessir tveir sjóðir að sitja við sama borð hvað varðar lánakjör.

Gildi jafnræðisreglan þá á Íslenski innistæðutryggingarsjóðurinn ekki að greiða 5,55% vexti heldur um 3,5% vexti eins og sá breski og Íslendingar væru þar með að spara sér í vexti af Icesave láninu 185 milljarða króna.

Samfélagið hefur logað af illdeilum frá því Svavar Gestsson, aðalsamningamaður Íslands í Icesave málinu, kom heim með þennan samning og kynnti þjóðinni.

Samningurinn hefur verið er gagnrýndur fyrir margt. Í raun fyrir að vera hreinn nauðasamningur þar sem samningamenn Íslands virðast hafa gefið allt eftir.

Margir hafa fullyrt að sjaldan ef aldrei hafa samningamenn Íslands komið heim með jafn lélegan samning þar sem hagsmunir Íslands hafa verið með jafn augljósum hætti fyrir borð bornir.

Með þessari álitsgerð Daniel Gros kemur enn einn sérfræðingurinn fram á sjónarsviðið og gagnrýnir mjög harkalega þennan samning. En Daniel Gros er ekki bara að gagnrýna samninginn. Hann er að gera miklu meira en það.

Það sem Daniel Gros er í raun að segja er að samningamenn Íslands hafi ekki haft skilning á þeim lögum og reglum sem samningurinn er grundvallaður á.

Þessi Icesave samningur er með slíkum agnúum að Alþingi má ekki samþykkja hann. Þennan samning verður að fella. 

Mynd: Nauthólsvík, 1.11.09.

 

Gæti sparað 185 milljarða

Gerir lágt gengi krónunnar næsta áratuginn Ísland að Albaníu norður Evrópu?

Margt bendir til þess að við sitjum upp með þetta lága gengi á krónunni næsta áratuginn. Ofaná mikla ásókn í erlendan gjaldeyri þá eru nú að bætast við nýju bankarnir sem þurfa að greiða með gjaldeyri fyrir þær eignir sem þeir tóku út úr þrotabúi gömlu bankana. Fyrir Landsbankann nema þessar greiðslur 26 milljörðum króna á ári næstu 10 árin. Sjálfsagt má búast við að svipuðum greiðslum vegna kaupa Íslandsbanka og Arion á eignum út úr þrotabúum Glitnis og Kaupþings.

Það lítur úr fyrir að á næstu árum verið slegist um hverja evru og hvern dollar sem kemur inn í landið. Þeir sem þurfa á erlendum gjaldeyri að halda eru:

• Ríkissjóður til að greiða vexti og afborgarnir af lánum.
• Orkufyrirtækin, sjávarútvegurinn, sveitarfélög og fl. vegna erlendra lána.
• Nýju bankarnir þrír til að greiða fyrir þær eignir sem þeir yfirtóku.
• Erlendir eigendur krónubréfa.
• Almennur innflutningur vöru og þjónustu
• Erlend innkaup vegna rýrra fjárfestingar sem ætlunin er að ráðast í, virkjanir o.s.frv.

Það er því ljóst að gríðarleg þörf verður fyrir erlendan gjaldeyri hér næstu árum. Mikið má vera ef krónan gefur ekki enn meira eftir og lækkar.

Í dag eru Íslendingar með lægstu laun í vestur Evrópu vegna lágs gengis krónunnar. Ef það verður staðan í heilan áratug verðum við þá eftir 10 ár orðin ein fátækast þjóð Evrópu?

Ég sé bara eina leið út út þessu. Við eigum að taka einhliða upp evru eða dollar. Við eigum ekki að láta þessa gjaldeyriskreppu gera okkur að Albaníu norður Evrópu.

Mynd: Nauthólsvík, 1.11.09.

 

Samkomulag um lækkun gengisins

Helmingur lántakenda hafnar verri lánakjörum félagsmálaráðherra.

Það að 50% lántakenda hafna greiðslujöfnunarleið ríkisstjórnarinnar segir allt sem segja þarf um þessa misheppnuðu aðgerð ríkisstjórnarinnar við að aðstoða heimilin í landinu.

