Á þjóðin nú að borga skuldir óreiðumanna?

Ekki hljómar þessi lausn á Icesave vel í mín eyru. Með þessum gjörningi mun ábyrgðin á Icesave lenda með fullum þunga á þjóðinni. Ég hélt það væri það sem menn ætluðu einmitt ekki að gera. 

 

Í þessari frétt kemur reyndar ekki fram hvað nákvæmlega er verið að semja um. Eins og ég skil þetta hafa menn verið að tala um þrjár leiðir til að loka þessu Icesave máli.

1. Ríkið tryggir Icesave innistæður með þeim fjármunum sem liggja í sérstökum tryggingasjóði sem innlánsstofnanir lögðu fé í. Þessi sjóður er til að tryggja innistæður innlánseigenda skv. Íslenskum lögum.
2. Ríkið tryggir rúmar 20.000 evrur á hverjum innlánsreikningi sem er skuldbinding okkar skv. reglum ESB.
3. Ríkið tryggir allar innistæður í Icesave að fullu óháð upphæð. Geir Haarde taldi sig hafa umboð til þess sem forsætisráðherra að skuldbinda þjóðin fyrir þúsund milljarða þegar hann hélt sjónvarpsávarp í haust í beinni útsendingu og lofaði að ríkið myndi tryggja allar innistæður í Íslenskum bönkum. Og ég sem hélt að Alþingi eitt hefði fjárveitingarvaldið en ekki einstaka þingmenn þó þeir gegni tímabundið ráðherrastöðu. 

Ekki kemur fram í fréttinni hvaða leið af þessum þrem er verið að semja um.

Ég neita að trúa því að Íslenska samninganefndin ætli að láta þjóðina taka á sig þessar Icesave skuldbindingar að fullu samkvæmt lið 3 hér að ofan. Ég neita að trúa því að Íslenska samninganefndin ætli að láta þjóðina taka á sig ábyrgðir umfram þessar 20.000 evrur á hverjum innlánsreikning. Best væri að halda sig við Íslensku lögin, samanber lið 1) hér að ofan og láta eignir Landsbankans + það sem er í tryggingasjóð innlánsstofnanna upp í þetta og búið.

Ekki samþykkja að þjóðin sé veðsett út af þessu Icesave sukki. Ekki láta skuldir vegna Icesave falla á almenning á Íslandi.

Mynd: Í túninu á Hrafnabjörgum, Svínadal.

 

Takmarka ábyrgð vegna Icesave

Skipun AGS, borgið niður erlendar skuldir með því að skera niður velferðarkerfið.

Skipun Alþjóða gjaldeyrissjóðsins, AGS, er óbreytt og skýr. Borgið niður erlendar skuldir ykkar með því að skera niður velferðarkerfið. Líka hefur komið fram í fréttum að AGS krefst þess að samfélagið verði áfram mergsogið með óheyrilegum stýrivöxtum sem eru langt, langt yfir þeim vöxtum sem allar aðrar vestrænar þjóðir búa við. Þá vilja þeir einnig viðhalda gjaldeyrishöftunum sem kemur í veg fyrir alla nýja erlenda fjárfestingu í landinu.

Með þessum áherslum AGS þar sem gjaldeyristekjur þjóðarinnar eru teknar í afborganir af erlendum lánum, atvinnulífið og almenningur er mergsoginn sem svívirðilegum vöxtum og skera á ríkisútgjöld niður um 1/3 þá er kreppan rétt að byrja hér á Íslandi og ekki mun sjá hér til sólar fyrr en eftir áratug eða svo.

Ég trúi því ekki að stjórnvöld ætli að halda áfram á þessari braut. Hver svo sem gerði þessa áætlun sem AGS keyrir eftir þá mun þjóðin aldrei sætta sig við þessa framvindu mála.

Að skera velferðarkerfið niður um 1/3 og standa á sama tíma við allar skuldbindingar við erlenda lánadrottna mun aldrei verða samþykkt. Ætli ríkisstjórnin virkilega að keyra þetta prógramm AGS fram þá mun allt loga hér í óeirðum.

