Rakalaus þvættingur Lansbankans um byggingamarkaðinn.

Enn á ný heldur Landsbankinn af stað og ber rangar og villandi upplýsingar um byggingamarkaðinn á borð fyrir landsmenn. Er bankinn og starfmenn hans í einhverskonar herför gegn þjóðinni? Er markmið bankans að valda hér enn meira tjóni en þeir hafa þegar valdið? 

Bankinn fær besta tímann í fréttunum á rúv í gærkvöldi með þennan rakalausa þvætting að hér þurfi ekki að byggja nýjar íbúðir næstu 4 til 5 árin.

Rök bankans fyrir þessu eru að hér standi um 3.000 nýjar óseldar íbúðir og það taki 4 til 5 ár að selja þær.

Ég leyfi mér að efast um þessar tölur bankans um fjölda nýrra íbúða. Ég held það sé ofmat eins og allt annað um þessi mál frá bankanum. Ég trúi betur tölum Dags B Eggertssonar sem nýverið upplýsti að fjárfesting sem liggur í nýju ónotuðu íbúðarhúsnæði nemi 73 milljörðum. Ef meðalverð fullbúinna íbúða er 36,5 milljónir þá samsvarar þessi fjárfesting 2.000 íbúðum.

Hvort hér standa 2.000 eða 3.000 fullbúnar íbúðir óseldar þá breytir það ekki þeirri staðreynd að á síðustu 10 árum, frá árinu 1998 til 2008, þá hafa verið byggðar og seldar að jafnaði um 2.730 íbúðir á ári, skv. tölum Hagstofunnar. Þessar nýju íbúðir sem nú standa óseldar samsvara eins árs þörf samfélagsins fyrir nýjar íbúðir. Það eru öll ósköpin. Hvað gengur Landsbankanum eiginlega til með þessum málatilbúnaði sínum?

Hvað varðar þá staðreynd að um 1.300 manns hafa flutt frá landinu þá ber að hafa það í huga að mikill fjöldi þeirra eru útlendingar sem komu hér til tímabundinna starfa. Þetta fólk og þessir menn bjuggu hér í vinnubúðum, á gistiheimilum eða leigðu margir saman íbúðir og hús. Þá er hluti þeirra sem hafa flutt á brott íslenskir iðnaðarmenn sem eru í tímabundnum verkefnum erlendis en fjölskyldur þeirra, konur og börn, búa áfram hér heima. Fjöldi þeirra íbúða sem þetta fólks skilur eftir sig auðar hér heima er ekki verulegur.

Aðal atriði þessa máls er þó það að inn á fasteignamarkaðinn eru að koma stærstu árgangar Íslandssögunnar. Á árunum 1980 til 1990 fæddust að jafnaði 4.300 börn á ári. Þetta er unga fólkið okkar í dag á aldrinum 20 til 30 ára. Í öllu eðlilegu árferði þá kallar bara þessi hópur á um 2.000 íbúðir á ári. Þessi fjárfesting sem nú liggur í óseldu íbúðarhúsnæði, þessar 2 - 3.000 íbúðir, duga rétt rúmlega fyrir einn af þessum árgöngum.

Lausafjárkreppan skall á í heiminum í júlí 2007. Íslensku bankarnir hættu allir haustið 2007 að lána almenningi til íbúðakaupa. Íbúðalánasjóður hefur verið nánast einn á markaðnum síðan. Áður en það gerðist var ekki til ný fullbúin óseld íbúð á markaðnum. Allt sem byggt var, það seldist. 

Eitt er víst, það vantaði ekki kaupendur að nýjum íbúðum á markaðinn haustið 2007 þegar bankarnir lokuðu skyndilega fyrir öll sín íbúðarlán vegna fjárskorts.

Fasteignamarkaðurinn hefur nú verið frosinn í tvö ár og bankamenn eru að fara á límingunum yfir því að það skuli liggja fjárfesting í íbúðarhúsnæði sem samsvarar rúmlega eins árs þörf samfélagsins fyrir nýtt íbúðarhúsnæði. Það sem verra er, þeir ljúga því að þjóðinni að þessar íbúðir eigi að geta annað allri þörf fyrir nýjar íbúðir næstu 4 til 5 árin. Auðvita geta menn látið þessar íbúðir endast í öll þessi ár ef lánafyrirgreiðsla til kaupenda verður lítil sem engin. Er það málið? Ætla bankarnir að halda áfram að draga fæturna í búðarlánum sínum? Er það planið að handstýra hér öllu og hafa hér allt í frosti næstu árin? Byggja hér enn eina stífluna á fasteignamarkaðnum og bíða þess að hún springi með braki og brestum?