Félagsmálaráðherra segir að þeir sem hafi hafnað þessari greiðslujöfnun, það er fólk sem geti staðið undir núverandi greiðslubirgði lána sinni og það sjái hag sínum betur borgi utan greiðslujöfnunar.

Ef þeir sem betur mega telja hag sínum betur borgið með því að hafna þessari greiðslujöfnun og hafa lánin óbreytt, hvernig hjálp er þá þetta sem ríkið þykist vera að rétta almenningi?

Jú, jú greiðslubirgði lána lækkar í einhver misseri en hvað svo?

Þeir sem hafa efni á að sleppa við að fara með lánin sín í greiðslujöfnun þeir gera það. Þeir sem hafa ekki efni á því, þeir fara í greiðslujöfnun.

Félagsmálaráðherra lætur setja lög á Alþingi sem setur öll verðtryggð lán í landinu í greiðslujöfnun. Mat 50% lántakenda er að með þessum lögum er verið að breyta lánum þeirra til verri vegar.

Af hverju er félagsmálaráðherra að breyta öllum fasteignalánum landsmanna með lögum frá Alþingi til verri vegar?

Fyrir hverja er félagsmálaráðherra að vinna í þessu máli?

Þeir sem betur mega flýja með lánin sín á gömlu kjörunum út úr þessum pakka. Þeir sem ekki hafa fjárráð til þess sitja upp með Svarta Pétur.

Mynd: Gamlar stríðsmenjar við Nóthólsvík, 1.11.09.

 

Ráðherra telur úræðið gott

40% þjóðarinnar á flótta undan "skjaldborg heimilana" / gildru bankana.

Þeir sem vit hafa á eru að forða sér frá því að lenda inni í þessari "skjaldborg heimilana" sem er enn ein gildran sem bankamenn egna fyrir almenning á Íslandi í þeim tilgangi að féfletta hann.

Það fólk sem er að segja sig frá þessari svokölluðu "greiðslujöfnun fasteignalána" veit og skilur að þessi greiðslujöfnun sem er kynnt sem skjaldborg um heimilin, er ekkert annað en gildra. 

Fjármálastofnanir hafa komist í þá aðstöðu að hafa geta sett upp gildru fyrir lántakendur undir yfirskini aðstoðar og hjálpar á erfiðum tímum. Reynt er með aðstoð ríkisins að lokka lántakendur inn í þessa gildru með því að bjóða þeim aðeins lægri afborganir í nokkur misseri.

Þetta fólk sem er að segja sig frá þessari "skjaldborg" veit að kaupmáttur launa á Íslandi í dag er í sögulegu lámarki. Laun á Íslandi eru í dag þau lægstu í Vestur Evrópu. Sú staða mun brátt breytast og þegar það gerist þá mun það gerast hratt. Þá munu þessi lán líka hækka hratt.

Þetta fólk veit líka að laun og þar með kaupmáttur í landinu mun hækka miklu meira á næstu árum en almennt verðlag í landinu. Krónan er líka í sögulegu lámarki og við hækkun krónunnar þá munu innfluttar vörur lækka í verði. Það þýðir að núverandi lánskjaravísitala, þar sem innflutningur vegur 50%, að lán tengd þessari vísitölu þau lán munu standa í stað og jafnvel á einhverju tímabili lækka þegar krónan styrkist. 

Þetta fólk veit að framundan eru samningsbundnar launahækkanir þrátt fyrir kreppuna. Launamenn hafa mjög haldið aftur af kröfum sínum um launahækkanir og telja sig eiga þar mikið inni. Þessar launahækkanir verða sóttar þegar á næsta ári og þar næsta. Þá byrja þessi launatengdu lán að hækka umfram hefðbundnu fasteignalánin. 

Þetta fólk gerir sér grein fyrir því að lán tengd launavísitölunni munu hækka miklu meira en lán tengd almennri verðlagsþróun horft til næstu 5 til 10 ára, hvað þá til næstu 25 til 40 ára.