Það sem á að gera nú er að semja um að frysta greiðslur af öllum erlendum lánum í þrjú til fimm ár. Ef samningar nást ekki um það á samt að hætta að borga af þessum lánum. Lækka síðan stýrivexti í 2% og koma hjólum atvinnulífsins í gang. Þegar ríkissjóður fer aftur að skila hagnaði á að byrja að borga af þessum erlendu lánum okkar.

Að ríkið skuli vera að borga á fullu af erlendum lánum sínum í miðri þessari djúpu kreppu þegar tekjur ríkissjóðs hafa minnkað svona gríðarlega er eitthvað sem verður að endurskoða.

Mynd: Hafnarfjarðarhöfn

 

Ísland stendur undir skuldum

Bankarnir ríki í ríkinu sem almenningur vantreystir.

Bankarnir halda að sér spilunum og vilja ekki láta neinn sjá á þau. Almenningi og réttkjörnum fulltrúum hans er haldið í myrkrinu meðan bankamenn landsins fá óáreittir að stunda sín viðskipti. Það virðist að bankarnir óttast inngrip löggjafarvaldsins fái almenningur og fulltrúar hans réttar upplýsingar um stöðu mála.

Engar stofnanir samfélagsins njóta minna trausts en bankarnir. 4% til 6% þjóðarinnar treystir bönkunum skv. skoðunarkönnunum sem gerðar hafa verði á síðustu mánuðum.

Það verður að taka á þessu vandamáli sem þetta vantraust er. Það gengur ekki að þessari mikilvægu þjónustu sem fjármálaþjónusta er sé sinnt af fyrirtækjum sem almenningur ber ekkert traust til.

Það verður að höggva þetta bankakerfi upp, búa til nýtt bankakerfi með nýju fólki svo skapa megi traust um þessa starfsemi.

Ég hefði viljað sjá eftirfarandi breytingar gerðar:

• Stóru ríkisbankarnir þrír verði lagðir niður og einn nýr banki búinn til. Þessi eini ríkisbanki ásamt Sparisjóðunum og öðrum smáum fjármálafyrirtækjum sem eru starfandi í dag er án efa miklu meira nóg til að sinna Íslenska markaðnum næsta áratuginn. 
• Til þessa nýja ríkisbanka verði ráðið nýtt fólk. 
• Þessi ríkisbanki verði í eigu ríkisins næstu 5 til 10 árin eða þar til öllum málaferlum verður lokið. Málaferlum sem fyrirséð að fara í gang þegar neyðarlögin falla úr gildi eftir 16 mánuði. Hvorki þessi banki né aðrir bankar á íslandi verða nein söluvara fyrr en öllum uppgjörum og málaferlum er verður lokið. Þetta ferli mun án efa taka mörg ár.

Það á að vera forgangsatriði ríkistjórnarinnar að sjá til þess að hér sé starfandi bankakerfi sem almenningur getur treyst. Það er ekki nóg að gera það með því að hella fullt að peningum inn í banka sem enginn treystir.

Mynd: Við Deildartunguhver

 

Vill upplýsingar úr Wyman-skýrslu

Hvalveiðarnar enn ein mistökin

Það er ljóst að útgerðarmenn landsins geta alls ekki sætt sig við að ferðamannaiðnaðinum verði látið eftir að nytja hvalastofnana við landið.

Það er dapurlegt að horfa upp á enn ein mistökin eiga sér stað hér á landi í kjölfar bankakreppunnar.

Það grátlega við þetta er að málið snýst ekki um peninga. Þessar veiðar snúast ekki um að ná hagnaði út úr þessum veiðum. Það vita það allir sem vilja vita að þessar veiðar verða reknar með bullandi tapi því það er enginn til að kaupa af okkur þetta hvalkjöt.

Því miður snúast þessar veiðar um eitthvað allt annað en peninga.

Á örfáum árum hefur risið hér upp í landinu umfangsmikill iðnaður sem gengur út á það að sigla með ferðamenn út á hvalamiðin og sýna þeim þessa hvali sem þar halda sig.

Í fyrra fóru yfir 100.000 manns í slíkar hvalaskoðunarferðir. Það samsvarar því að þriðjungur þjóðarinnar hafi farið út á sjó að skoða hvali.