Ef horft er til þess að hér á landi búa 2,5 einstaklingar í hverri íbúð en 1,8 í hverri íbúð í Kaupmannahöfn og 1,9 í hverri íbúð í Osló þá er ljóst að mikið þarf að byggja ef við ætlum að ná nágrönnum okkar í þessu efni. Ef við byggjum þannig upp hér að það búi af jafnaði 2,0 einstaklingar í hverri íbúð þá þyrftum við að byggja allt það sem er á skipulagsuppdráttum sveitarfélaganna frá Selfossi að Akranesi.

Ég held það væri verðugra verkefni fyrir bankamenn í dag að finna leiðir til að hjálpa unga fólkinu til að kaupa sér sína fyrstu íbúð, bjóða t.d. upp á hagstæð lán til 70 til 80 ára eins og víða tíðkast, en skammast í fjölmiðlum yfir því að  sveitarfélög landsins og byggingaraðilar hafi verið að sinna sínum samfélagslegu skyldum og hafi verið á fullu að byggja íbúðir upp í fyrirséða þörf fyrir íbúðir handa ungu fólki þegar bankarnir lokuðu og frystu óvænt fasteignamarkaðinn haustið 2007.

Ég legg til að Landsbankinn ráði til bankans 15 til 20 erlenda sérfræðinga í bankarekstri og noti þá síðan til að kenna íslenskum starfsmönnum Landsbankans hvernig menn reka alvöru banka. Þá er kannski von til þess að bankinn verði rekinn sem banki og starfsmenn hans hætti að þvaðra í fjölmiðlum um mál sem þeir hafa ekki gripsvit á.  

Mynd: Útihús í Melasveit.

 

Athugasemdir

[Matthías Ásgeirsson, 14.10.2009 kl. 12:38]

Af hverju ætti Landsbankinn að ljúga til um þetta?  Hafa þeir ekki frekar hag að því að ástandið á íbúðamarkaði lagist?

[Friðrik Hansen Guðmundsson, 14.10.2009 kl. 12:57]

Jú, ég hefði haldið að þeir eins og aðrir hefðu hag af því að það losnaði um fasteignamarkaðinn, en það er ekki að marka, það er ákaflega fátt í gjörðum og athöfnum Landsbankans á undanförnum misserum og árum sem ég hef skilið.

Þetta útspil þeirra að tala niður þennan markað og staðhæfa að eins árs lager af íbúðum dugi í 4 til 5 ár er eitt af því mörgu sem Landsbankinn hefur gert og sagt og ég skil ekki.

[Gísli Gunnlaugsson (IP-tala skráð) 14.10.2009 kl. 13:00]

Af hverju ættu bankamenn að hafa eitthvað vit á þessu.  Þeir hafa ekkert meira vit á þessu heldur en blaðamenn eða sjómenn.  Ég held að bankastofnanirnar ættu að fara að sinna sínum störfum og láta aðra í friði.

[Matthías Ásgeirsson, 14.10.2009 kl. 13:19]

Þú hefur að sjálfsögðu rétt á því að andmæla þessum tölum og setja fram þínar eigin, en þú verður þá að setja fram rök með því líka.  Þú skrifar t.d.

Ef meðalverð fullbúinna íbúða er 36,5 milljónir þá samsvarar þessi fjárfesting 2.000 íbúðum. 

Þetta byggir á að fjárfesting í óseldum íbúðum sé ákveðin tala.  Ég skil reyndar ekki af hverju forsendur hennar eru heilagar en hvað um það.  Hvað þarf meðalverðið að vera lágt til að þetta samsvari  3000 íbúðum?   Um 24 milljónir.  Er það ekki nær því að vera eðlilegt verð fyrir íbúð? 

Þetta útspil þeirra að tala niður þennan markað

Í útvarpsfréttum í hádeginu var formaður félags fasteignasala að segja það sama. 

Getur verið að það sé einfaldlega eitthvað til í þessu?