Þetta fólk gerir sér grein fyrir því að þessi greiðslujöfnun fasteignalána virkar eins og að pissa í skóinn sinn. Það verður hýtt í nokkur misseri síðan kemur nístingskuldinn og þeir sem þetta gera verður miklu verr settir en áður.

Þetta fólk gerir sér grein fyrir því að strax eftir eitt eða tvö misseri verða eignir sem eru með þessi óhagstæðu launatengdu fasteignalán, þær eignir verða minna virði en eignir með hefðbundin fasteignlán

Þetta fólk gerir sér grein fyrir því að greiðsluaðlögun fasteignalána er ekkert annað en gildra búin til af gráðugum bankamönnum sem ætla sér að féfletta lántakendur sem ekki gá að sér og ganga í gildruna.

Í dag er reynt að telja fólki trú um að það geti hvenær sem er breytt lánunum úr launavísitölunni aftur yfir í lánskjaravísitöluna. Hver trúir loforðum bankana? Hver trúir loforðum stjórnvalda? Hver er tilbúinn að leggja húsnæðið sitt að veði í dag fyrir orð einhverra stjórnmála- og bankamanna? Þessum möguleika að lántakendur geti breytt um vísitölutryggingu fasteignalána er hægt að loka án fyrirvara á einum degi.

Þetta fólk trúir því ekki að þessi möguleiki verði til staðar til langframa og ef það breytir lánunum þá verði það svo kostnaðarsamt að bankarnir muni í öllu falli hirða allan ávinninginn sem hugsanlega verður við að tengja lánin launavísitölunni.

Það sem mér finnst ótrúlegast í þessu máli er að félagsmálaráðherra og allt hans fólk skuli hafa látið fjármálastofnanir blekkja sig til að fara út í fjármálagjörning sem þennan.

Fjármálagjörning þar sem bankamönnum er leyft taka enn einn snúninginn á þjóðinni.

Mynd: Við Fossvoginn, nýbygging HR, 1.11.09.

 

38,5% hafa afþakkað greiðslujöfnun

Spáð er hagvexti um allan heim á næsta ári.

Efnahags- og framfarastofnunin, OECD, gerir ráð fyrir að öll helstu efnahagssvæði heimsins rétti úr kútnum á næsta ári. Eftir samdrátt á þessu ári spáir OECD að hagvöxtur í BNA verði 2,5%. Þá telur stofnunin að líkur á annarri dýfu í efnahagkerfi heimsins hafi minnkað verulega frá því var fyrir misseri síðan.

Sjá þetta viðtal hér. http://www.youtube.com/watch?v=XWf1Mq9DbfY&feature=player_embedded

OECD spáir reyndar samdrætti hér á landi á næsta ári upp á 2,1% þannig að gert er ráð fyrir að við skerum okkur úr hvað þetta varðar frá öðrum löndum Evrópu. Við vitum líka að lítið þarf að koma til þannig að þetta lítill samdráttur verið að hagvexti. Þennan samdrátt er hægt að þurrka út með nýjum fjárfestingum, framkvæmdum og aukum útflutningi. Verði eitthvað af þeim mörgu verkefnum sem horft er til að veruleika og verði eitthvað úr þeirri miklu nýsköpun sem unnið er að þá gætum við jafnvel fengið hagvöxt þegar á næsta ári.

Hvernig svo sem litið er á málin þá er bjart yfir stærstu hagkerfum heims og þau sjá öll fram á hagvöxt þegar á næsta ári þó svo ekki sé gert ráð fyrir að atvinnuleysi minnki mikið á næsta ári. 

Það versta virðist því afstaðið í þessari dýpstu kreppu sem riðið hefur yfir heimsbyggðina frá lokum seinni heimstyrjaldarinnar.

Þessu ber að fagna.

Mynd: Við Fossvoginn, nýbygging HR, 1.11.09.

 

OECD spáir hagvexti hér 2011

Ráðherrar dregnir fyrir Landsdóm?

Mun nást fram réttlæti og verða þeir sem bera ábyrgð á því mikla tjóni sem hér hefur orðið dregnir til ábyrgðar?

Fyrir helgi hefði ég svarað þessari spurningu neitandi.