Útgerðarmenn virðast vera að fara á límingunum yfir því að verið sé að nýta miðin umhverfis landið til annarra hluta en veiða.

Ég er orðin algjörlega á móti þessum hvalveiðum. Hvalveiðar eru atvinnugrein gærdagsins. Hvalaskoðun er atvinnugrein framtíðarinnar. Tekjumöguleikar okkar eru margfaldir ef við veðjum á hvalaskoðun í stað hvalveiða.

Hvenær verður það í þessu samfélagi að hagkvæmnissjónarmið verða látin ráða för en ekki einstrengingsháttur og sérhagsmunir einstakra manna?

Ég skora hér með á stjórnvöld að stöðva þegar í stað þessar hvalveiðar, gera hvalskipin hjá Hval hf. upptæk og láta breyta þeim í hvalaskoðunarskip og gefa síðan eitt slíkt á hvern landshluta sem framlag ríkisins til uppbyggingar í ferðaþjónustu á sviði hvalaskoðunar.

Hættum síðan þessu bulli að ætla að fara að veiða hval þvert ofaní vilja alþjóðasamfélagsins.

Mynd: Við ósa Vatnsdalsár.

 

Fyrsta hrefnan veidd í kvöld

Einn háskóli er miklu meira en nóg.

Ég hefði haldið að það væri kapp nóg að vera með einn Háskóla á Íslandi. Þið verðið að fyrirgefa en ég sé ekki snilldina í því að reka hér tvo háskóla sem báðir eru að kenna verkfræði sem eru í 700 metra fjarlægð hvor frá öðrum í landi þar sem búa 300.000 manns . Til hvers? Hvað hagnast samfélagið á því að reka tvær rándýrar deildir sem eru báðar að kenna sömu greinina, sitt hvoru megin við flugvöllinn? Þessir skólar munu hvort sem er aldrei geta byggt upp þá rannsóknaraðstöðu sem nauðsynleg er til að þeir geti kennt nemendum sínum sómasamlega til meistaranáms. Hvað þá til doktorsnáms. Þannig má áfram telja hverja greinina á fætur annarri.

Menntamálaráðherrar undanfarinna ára hafa misst málefni þessara háskóla algjörlega úr böndunum. Fyrirséð var að um leið og tekjur ríkisins drægjust saman yrði að skera niður þetta bruðl.

Það sem ég hef þó mestar áhyggjur af eru gæði þeirrar kennslu sem allir þessir "sjálfstæðu" háskólar bjóða upp á. Hver hefur eftirlit með gæðum þeirrar kennslu sem þessir skólar eru að bjóða?

Einn lélegur háskóli á Íslandi mun leggja í rúst orðspor allra hinna háskólanna. Erlendis verður enginn greinarmunur gerður á Háskóla Íslands eða Háskólanum á Bifröst svo dæmi sé tekið. Ef einn háskólinn okkar bregst þá mun það spyrjast út um allt. Erlendis munu menn þá segja, "Háskólanám á Íslandi hefur hrakað gríðarlega og þessar háskólagráður þeirra eru í dag jafn mikils virði og krónan þeirra". Það er þetta sem ég hef áhyggjur af með alla þessa sjálfstæðu háskóla sem enginn veit hvað eru að gera. Það sem ég og fleiri óttast er að þetta nám margra þessara skóla sé í raun framlenging á menntaskólanáminu á viðkomandi stað en ekki raunverulegt háskólanám með þeim áherslum sem alvöru Háskólar hafa. 

Rétt er mat þessara finnsku sérfræðinga að við Íslendingar eigum í besta falli að einbeita okkur að tveim í mesta lagi þrem fræðasviðum. Háskólinn á að öðru leiti að einbeita sér að góðri almennri grunnkennslu í BS og BA námi. Meistaranám og doktorsnám sækja Íslendingar síðan erlendis. Þannig var Háskóli Íslands rekinn þar til fyrir  rúmum áratug eða svo.