[Friðrik Hansen Guðmundsson, 14.10.2009 kl. 14:26]

Verð á nýjum fullbúnum íbúðum hefur legið milli 300.000 til 400.000 kr/m2. Það gerir 30 til 40 milljónir fyrir 100 m2 íbúð. Þetta verð hefur reyndar farið þetta lækkandi.

24 milljónir fyrir nýja íbúð, það eru einhverjar tveggja herbergja íbúðir. Það er ekki hægt að reikna með að þessar 2000 til 3000 íbúðir séu allar tveggja herbergja er það? Inni í þessum 73 milljörðum Dags, eru líka parhús, raðhús og einbýlishús.

Ég heyrði ekki það sem formaður félags fasteignasala sagði í útvarpinu, væntanlega að markaðurinn væri frosinn og ef ekkert myndi gerast og markaðurinn þiðnaði ekki upp þá gætu þessar 2000 til 3000 íbúðir, þessar árbirgðir okkar af íbúðum, með sama áframhaldi dugað okkur næsta aldarfjórðunginn.

Það hafa mörg börn fæðst frá því markaðurinn fraus hausti 2007. Það eru mörg dánarbú sem þarf líka að gera upp. Það hafa margir gengið í hjónaband á síðust tveim árum, eins hafa margir skilið. Allt kalla þessar breytingar í lífi fólks á kaup og sölu eigna. Að halda þessum markaði í frosti með lítilli og takmarkaðri lánafyrirgreiðslu ásamt algjörri vanþekking bankana á þessum markaði eins og afhjúpast í þessari umfjöllum Landsbankans er einmitt það sem við þurfum ekki á að halda.

Þetta endar bara á einn veg, stíflan brestur og hér verður allt vitlaust aftur, verð hækkar og byggingaaðilar neyðast til að hefja á ný stórfelldan innflutning á erlendu vinnuafli til að anna eftirspurn.

Og þú Matthías kemur með engin rök, svarar ekki og gagnrýnir ekki þau rök sem ég hef lagt á borðið, en spyrð í tvígang hvort það sé eitthvað til í þessu hjá bankanum.

Lestu greinina mína aftur og gerðu það hægt í þessa sinn. Tölurnar mínar getur þú fengið staðfestar með því að fara inn á vef Hagstofunnar.

Kynntu þér síðan málin hjá þeim arkitektum, skipulagfræðingum, verkfræðingum og félagsfræðingum sem hafa komið að því að vinna svæðisskipulag og aðalskipulög fyrir sveitarfélög landsins. Spurðu þessa sérfræðinga um mannfjöldaspár, byggðaþróun og um grunninn sem svæðisskipulagið hér að Höfuðborgarsvæðinu byggir ár. Kynntu þér síðan málin hjá skipulagsfulltrúum og byggingarfulltrúum  þessara sveitarfélaga og hjá þeim kjörnu fulltrúum sem sitja í skipulagsnefndum þessara sveitarfélaga. Þetta fólki getur allt upplýst þig um og staðfest að mikil þörf er á nýjum íbúðum eigi að sinna þessu unga fólki sem er að koma út á fasteignamarkaðinn.

Og þó menn taki ákvörðun um að ætla ekki að sinna þessu unga fólki og loka byggingariðnaðinum eins og gert hefur verið síðustu tvö ár þá er þetta það vitlausasta sem hægt er að gera. Menn eru þá bara að búa til stíflu sem mun bresta eftir ákveðinn tíma og afleiðingarnar þekkjum við allt of vel.

[Matthías Ásgeirsson, 14.10.2009 kl. 14:39]

Verð á nýjum fullbúnum íbúðum hefur legið milli 300.000 til 400.000 kr/m2. Það gerir 30 til 40 milljónir fyrir 100 m2 íbúð. Þetta verð hefur reyndar farið þetta lækkandi.

Og mun halda áfram að lækka.  Kíktu á þróun fasteignaverðs.  Af hverju ætti verð á fermetra að vera tvöfaldur byggingakostnaður þegar framboð er meira en eftirspurn?

Auk þess lítur hjá hjá því að þessi tala gildir bara um nýjar óseldar íbúðir, einnig eru fjöldi íbúða á sölu sem ekki eru nýjar.

Og þó menn taki ákvörðun um að ætla ekki að sinna þessu unga fólki og loka byggingariðnaðinum eins og gert hefur verið síðustu tvö ár þá er þetta það vitlausasta sem hægt er að gera.