Nú hefur vaknað von. Fyrir því eru tvær ástæður. 

Í fyrsta lagi er það hið óvænta útspil sérstaks saksóknara í gær að frysta eigur ráðuneytisstjórans fyrrverandi í fjármálaráðuneytinu sem seldi hlutabréf sín í Landsbankanum fyrir á annað hundrað milljónir króna nokkrum dögum fyrir yfirtöku ríkisins á bankanum.

Ef ráðuneytisstjóri í fjármálaráðuneytinu sem sat ótal fundi hér heima og erlendis að ræða stöðu Landsbankans með helstu sérfræðingum í málefnum bankans, ef hann telst ekki hafa haft aðrar og betri upplýsingar en almenningur hafði um stöðu bankans og ef hann telst ekki vera innherji í þessu máli hver telst þá vera innherji? Í augum flestra er maðurinn innherji og honum bar því að tilkynna sölu á þessum hlutabréfum sínum í bankanum. Ef þetta er ekki rétt þá er nú líka eins gott að maðurinn verði hreinsaður af þessum áburði.

Í öðru lagi eru það þessi ummæli Styrmis Gunnarssonar í þessari nýju bók hans þar sem hann ræðir þann möguleika að rannsóknarnefnd Alþingis leggi það til í skýrslu sinni að ráðherrar sem sátu í ríkisstjórn Geirs Haarde verði kærðir fyrir Landsdómi vegna aðgerða þeirra og aðgerðarleysis í aðdraganda hrunsins.

Mín tilgáta er sú að Styrmir sé það vel tengdur að hann væri ekki að setja slíkar vangaveltur inn í bók sem á eftir að bera nafn hans og hróður um ókomin ár nema fyrir þessu sé nokkur fótur ef ekki klár vissa.

Vegna þessara tveggja atburða nú í vikunni þá myndi ég í dag ekki svara spurningunni sem ég set fram fremst í þessum pistli neitandi eins og ég hefði gert fyrir helgi.

Ég svara henni heldur ekki játandi í dag en  nú hefur vaknað von.

Mynd: Við Fossvoginn, nýbygging HR, 1.11.09.

 

Ráðherrar fyrir dóm?

Ungverjum tókst á einu ári það sem okkur tókst ekki, losna við AGS.

Ungverjar lentu í miklum fjárhagerfiðleikum fyrir um ári síðan og þurftu að leita til Alþjóða gjaldeyrissjóðsins, AGS, um aðstoð eins og við Íslendingar.

Á því ári sem liðið er hafa Ungverjar náð að fylgja sínum  áætlunum það vel að "þeir ætla ekki að þiggja næstu útborgun á láni frá AGS og munu fresta því að þiggja frekari aðstoð frá Evrópusambandinu, að sögn Peter Oszko, fjármálaráðherra Ungverjalands".

Ungverjar hafa lækkað stýrivexti, eru búnir endurreisa bankana, setja inn í þá fé og búnir að styrkja lagaumhverfi þeirra. Ungverjar eru komnir á beinu brautina.

Auðvita eru aðstæður aðrar. Tjón okkar er hlutfallslega miklu meira. 85% allra fjármálastofnanna hér urðu gjaldþrota en það versta er þó gjaldeyriskreppan. 50% lækkun krónunnar sem þýðir 100% hækkun á erlendum gjaldeyri, erlendum lánum og innfluttum vörum og þjónustu.

En samt...

Mynd: Við Fossvoginn, 1.11.09.

 

Ungverjar afþakka lán

Hagkerfi um allan heim að rétta úr kútnum.

Þetta eru straumhvörf þegar þjóðverjar upplýsa að þýska hagkerfið, stærsta hagkerfi Evrópu, er byrjað að rétta úr kútnum eftir versta samdráttarskeið frá lokum seinni heimstyrjaldarinnar.

Þjóðverjar væru ekki að halda þessu fram nema þeir séu öruggir um að svo sé. 

Það er líka gleðiefni að Þjóðverjar telja að það taki hagkerfið bara tvö ár að ná sömu stöðu og var á árinu 2008. Það er ekki langur tími.