Það hefur ekkert haft nema afturför í för með sér að mennta okkar unga fólk til meistaranáms og doktorsnáms hér heima. Þetta bankahrun er ekki síst afleiðing þessarar menntastefnu. Hefði allt þetta unga fólk okkar sem lokið hefur háskólanámi á síðustu 10 - 15 árum tekið sínar meistaragráður við erlenda háskóla þá er ég sannfærður um að þessi "bankakynslóð" okkar hefði aldrei keyrt bankana og samfélagið í þrot með þeim hætti sem raun varð á.

 

Mæla með tveggja háskóla kerfi

Njótum kreppuárana framundan.

Í framhaldi af því hruni sem orðið hefur þá þarf nýja hugsun til að takast á við þann raunveruleika sem við okkur blasir og mun blasa við okkur næstu árin. Þó hlutirnir gangi ekki á sama hátt og þeir hafa gert síðasta áratuginn þá er samt engin ástæða til þess að við getum ekki notið lífsins. Við verðum bara að gera það með aðeins öðrum hætti.

Nú þegar heilu atvinnugreinarnar eru hrundar og víða búið að draga verulega saman seglin þá erum við í raun að horfa á gerbreytt samfélag. Þessi kreppa er ekki neitt sem hverfur á einu eða tveim árum. Við erum að horfa upp á fimm til tíu ár ef ekki lengur þar til við komumst upp á svipað stig og var 2004 til 2006. Nú er það verkefni hvers og eins að fóta sig í þessu nýja umhverfi og njóta þessara kreppuára sem framundan eru.

Sú "blessun" sem kreppan er að færa okkur er aukinn frítími. Ef fólk notar þennan frítíma sjálfum sér og öðrum til ánægu þá munu kreppuárin framundan geta orðið að bestu árum ævinnar.

Nú og á næstu árum munu margir hafa tíma til að stunda allskonar tómstundir, sport og útivist. Margt skemmtilegt "sportið" tengist líka því að spara sér matarinnkaup. Það mega allir fara út á sjó og veiða sér í matinn. Margir gera það og eiga alltaf "heimaveiddan" fisk í frystikistunni. Aðrir fara og rækta kartöflur og grænmeti. Fjöldi fólks er á ferðinni þessa dagana að tína svartbaksegg sem mörgum þykja lostæti. Einhverjir eru búnir að koma sér upp þrem, fjórum hænum og eru alltaf með ný egg með morgunmatnum. Svona má áfram telja möguleikana sem nú opnast fjölda fólks með auknum frítíma.

Þar fyrir utan gefst svo tími til ótal margs annars sem hægt er að njóta. Má minna á listasöfnin, menninguna og allar ólesnu bækurnar.

Já, við eigum að gera komandi kreppuár að bestu árum ævinnar. Nú þegar við höfum eignast aukinn frítíma þá eigum að grípa tækifærið og njóta þessa frítíma.

Mynd: Smábátahöfnin á Akranesi.

 

Koma þarf í veg fyrir fjöldagjaldþrot fyrirtækja

Það er mikil hætta á að nú falli hvert fyrirtækið á fætur öðru í þeirri gjaldþrotahrinu sem gengur yfir. Við gjaldþrot þá verða alltaf fjöldi fyrirtækja og einstaklinga sem sem tapa fé. Slík töp ofaná slæmt árferði er ekki góður kokteill. Það er því skiljanlegt að menn óttist "dóminnáhrif" sem gætu þýtt enn fleiri gjaldþrot en ætlað var.

Fjöldagjaldþrot fyrirtækja er engum í hag. Nú þegar ríkið er með nær alla banka landsins á sínum vegum þá hlýtur að vera hægt að beita þeim í þeim tilgangi að takmarka það tjón sem þessi gjaldþrot eru að valda. 

 

Fjöldi fyrirtækja í ríkiseigu

Til Þingvalla á hestbaki.

Að ríða til Þingvalla í veðri eins og það var í dag er hreint ótrúleg upplifun. Við lögðum upp frá hesthúsahverfinu í Mosfellsbæ skömmu eftir hádegi í dag.

Við vorum búnir fyrr um daginn að fara með bíl og hestakerru til Þingvalla. Það var heitt í veðri svo við tókum okkur góðan tíma. Þetta var fyrsta dagleiðin þetta árið fyrir bæði menn og hesta. 