Það hefur enginn lokað byggingariðnaðinum, eftirspurn hefur einfaldlega hrunið og byggingaraðilar standa uppi með óseldar íbúðir - margir gjaldþrota.  Hvað eiga menn að gera, byrja að byggja meira til að lífga þetta við? :)

Þetta fólki getur allt upplýst þig um og staðfest að mikil þörf er á nýjum íbúðum eigi að sinna þessu unga fólki sem er að koma út á fasteignamarkaðinn.

Af hverju setur þú ekki fram rök þessa fólks ef þau eru svona skýr? 

Mér finnst óskaplega undarlegt ef þú heldur að einhver sé viljandi að reyna að fyrsta fasteignamarkaðinn hér á landi.  Þú getur fengið lán til að kaupa fasteign en vandamálið er að vextirnir eru háir.  Það kaupir einfaldlega enginn á því verði sem stendur til boða í dag.  Því þarf verðið að lækka töluvert.

Í forsendur þínar vantar einnig brottflutning af höfuðborgarsvæðinu en skv. fréttum hafa um á fjórða þúsund manns flutt frá höfuðborgarsvæðinu út á land síðustu mánuði.

Og þú Matthías kemur með engin rök, svarar ekki og gagnrýnir ekki þau rök sem ég hef lagt á borðið, en spyrð í tvígang hvort það sé eitthvað til í þessu hjá bankanum.

 Voðalega eiga mogglingar erfitt með sig ef einhver gagnrýnir málflutning þeirra.  Þetta er ekki verndað umhverfi :)  Ég benti á atriði sem mér þykja vafasöm í þessum pistli, það var allt.

Þú ert einfaldlega með frekar glórulausar dylgjur um fjármálastofnun og verður að sætta þig við að ég geri við það ósköp saklausar athugasemdir.

Það hafa mörg börn fæðst frá því markaðurinn fraus hausti 2007. Það eru mörg dánarbú sem þarf líka að gera upp. 

Þú bendir sjálfur á galla í þínum málflutningi, markaður íbúða samanstendur ekki bara af nýjum íbúðum heldur einnig gömlum, t.d. úr dánarbúum.

Á Landsbankinn eða hinir bankarnir að setja milljarða í nýbyggingu íbúðarhúsnæðis núna?  Þú hlýtur að vera galinn

[Friðrik Hansen Guðmundsson, 14.10.2009 kl. 15:27]

Takk fyrir þetta Matthías, nú líst mér betur á þig.

Ég er sammála þér með eftirfarandi:

Það hefur enginn lokað byggingariðnaðinum, eftirspurn hefur einfaldlega hrunið og byggingaraðilar standa uppi með óseldar íbúðir.

og þessu

Þú getur fengið lán til að kaupa fasteign en vandamálið er að vextirnir eru háir.

Ég skil hins vegar ekki þessa:

Það kaupir einfaldlega enginn á því verði sem stendur til boða í dag.  Því þarf verðið að lækka töluvert.

Stærstur hluti allra fasteignakaupa, þá er fólk að stækka eða minnka við sig húsnæðið. Það kaupir "dýra" fasteign en það er líka að selja "dýra" fasteign. Þetta vandamál sem þú nefnir snýr fyrst og fremst að þeim sem eru að kaupa í fyrsta sinn. Þess vegna nefni ég það að það þarf að aðstoða það fólk til að kaupa sína fyrstu íbúð.

Þar fyrir utan er fasteignaverð á Íslandi, mælt í evrum, dollar eða dönskum krónum, fáránlega lágt.

Það sem Landsbankinn og hinir bankarnir eiga að gera er það sem alltaf á að gera þegar gefur á bátinn, "að halda sjó". Að hlaupa frá borði og skilja skip og áhöfn eftir eldsneytislausa úti á rúmsjó er ekki leiðin út úr þessu.

Um leið og það verða skapaðar hér aðstæður með eðlilegri lánafyrirgreiðslu þá fer fasteignamarkaðurinn strax í gang. Fólk byrjar þá að kaupa og selja íbúðir. Það má ekki gleyma því að kreppan hefur lítið snert 2/3 fólks í þessu samfélagi. Um leið og fasteignamarkaðurinn fer af stað þá seljast þessar íbúðir upp á einu til tveim árum.