Kínverjar voru nýlega að upplýsa að hagvöxtur hjá þeim verið milli 8% til 10% á þessu ári.

Það er því ljóst að Evrópa og Asía munu vinna sig á örskotsstund út úr þessari kreppu. Spurningin í dag er bara hvernig Bandaríkjunum muni reyða af.

Hér á Íslandi þarf lítið að koma til þannig að hér fari allt í gang á nýjan leik. Við erum fámenn þjóð og það eru í raun bara örfáir einstaklingar sem ganga um atvinnulausir. Það þarf ekki miklar fjárfestingar eða mörg ný fyrirtæki til, þannig að hjólin fara að snúast á fullu á ný.

Það væri mikil synd ef við Íslendingar ætlum að fara að loka okkur hér inni í heimatilbúinni kreppu með víxlverkandi samdrætti  og skattahækkunum sem magna hvort annað upp.

Nú þegar allt er að fara í gang á ný í Evrópu þá eigum við líka að snúa vörn í sókn. Nú er komið að því að láta verkin tala.

Við eigum að gera allt sem við getum til þess að fá far á sömu bylgjunni og mun færa þýska hagkerfið á tveim árum í sömu stöðu og það var árið 2008.

Mynd: Við Fossvoginn, 1.11.09.

 

Þýskaland þarf tvö ár í viðbót

Heiðarleiki það gildi sem þjóðin metur mest.

Samkvæmt fyrstu niðurstöðum frá þjóðfundinum í Laugardalshöll þá er heiðarleiki það gildi sem flestir leggja mesta áherslu á. Frelsi er í sjöunda sæti.

Að ljúga að þjóðinni og leggja höfuð áherslu á frelsið er því ekki vænlegt til árangurs í stjórnmálum í dag.

Þessi fyrsta niðurstaða þjóðfundarins er strax eitthvað fyrir okkur Sjálfstæðismenn að moða úr þegar við veljum trúnaðarmenn til starfa fyrir okkur.

Mynd: Á göngubrúnni yfir Kringlumýrarbraut, 1.11.09. 

 

Þjóðin leggur áherslu á heiðarleika

Það er engin lausn að gera bankafólkið gjaldþrota.

Það er engin lausn að gera þá hundruð starfsmanna sem fengu lán til að kaupa hlutafé í bankanum sem það starfaði í gjaldþrota. Það eina sem samfélagið fær út úr því er brotið fólk og brotnar fjölskyldur.

Gríðarlega mikið fé og miklar eignir töpuðust í Hruninu.  Nú þarf að horfast í augu við þetta tjón og afskrifa það sem hefur tapast. Þetta tjón er það umfangsmikið og snertir svo marga að sú tiltekt sem þarf að fara fram verður að vera á samfélagslegum forsendum þannig að hér verði ekki enn meira tjón en orðið er. Við getum ekki minnkað fjárhagstjón okkar en við getum komið í veg fyrir að hér verið meira samfélagstjón.

Ég hef gagnrýnt mjög bankana eins og víða má lesa á þessu blogg mínu. Ég vil sjá miklar breytingar á starfsemi þeirra, jafnt breytingar á þeim lögum sem þeir starfa eftir og ég hef mælt með mikilli endurnýjum á stjórnendum þeirra. Hvorutveggja hefur verið og er í gangi. Eins að hafi menn brotið lög þá verði menn dæmdir.

Hins vegar finnst mér það ekki rétt að við förum að elta það starfsfólk sem bauðst að kaupa á sérkjörum hlutabréf í bankanum sínum og gera það gjaldþrota. Það græðir enginn neitt á því.

Markmið okkar nú sem samfélags hlýtur að vera það að sem flestir komist óbrotnir út úr þessu hruni og sem flestir geti tekið virkan þátt í þeirri miklu uppbyggingu sem framundan er á næstu árum.

Mynd: Fossvogsdalur, 1.11.09

 

Þrýstu á um að sleppa við að borga skatta af afskrifuðum skuldum

Uppselt á Stórtónleikana í Grafarvogskirkju í kvöld.