Við vorum tveir og höfðum fimm til reiðar. Þetta var rólegheita ferð sem tók okkur 8 tíma. Þegar komið var til Þingvalla var sprett af hestum, áð smá stund og síðan ekið í bæinn.

Að koma ríðandi til Þingvalla og ríða eftir þessum þúsund ára gömlu reiðslóðunum sem liggja með bökkum Öxarár fyrir utan allt annað sem maður sér og upplifir í svona ferð er eitthvað sem allir þeir sem hafa heilsu og getu til ættu að gera.

 

 

 

 

 

 

 

 

 

 

 

 

Glæsileg frammistaða hjá Jóhönnu.

Þetta er glæsileg niðurstaða. Ég óska Jóhönnu og samverkafólki til hamingju með frábæra frammistöðu.

 

Ísland í 2. sæti í Moskvu

Verður fagnað á Austurvelli í kvöld?

Flutningur Jóhönnu var frábær.

Ef við við vinnum þá verður án efa fagnað á Austurvelli fram á nótt.

 

Jóhönnu vel fagnað í Moskvu

Að gefa gömlu hefðum þingsins fingurinn.

Er einhvern tíma var þörf fyrir að standa vörð um þau gildi sem hafa gert okkur að þjóð og þann sameiginlega menningararf sem við eigum, þá er það nú.

Að snúa baki við þeim hefðum sem hafa tíðkast á elsta þingi heimsins á þeim ögurtímum sem við nú lifum er ekki hátterni sem ég kann að meta.

 

Óþarfi að blanda Guði inn í þinghaldið

Böðull Alþjóða gjaldeyrissjóðsins mættur til vinnu.

Það er ljóst að markmið Alþjóða gjaldeyrissjóðsins, AGS, með veru sinni á Íslandi er bara eitt: Tryggja hag erlendra lánadrottna.

Við verðum að átta okkur á því að "eigendur" AGS eru Seðlabankarnir í Evrópu og Bandaríkjunum. Þessir bankar eru að tapa gríðarlega á gjaldþroti íslensku bankanna.

Kaupþing var þriðja stærsta gjaldþrot sem orðið hefur í heiminum. Glitnir var það fimmta stærsta. Þessi gjaldþrot lenda með einum eða öðrum hætti á Seðlabönkum þessara landa í gegnum bankana sem eru að tapa sínu fé á Íslensku bönkunum. Þessir Seðlabankar sem standa að AGS bera ábyrgð á þeim bönkum sem eru að tapa miklu fé á íslensku bönkunum. Þessir erlendu Seðlabankar hafa orðið að dæla gríðarlegu fé inn í þessa banka sína vegna þessa taps.

Fulltrúi þessara erlendu Seðlabanka, starfsmaður AGS, er nú mættur hér til að tryggja hagsmuni eigenda sinna. Tilgangurinn sá eini að blóðmjólka samfélagið til að ná sem mestu upp í þetta gríðarlega tap.

Ástæða þess að böðull AGS vill halda hér óbreyttum stýrivöxtum er eingöngu sú að útvega Seðlabanka Íslands nægjanlegt fé til að hann geti borgað vexti af þeim lánum sem hann er í ábyrgð fyrir. Lækki menn stýrivexti eins og um hefur verið rætt niður í 2% til 3% mun Seðlabanki Íslands ekki geta staðið í skilum með greiðslur. Það vill AGS ekki að gerist. Böðli AGS er nokk sama þó hér fari allt í þrot. Þó þessir vextir verði þess valdandi að 80% allra fyrirtækja í landinu fari í gjaldþrot og helmingur þjóðarinnar missi húsnæði sitt. Bara að Seðlabanki Íslands greiði af lánum.

Að vera hér með gjaldeyrishöft um ókomin ár er á sama hátt eingöngu til þess að tryggja hag hinna erlendu lánadrottna. Þannig kemst Seðlabanki Íslands yfir allan þann gjaldeyrir sem kemur inn í landið. Með því að Seðlabankinn stjórnar hverri evru sem við fáum fyrir okkar útflutning þá tryggir það getu Seðlabanka Íslands til að greiða af erlendum lánum sínum. Böðli AGS er slétt sama þó þessi gjaldeyrishöft komi í veg fyrir alla nýja erlenda fjárfestingu í landinu því meðan þessi gjaldeyrishöft eru þá koma engir erlendir fjárfestar til landsins.