Ég er sammála þér í því að það á ekki að leggja fé í að byrja á nýjum íbúðum í dag. Verkefni dagsins í dag er tvennskonar.

• Finna leiðir í samstarfi við lífeyrissjóði og Íbúðalánasjóð að bjóða upp á nýjungar og hagstæð langtímalán á íbúðalánamarkaði sem setja fasteignamarkaðinn aftur í gang.
• Ljúka þeim íbúðum sem þegar eru í byggingu.

Þegar þetta tvennt er komið á skrið þá er rétt að fara að huga gerð nýrra íbúða.

[Sigurður Jón Hreinsson, 14.10.2009 kl. 16:20]

Sæll Friðrik.

Hvað hefur þú fyrir þér í þessari fullyrðingu; "Um leið og fasteignamarkaðurinn fer af stað þá seljast þessar íbúðir upp á einu til tveim árum."  Á svæðum sem fólki fækkar á, er ekki markaður fyrir allar þær íbúðir sem fyrir eru, hvað þá nýjar.

[Friðrik Hansen Guðmundsson, 14.10.2009 kl. 16:57]

Sæll Sigurður

Um leið og byggingamarkaðurinn hér á Höfuðborgarsvæðinu er settur í gang. Hann þarf 3 til 4 milljarða á mánuði, hvort sem það er við að klára eitthvað af þessum íbúðum sem stöðvuðust þegar bankarnir urðu fjárvana eða við að byggja sjúkrahús, skóla, íþróttahús eða annað þá ekki bara hættir þessi fækkun fólks hér heldur munu þeir iðnaðarmenn sem nú eru staddir á Grænlandi, Noregi eða annarstaðar koma strax heim.

Vandamálið í dag liggur í því að það býðst engin eðlileg fjármögnun til kaupa á húsnæði.

Ef við bara horfum á markaðinn með notað húsnæði þá þarf nánast ekkert fjármagn inn í hann. Þar er fólk aðallega að skiptast á eignum. Til að setja viðskipti með eignir í gang þarf ekki að koma til mikið fé heldur góð langtíma fjármögnun. Þess vegna lán til 80 ára eins og eru á boðstólum í Danmörku.

Það væri verðugt verkefni fyrir eitthvað af þessu hugmyndaríka fólki í bönkunum að leysa þessa heimagerðu kreppu okkar á fasteignamarkaðnum og koma með lausnir sem duga.

Það er nú þegar búið að svelta og frysta fasteignamarkaðinn í tvö ár. Margir vilja fara að skipta um húsnæði. Þessi þörf eykst eftir því sem þetta frost varir lengur. Við erum búin að fara oft í gegnum þetta. Eftir frost á markaði í tvö ár og það koma úrræði sem gerir fólki kleyft að kaupa og selja þá fer allt á fullt. Ef þetta frost varir í tvö ár í viðbót, þá verður hér allt vitlaust þegar það gerist.

[Baldur Fjölnisson, 14.10.2009 kl. 20:41]

Einfaldasta og raunar eina vitræna leiðin til að koma kaupum og sölum í gang er augljóslega að lækka verð á þessum markaði. Offramboðið er geigvænlegt og mætti í byrjun reyna þetta 200 þús. á fm. að meðaltali og síðan 100-150 þús ef það gengur ekki. Markaður sem "ofverðlaunar" á ómögulegum forsendum mun að sjálfsögðu "refsa" jafn harðlega þegar blaðran springur.

[Sigurður Jón Hreinsson, 14.10.2009 kl. 21:26]

Ef menn halda að offramboð á íbúðum sé besta lausnin til að þýða húsnæðismarkaðinn, þá er ekki skrítið að landið sé á hausnum.  Með því að verðfella íbúðamarkaðinn er verið að binda í fasteignir sem eru miklu meira veðsettar en virði þeirra yrði við sölu.  Með því má því frekar segja að verið væri að botnfrysta markaðinn.

En eftir sem áður stendur eftir spurningin, hvaða fólk á að koma í þessar fasteignir og hvað á það að vinna við ???????