Snemma í dag varð uppselt á Stórtónleikana sem Lionsklúbburinn Fjörgyn stendur fyrir í kvöld kl. 20.00 til styrktar Barna- og unglingageðdeild LSH og líknarsjóði Fjörgynjar.

Við Lionsmenn stefnum á aðra tónleika að ári þannig að þeir sem ekki komast núna, þeir eru velkomnir þá

 

 

Það var fullt út að dyrum á Stórtónleikunum í Grafarvogskirkju.

 

 

 

Greiningardeild Glitnis enn í "2007 gírnum".

Fyrst forstöðumaður greiningardeildar Glitnis tjáir sig um lækkun á lánshæfismati ríkissjóðs um tvö þrep þá er einkennilegt að hann skuli velja að gera það með þeim hætti sem hann gerir.

Forstöðumaðurinn reynir að gera mikið úr jákvæðum smáatriðum þessara slæmu fréttar og forðast að ræða kaldann raunveruleikann, það að lánshæfismatið skuli hafa falli, ekki bara um eitt þrep heldur tvö og að tvö af þrem matsfyrirtækjunum telja horfur neikvæðar.

Það er einkennilegt að forstöðumaðurinn skuli ekki gera neina tilraun til að skýra ástæður þess að lánshæfismat ríkisins var lækkað um tvö þrep.

Ef þetta eiga að vera vinnubrögðin að snúa út úr slæmum fréttum og reyna að breyta þeim í góðar fréttir í stað þetta að greina vandann og ástæðurnar fyrir honum, þá líst mér ekki á framhaldið.

Ég skora á Ingólf Bender og aðra í svipuðum stöðum að hætta þessum 2007 töktum og fara að segja okkur sannleikann.

Af hverju lækkaði þetta matsfyrirtæki lánshæfismat ríkisins um heil tvö þrep?

Af hverju lækkar lánshæfismat ríkisins nú þegar AGS hefur loks endurskoðað efnahagsáætlun ríkisins?

Er lánshæfismatið lækkað vegna þess að með AGS láninu er verið að auka enn við erlendar skuldir ríkissjóð?

Mun lánshæfismat ríkissjóðs lækka enn frekar ef ríkið tekur meiri lán hjá AGS?

Er lánshæfismatið lækkað vegna þess að menn telja að Alþingi muni samþykkja Icesave og þær skuldbindingarnar muni falla á ríkissjóð?

Er lánshæfismatið lækkað vegna þess að efnahagsreikningar bankann voru að koma fram og staðan er verri en matsfyrirtækið ætlaði?

Er lánshæfismatið lækkað vegna fjárlagafrumvarpsins sem gerir ráð fyrir miklum skattahækkunum m.a. á stóriðjuna með hækkun skatta á raforku? Metur matsfyrirtækið það svo að það sé líklegt að það komi bakslag í þær áætlanir? Að líkur hafi því aukist á því að tekjuáætlun ríkissjóða á næsta ári, sem gerir ráð fyrir miklum stórframkvæmdum, að þær framkvæmdir muni ekki ganga eftir, áætlaðar skatttekjur vegna framkvæmdanna bregðast og þar með aukist líkur á að ríkið muni ekki geta staðið undir sínum skuldbindingum?

Hvað gerðist hér á síðustu mánuðum sem veldur því að lánshæfismatið fellur um tvö þrep?

Af hverju upplýsa greiningardeildirnar okkur ekki um það sem er í raun að gerast og hver hin raunverulega staða er?

Af hverju er alltaf verið að nota sveppaaðferðina, "kepp them in darkness and feed them wiht horseshit" á almenning á Íslandi?

 

Mynd: Veiðihúsið í Elliðaárdaldnum, 1.11.09.

 

 

 

Minni samdráttur en spáð var

Tónleikar með Páli Óskari og Móniku, Kristjáni Kristjánssyni (KK) og Herði Torfasyni , 12. nóv. í Grafarvogskirkju.

Tónleikar með Páli Óskari og Móniku, Kristjáni Kristjánssyni (KK) og  Herði Torfasyni  og fleirum, 12. nóv. kl. 20.00 í Grafarvogskirkju.