AGS ætlar að láta almenning og fyrirtækin á Íslandi með þessum hætti borga sem mest upp í kröfur erlendu lánadrottna bankana. Þeir ætla sér að þurrausa alla sjóði almennings og komast yfir allar okkar auðlindir. Þeir munu ekki hætta fyrr en þeir eru búnir að arðræna okkar og líkskjör hér orðin eins og var upp úr 1960.

Viðskiptaráðherra og fleiri áhrifamenn í stjórnsýslunni fullyrða að fyrsti hluti láns AGS hafi ekki verið hreyfður. Lánið liggi óhreyft á banka í Bandaríkjunum á 2% vöxtum. Við borgum hins vegar af þessu láni 7% vexti. Hvaða fjármálasnilli liggur þar á bak við skil ég ekki.

Þá hefur AGS ekki enn greitt út lán númer tvö. Það átti að greiðast út í lok febrúar.

Til hvers erum við að taka þessi lán frá AGS ef við erum ekki að nota þau?

Af hverju er AGS að stjórna ríkisfjármálunum?

Af hverju erum við að fara eftir skipunum AGS og höldum hér uppi okurvöxtum og gjaldeyrishöftum?

Er það vegna þess að við höfum tekið lán frá þeim sem við erum ekki að nota?

Af hverju hættum við ekki í þessu prógrammi hjá AGS og stýrum okkar málum sjálf?

Við vitum þá í það minnsta að þær ákvarðanir sem teknar eru, þær eru teknar með hagsmuni okkar Íslendinga að leiðarljósi. Hagsmunir erlendra lánadrottna verða þá ekki látnir ráða för eins og nú er.

Erum við virkilega að afsala okkur allri stjórn ríkisfjármála í hendur erlendra manna vegna þess að við höfum tekið lán sem við erum ekki að nota?

Hversu ömurleg er sú staða sem búið er að koma okkur í?

Ég segi: Hættum í prógramminu hjá AGS, við þurfum hvort sem er ekki að nota lánin þeirra. Neitum að borga Krónubréfin og vextina af þeim, afskrifum þau. Borgum bara innlánstrygginguna vegna Icesave, rúmar 20.000 evrur vegna hvers innlánsreiknings.

Lækkum strax stýrivexti í 2% og afnemum gjaldeyrishöftin. Engin þörf er fyrir gjaldeyrishöft þegar Krónubréfin eru afskrifuð.

Hefjum síðan uppbyggingu í samstarfi við Lífeyrissjóðina í landinu og gerum átak í að fá hingað inn erlenda fjárfesta og bjóðum þeim góða skattalega aðstöðu eins og best gerist í Kanada, Írlandi og víðar þar sem stjórnvöld hafa reynt að fá inn erlend fyrirtæki og erlenda fjárfestingu.

Um 5.000 erlend fyrirtæki hafa staðsett sig í Kanada á síðustu árum vegna þeirrar aðstöðu sem erlendum fyrirtækjum er boðið þar upp á. Bjóðum erlendum fyrirtækjum slík hið sama hér á landi og hefjum nýja sókn.

 

Mynd: Minnismerkið um Stefán G Stefánsson, Skagafirði.

 

Þaulsetin gjaldeyrishöft

Eru Jöklabréfin aðallega í eigu Íslendinga?

Nú gengur sú saga fjöllunum hærra að eigendur Jöklabréfanna eru ekki einhverjir Austurískir tannlæknar heldur Íslendingar sem geymdu fé sitt í Íslensku bönkunum í Lúxemborg. 

Margir Íslendinga  náðu að senda óhemju fé úr landi inn á leynireikninga í Íslensku bönkunum í Lúxemborg. Íslensku bankarnir í Lúxemborg sáu um að ávaxta þetta fé og fengu m.a. bankana í löndunum í kring til að gefa út Jöklabréf í samstarfi við þá og Seðlabanka Íslands.