Varðandi lausnir á fjármögnun íbúðarhúsnæðis, er lausnin einföld.  Með sameiginlegu verkefni ríkissjóðs, lífeyrissjóða og seðlabanka, má auðveldlega koma á fót banka til húsnæðiskaupa, sem sniðinn yrði að þörfum þegna landsins en ekki fjármagnseigenda.  Lífeyrissjóðirnir legðu bankanum til lánsfé og bankinn lánaði eins og aðrir bankar, út tífalda þá upphæð.  Seðlabankinn fengi ekki vexti á það sem hann legði til, en fengi féð endurgreitt á einhverjum árum.  Með því sköpuðust forsendur fyrir það að vextir á lánum til íbúðakaupa, yrðu eitt til tvö prósent og án verðtryggingar.  Þannig fengju lífeyrissjóðirnir tíu til tuttugu prósenta ávöxtun.  Með slíkri ávöxtun er óþarfi að hugsa um verðtryggingu.

[Sigurður Jón Hreinsson, 14.10.2009 kl. 21:28]

Sé að það vantaði  inn eitt mikilvægt orð;

Með því að verðfella íbúðamarkaðinn er verið að binda fólk í fasteignir sem eru miklu meira veðsettar en virði þeirra yrði við sölu.

[Friðrik Hansen Guðmundsson, 14.10.2009 kl. 21:55]

Sæll Sigurður

Frá því bankarnir hættu að lána til íbúðarkaupa haustið 2007 og fasteignamarkaðurinn fraus þá hafa um 8.600 manns fagnað 25 ára afmælinu sínu. Í tvö ár hefur ekki verið nokkur leið fyrir þetta unga fólk að kaupa sér íbúðir. Margt af þessu fólki hóf sambúð og eignaðist börn á þessum tveim árum.

Ef þessi tillaga þín af nýrri tegund af lánum yrði að veruleika þá vantar ekki unga fólkið til að fylla þessar íbúðir. Og þessar íbúðir anna ekki þörfinni nema í eitt eða tvö ár. Ef svona lán væru fyrir hendi þá myndu þessar íbúðir allar seljast á nokkrum vikum.

Við hvað á þetta fókl að vinna spyrð þú. Atvinnuleysið er nú ekki nema rúm 7% og aðallega í þjónustugreinum eins og byggingariðnaði og verslun. Um leið og eitthvað gerist hér og það þarf ekki mikið til þá hverfur þetta litla atvinnuleysi eins og dögg fyrir sólu. Við verðum að átta okkur á því að þetta eru í öllu alþjóðlegu samhengi í raun bara örfáir einstaklingar sem eru hér atvinnulausir.

[Sigurður Jón Hreinsson, 14.10.2009 kl. 23:20]

Sæll Friðrik.

Þessi hugmynd um íbúðalán, gengur út á það að öll íbúðalán á Íslandi færu undir þennan nýja banka, með samskonar skilmálum, annað væri mismunun.  Og þetta er vel hægt, menn þurfa bara að opna augun fyrir þessu.

Varðandi alla þá einstaklinga sem orðið hafa 25 ára síðustu tvö ár og eignast börn, þá býr þetta fólk ekki heima hjá mömmu og pabba í dag.  Það er á leigumarkaðinum.  Þess vegna er ekki rétt að segja að þessar auðu íbúðir myndu fyllast, nema að viðurkenna að aðrar íbúðir tæmist í staðinn.  Og í þeim skilningi er eðlilegt að leigu og sölumarkaðir leiti jafnvægis.

En varðandi vinnumarkaðinn, þá er ekki hægt að reikna með því að byggingariðnaður eða verslun haldi uppi atvinnustigi og hagvexti.  Til þess þarf mikið fleiri og stöðugri undirstöður.

[Jóhann F Kristjánsson (IP-tala skráð) 14.10.2009 kl. 23:54]

Áhugavert blogg og umræður.

Landsbankinn er örugglega með þetta á tæru, gögnin er hægt að fá hjá íbúðalánasjóði, félagi fasteignasala og úr kerfum bankanna sjálfra. En athugaðu, þarna er bara verið að tala um nýjar og óseldar. Mikið magn er af eldra húsnæði líka óselt, bæði á höfuðborgarsvæðinu og út um land allt. Það þarf ekki að ferðast mikið um borgina til að sjá þessi eldri hús öll sem standa tóm. Áhugavert er að straumurinn virðist liggja núna út á land aftur eftir áratug fólksflótta sjá t.d. þetta. Allt að 3000 manns fluttu af landsbyggðinni til höfuðborgarsvæðisins árlega og hafa gert síðustu 10 árin. Ef staðan er sú að nærri 3000 nýjar íbúðir eru lausar, einhver hundruð eða þúsund eldri íbúðir líka, og straumur fólks er að snúast við, þá er nokkuð ljóst að verð á húsnæði á ekki eftir að taka nein risastökk uppávið næstu mörg árin.  Ég myndi amk ekki halda niðri í mér andanum í þeirri von að verð hækki.