Grafarvogskirkja er önnur stærsta kirkja landsins. Við hönnun og gerð kirkjunnar var sérstakt tillit tekið til tónlistarflutnings.

 

"Stóra planið": Hækka skatta og skera niður framkvæmdir.

Þegar blaðað er yfir fjárlagafrumvarpið þá sést fljótt að það eina sem á að skera niður í rekstri ríkisins á næsta ári, það er viðhald og framkvæmdir.

Flest ráðuneyti og málaflokkar þeirra hafa nánast úr sömu fjármunum að moða og á síðasta ári. Það er ljóst að litlar eða engar breytingar á að gera á ríkisrekstrinum sem þandist út eftir hvert metárið síðasta áratuginn.

Ekkert á að taka á þessum ofvexti ríkisins í þessum fyrstu kreppufjárlögum. Plan ríkisstjórnarinnar er einfalt: 

Hækka skatta og skera niður framkvæmdir.

Ég fullyrði að aldrei hafa verið lögð fram fjárlög sem hafa mismunað þjóðfélagshópum jafn mikið á milli fjárlagaára eins og þessi fjárlög gera. 

Það er forkastanlegt að leggja allan samdrátt ríkisútgjalda á bygginga- og verktakastarfsemina í landinu.

Það er forkastanlegt að leggja allan samdrátt ríkisútgjalda á næsta ári á fjölskyldur þess fólks sem hefur haft atvinnu sína af því að starfa í byggingar- og verktakastarfsemi.

Af hverju má ekki hagræða í rekstri ríkisins?

Af hverju er bara skorið niður í viðhaldi og framkvæmdum?

Mynd: Í Elliðaárdalnum, 1.11.09.

 

47% skattur á launatekjur?

Rjúpnaveiðar.

Engu virðist vera til sparað þegar kemur að því að vernda rjúpnastofninn. Nú virðist vera byrjað að vakta með þyrlum svæði þar sem rjúpnaveiði er bönnuð og rjúpnaveiðimenn eltir uppi á þyrlum sjáist til þeirra á þessum svæðum. 

Lögreglan stöðvar líka rjúpnaskyttur og gerir afla og skotvopn upptæk hafi menn ekki á sér veiðikortið við rjúpnaveiðarnar.

Það er eins gott að lögreglan hafi ekki sama háttinn á og geri bíla og farangur upptækan þegar lögreglan stöðvar ökumenn sem hafa ekki á sér ökukortið.

Ég held lögreglan ætti nú að taka þessu aðeins rólega þó menn séu að sportast við að ná sér í rjúpur í jólamatinn. Á mörgum heimilum landsins þá eru engin jól nema það séu rjúpur á borðum enda ilmurinn af þeim þegar þær eru steiktar í ofni einstakur. Þetta er fyrir mörgum hin eina og sanna jólalykt. Ef það eru ekki rjúpur um jólin þá eru engin jól.

Nú er bannað að selja rjúpur þannig að þeir sem vilja halda sínum gömlu jólasiðum, þeir verða að fara á stúfana og veiða þær sjálfir.

Fjölmargir virðast vera tilbúnir að leggja mikið á sig til að eyðileggja þennan gamla jólasið fyrir þessum "rjúpnafjölskyldum" og hafa allt á hornum sér þegar rjúpnaveiðimenn fara til rjúpnaveiða.

Það er ljóst að þetta árið verða þessir rjúpnaveiðimenn ekki teknir neinum vettlingatökum og þó að ekki finnist fé til að kaupa eldsneyti á þyrlur Landhelgisgæslunnar þegar þarf að sinna einhverjum ferðalöngum í vandræðum á hálendinu þá virðist vera nægt fé til þegar þarf að vakta rjúpnaveiðilendur.

Alvarlegustu aðförina að þessum sið að hafa rjúpur í jólamatinn gerði þó Sif Friðleifsdóttir í ráðherratíð sinni í Umhverfisráðuneytinu. Hún bannaði alfarið alla rjúpnaveiði í nokkur ár. 

 

Mynd: Í Elliðaárdalnum, 1.11.2009.

 

 

Skyttur teknar á Þingvöllum