Þá eru sömu heimildir sem halda því fram að þessi Jöklabréfaútgáfa hafi í mörgum tilfellum verið að frumkvæði Seðlabanka Íslands. Bankinn hafi ekki viljað taka fé að láni erlendis sem honum bauðst á mjög hagstæðum kjörum því slík lán koma fram sem skuld hjá ríkinu. Ofurkapp hafi verið lagt í að sýna ríkissjóð skuldlausan og öllu til kostað þannig að svo mætti vera. Þess vegna hafi þessi rándýra leið verið farin til að útvega erlendan gjaldeyrir inn í landið. Fyrir 18 mánuðum voru útistandandi Jöklabréf fyrir meira en 700 milljarða. Raunveruleg skuldastaða ríkissjóðs var því í mínus upp á 700 milljarða. Jöklabréfin voru því notuð til að "falsa" raunverulega stöðu ríkissjóðs.

Þessi Jöklabréf hvíla nú eins og mara á samfélaginu. Gengið er skráð 50% of lágt vegna þeirra. Þar verður engin breyting á næstu 2 til 3 árin er spáð. Gríðarlega ströng gjaldeyrishöft eru í gildi vegna þessara Jöklabréfa. Þessi gjaldeyrishöft valda því að engir erlendir fjárfestar koma til landsins á meðan þessi höft eru í gildi.

Allar þessar hörmungar vegna Jöklabréfa sem eru að stærstum hluta ef ekki öllu leyti í eigu Íslendinga. Í mörgum tilfellum er þetta illa fengið fé, fé sem svindlað hefur verið út úr þessu samfélagi þar sem menn hafa hirt féð úr landi en skilið skuldirnar eftir. Skuldir sem með einum eða öðrum hætti lenda á almenningi að borga.

Í þessari stöðu er bara einn leikur. Neitum að borga þessi Jöklabréf. Borgum ekki krónu meir af þessum Jöklabréfum. Afskrifum þessi bréf og afléttum gjaldeyrishöftunum. Þá mun krónan ná jafnvægi á tveim til þrem mánuðum í stað tveggja til þriggja ára. Ef gengið lagast þá mun verðbólgan strax lækka og þá nun verðtryggingin á innlendu lánunum hætta að hækka.

Mynd: Á leið upp að Hofsjökli, Sultartangalón og Hekla.

 

 

Það versta mögulega afstaðið

Ásættanleg skattheimta.

Haldi stjórnin þetta markmið sitt þá yrði það ásættanleg niðurstaða fyrir alla verði skattar svipaðir og árin 2005 til 2007, þ.e. milli 30% og 35%. Ég var farin að sjá fyrir mér að skatttekjurnar yrðu milli 40% og 50% af vergri landsframleiðslu.

Ef þetta verður niðurstaðan þá er ekki hægt að kvarta.

Það er hins vegar ljóst að auka þarf skattheimtu því verulegar skattalækkanir hafa verið á síðustu tveim, þrem árum og skatttekjur 2009 eru áætlaðar 25,9% af vergri landsframleiðslu.

 

Skattar svipaðir og 2005-2007

"Norræna stjórnin"

Ef ríkisstjórnir undanfarinna ára hafa fengið eitthvert nafn þá hafa þær verið kenndar við staðinn þar sem þær voru myndaðar. Síðasta stjórn var kölluð Þingvallastjórn af því að hún var mynduð á Þingvöllum. Stjórnir Sjálfstæðisflokks og Framsóknarflokks hétu svo sem ekki neitt en þar á undan var Viðeyjarstjórnin sem mynduð var í Viðey.

Ef einhverjir þekkja þessa hefð þá eru það þau sem lengst hafa setið á Alþingi. Þeir tveir einstaklingar sem lengst hafa setið á Alþingi eru þeir tveir einstaklingar sem eru að mynda þessa ríkisstjórn, formaður Samfylkingarinnar og formaður Vinstri grænna.

