Icesave kosningin snýst um lífsýn bóndans og víkingsins.

Það eru áhöld um það í samfélaginu hvort þjóðin standi sterkari eftir taki hún á sig auknar skuldbindingar og lán með því að samþykkja Icesave-2. Hér skiptast menn í tvo hópa.

Annar hópurinn heldur því fram að því meira af skuldbindingum og lánum sem þjóðin tekur því betra verði orðspor hennar í útlöndum og með auknum lánum verði hún líklegri til að geta staðið í skilum.

Hinn hópurinn heldur því fram að því minna af skuldbindingum og lánum sem þjóðin tekur því betra verði orðspor hennar í útlöndum og með lægri lánum verði hún líklegri til að geta staðið í skilum.

Um þetta er það mikill ágreiningur að efnt hefur verið til þjóðaratkvæðagreiðslu 6. mars nk. til að fá úr því skorið hvora leiðina þjóðin vill fara. 

Á Landnámsöld voru forfeður okkar ýmist bændur eða víkingar. Í eðli sínu snýst þessi þjóðaratkvæðagreiðslan um lífsýn bóndans og víkingsins.

• Víkingurinn vill taka meiri lán og taka á sig meiri skuldbindingar því víkingurinn telur að því meiri sem lánin eru því auðveldara verði að borga af þeim.
• Víkingnum er umhugað um orðspor sitt í útlöndum, vill láta tala vel um sig og vill líta vel út þegar hann spókar sig um í höllum erlendra höfðingja.

 

• Bóndinn vill ekki taka meiri lán, lán sem hann er ekki 100% viss um að geta staðið við að greiða af. Bónda finnst nóg komið af lántökum og skuldbindingum. Nú er mál að linni.
• Bóndinn blæs á eitthvað ímyndað orðspor í útlöndum. Bóndi veit að þar þarf ekkert orðspor til þess að selja fisk, veitingar og ál.

Á hitt ber að líta að á meðan ekki er deilt um alvarlegri hluti en peninga og fjármál á Íslandi þá erum við í góðum málum.

Mynd: Göngustígurinn upp Esju á vetrarsólstöðum.

 

Styðji Ísland af öllum mætti verði útkoman nei

Athugasemdir

[Árni Gunnarsson, 21.1.2010 kl. 17:31]

Hnitmiðuð niðurstaða: " Bóndi veit að þar þarf ekkert orðspor til þess að selja veitingar fisk og ál."

Stundum er hægt að leysa erfið mál með einföldustu niðurstöðunni.

[Finnur Bárðarson, 21.1.2010 kl. 17:43]

Bóndinn blessaður í dag fær nú nánast allt sitt frá ríkinu eða skattgreiðendum og þarf lítt að hugsa um hagfræði

[Sigurður Baldursson, 21.1.2010 kl. 20:56]

Merkilegt hvað Finni Bárðarsyni er illa við bændur !!

[Hólmfríður Bjarnadóttir, 21.1.2010 kl. 23:53]

Sæll Friðrik. Þú setur þetta þannig upp að við getum valið. Er þó ekki sammála þér um hvað valið stendur í raun. Að samþykkja lögin sem forsetinn hafnaði er ódýrari kosturinn kosturinn af 2 rándýrum. Ef höfnum laganna verður ofan á þá mun það kosta okkur þau lífskjör sem þjóðin hefur náð með áratuga vinnu. Með samþykkt laganna verður hægt að koma uppbyggingunni af stað og við munum ná okkur á strik að nýju á nokkrum árum.

[Ásthildur Cesil Þórðardóttir, 22.1.2010 kl. 01:11]

Ég er eins og bóndinn. Ég tel að virðingin felist ekki í undirlæguhætti og skriði fyrir kúgurum.  Ég hef aldrei heyrt um það að kúgarar beri virðingu fyrir þeim sem leggjast flatir fyrir þeim.  Þeim sem slíkt gera eru fyrirlitnir umfram allt.  Aftur á móti er ekki hægt annað en að bera virðingu fyrir þeim sem standa í lappirnar og segja ég vil réttlæti og ég greiði þeir ekki krónu meira en ég þarf.  En það sem ég þarf að greiða mun ég standa við.

[Hrólfur Þ Hraundal, 22.1.2010 kl. 09:38]

Það má líka stilla þessu upp sem góðum bónda og vondum.  Ingólfur var góður bóndi og vann að uppbygingu með þrælum sínum og var rausnalegur við þá.  Hjörleifur lét sína þræla eina og dáðist að voppnum sínum á meðan.  þið vitið hvernig fór.

[Jón Lárusson, 22.1.2010 kl. 09:54]

Þakka þér fyrir þennan samanburð Friðrik. Það sem ég hjó aðallega eftir hjá þér var þó þetta í lokin "Á hitt ber að líta að á meðan ekki er deilt um alvarlegri hluti en peninga og fjármál á Íslandi þá erum við í góðum málum", en þetta tel ég vera merg málsins hjá okkur Íslendingum og reyndar fleirum. Peningarnir hafa verið teknir í einhverja guðatölu og þeim búin einhver gildi sem í raun skipta ekki neinu máli þegar maður horfir yfir líf sitt. Það er að mínu viti kominn tími til að við áttum okkur á því hvar hin raunverulegu verðmæti liggja.

Hólmfríði vil ég hins vegar benda á það að ef við samþykkjum Icesave, þá verður ekki nein uppbygging, það er málið. Það hefur aldrei verið biðröð af erlendu fjármagni sem hefur viljað koma til Íslands og það mun ekki sjá frekari ástæður til að koma til lands sem getur ekki staðið við fyrirliggjandi skuldbindingar. Ég skil hins vegar að þú sért þessarar skoðunar, enda hefur þessum áróðrir verið haldið að okkur slíkt að Göbbels hefði verið stolltur af. Það er ósköp einfaldlega þannig að við munum ekki geta staðið undir þessum skuldbindingum og allt tal um heiðarleika því hjáróma mjálm aumingja sem ekki hafa þor til að standa gegn óréttlátum kröfum sem settar eru fram í formi hótana.