[Bjarki (IP-tala skráð) 15.10.2009 kl. 09:33]

Ég ætla ekki að blanda mér í þessa húsnæðisumræðu að öðru leyti en því að leiðrétta misskilning sem komið hefur upp um að brostinn sé á fjöldaflótti út á land frá höfuðborgarsvæðinu. Misskilningur sem virðist koma til af einhverri talnablindu hjá blaðamanni DV. Þessi tala sem nefnd er, 4.138, á við alla sem flutt hafa frá höfuðborgarsvæðinu á fyrri hluta árs 2009. Þar á meðal þá sem flutt hafa til útlanda. Reyndar er ca. 70% af þessum fjölda á leið til útlanda. Það sem er jafnvel sorglegra í þessum misskilningi er að það er ekki tekið tillit til þeirra sem hafa flutt til höfuðborgarsvæðsins á sama tíma. Þeir eru 3.487 og þess vegna eru brottfluttir umfram aðflutta aðeins 651. Það er nokkur brottflutningur frá höfuðborgarsvæðinu og alger viðsnúningur frá því sem verið hefur, en fjarri þessum fjöldaflótta sem talað er um.

Ef aðeins er tekið tillit til innanlandsflutninga þá eru þeir ennþá fleiri sem flytja frá landsbyggðinni til höfuðborgarsvæðisins en öfugt og ef litið er á einstök landsvæði þá áttu mestu flutningarnir innanlands á fyrrihluta árs 2009 sér stað frá Suðurnesjum og til höfuðborgarsvæðisins.

Náttúruleg fólksfjölgun á höfuðborgarsvæðinu (þ.e. fæddir umfram látna) er meiri en nóg til þess að stoppa upp í gatið sem brottflutningurinn skilur eftir sig og því hefur fólki fjölgað lítillega á höfuðborgarsvæðinu síðan kreppan hófst en ekki fækkað. Rétt skal vera rétt.

[Friðrik Hansen Guðmundsson, 15.10.2009 kl. 12:14]

Sæll Sigurður

Ég tók nú bara sem dæmi 25 ára aldurinn. Það hafa líka 8.600 manns haldið upp á tvítugsafmælið sitt á þessum tveim árum frá því fasteignamarkaðurinn fraus. Það er alveg sama hvernig þú reynir að snúa þér út úr þessu, það streyma um 4.300 manns á hverju ári inn á fasteignamarkaðinni. Menn hafa byggt og selt 2.730 íbúðir að jafnaði á ári síðustu tíu árum. Það standa milli 2.000 til 3.000 nýjar íbúðir óseldar í dag, þetta eru um ársbirgðir af íbúðum og þær munu allar seljast þegar lánskjör batna.

Sæll Jóhann

Landbankinn er jafn mikið með þetta á tæru og Icesave. Bankinn var í þannig rekstri að nú þegar verið er að gera hann upp þá eru niðurstaðan mikill áfellisdómur yfir öllum rekstir hans. Kaupþing og Glitnir eru að koma miklu betur út en Landbankinn. Þegar þeir fara svo af stað í fjölmiðlum og fullyrða að eðlilegar árs birgðir af íbúðum dugi samfélaginu í 4 til 5 ár þá er bara ekki hægt að sitja þegjandi yfir svona bulli. Verði farið að þeirra ráðum og ekkert byggt í 3 til 4 ár þá verður hér allt vitlaust á ný þegar allir fara af stað að kaupa íbúður og byggingariðnaðurinn verður enn á ný keyrður á hliðina í botnalusri vinnu og verkefnum með tilheyrandi verðhækkunum og innflutningu á erlendu vinnuafli.

 Sæll Bjarki

Þakka þér fyrir þetta. Ég trúði ekki þessum tölum sem menn voru að bera hér á borð og ætlaði að fara að afla mér gagna til að hrekja þessar tölur. Þú hefur sparað mér ómakið.