Það er engin tilviljun að þessir tveir forystumenn völdu Norræna húsið til fundar og til þess að halda blaðamannafundinn þar sem myndun stjórnarinnar er tilkynnt. Norræna húsið var valið af kostgæfni til þess að vera vettvangur stjórnarmyndunarinnar. Þau hefðu getað valið úr öllum húsum landsins. Þau hefðu getað valið úr öllum eyjum landsins og öllum landshlutum. En nei, þau velja Norræna húsið. Þau velja Norræna húsið vegna nafnsins. Þau velja Norræna húsið vegna þeirrar skírskotunar sem nafn hússins hefur til þeirrar einstöku samfélagsgerðar sem er að finna í hinum Norrænu ríkjunum.

Í allar sögubækur munu fara þær upplýsingar að þessi ríkisstjórn Samfylkingarinnar og Vinstri grænna var mynduð í Norræna húsinu.

Það verður ekki hægt að kalla þessa stjórn neitt annað en "Norrænu stjórnina". Það er mín trú að forystumenn ríkisstjórnarinnar ætlast til og vonast til að þessi stjórn verði kölluð "Norræna stjórnin" eða "Norræna velferðarstjórnin" .

Verkefni þessar stjórnar eru vægast sagt svakaleg. Ríkisstjórninni hljóta allir að óska velfarnaðar að takast á við þann gríðarlega vanda sem við blasir, óháð hvar í flokki menn standa.

Þá er það er sérstak fagnaðarefni fyrir okkur í Norræna Íhaldsflokknum að hér skuli vera komin stjórn sem horfir til þeirrar þjóðfélagsgerðar sem við aðhyllumst og horfið verði af braut þess Thatcherisma og þeirrar Ameríkuseringu sem hér hefur verið í boðið Sjálfstæðisflokksins og Framsóknarflokksins síðasta áratuginn.

Myndun þessarar "Norrænu vinstri stjórnar" hvetur okkur í Norræna Íhaldsflokknum til dáða og til að kynna almenningi á Íslandi áherslur Norrænu borgaraflokkanna. Minnum á að Danmörk hefur aldrei blómstrað sem nú og velferðarkerfið þar aldrei verið sterkara en þar hafa Dönsku hægriflokkarnir stjórnað síðasta áratuginn.

 

Óbreytt stjórnskipan

Búið að ljúga endalaust að þjóðinni.

Það er búið að ljúga svo mikið að þjóðinni á síðustu misserum að þessar lygar norðanmanna er kærkomin áminning til okkar að trúa ekki öllu því sem fjölmiðlar bera á borð.

Fyrir ári síðan fór þáverandi forsætisráherra ásamt föruneyti, seðlabankamönnum og útrásarvíkingum um alla heimsbyggðina til að fullvissa fjármálaheiminn í Evrópu og Bandaríkjunum að íslenska bankakerfið væri traust og gott. Allir þessir menn vissu þá að íslensku bankarnir stefndu beint í gjaldþrot.

Í byrjun september í fyrra fullyrðir forsætisráðherra að ríkissjóður Íslands sé skuldlaus. Ekkert minntist hann á að þjóðin var í ábyrgðum fyrir 1.000 milljörðum vegna Icesave og 600 milljörðum vegna Jöklabréfanna.

Í seinni hluta september í fyrra var forsætisráðherra spurðir að því undir miðnætti hvað væri í gangi og af hverju allir helstu forvígismenn Íslensku bankana streymu til hans í stjórnarráðið. Hann svaraði því eitthvað á þá leið að ekkert væri að gerast, hann ynni oft fram eftir á kvöldin. Hálfum mánuði seinna var allt Íslenska bankakerfið hrunið.

Þannig hefur hver lygaþvælan rekið aðra af hálfu stjórnvalda. Annað hvort er logið að okkur eða ekkert sagt og borið við bankaleynd. 

Þegar vorgalsinn grípur menn í sauðburðinum á björtum vorkvöldum fyrir norðan og þeir í gáska sínum ljúga að fjölmiðlum eins og forystumenn þjóðarinnar hafa gert í allan vetur þá ætlar allt um koll að keyra.

Ef lögreglan í landinu vill gera eitthvað varðandi rangar upplýsingar sem komið er til fjölmiðla þá á lögreglan að byrja einhvers staðar annar staðar en á Oddfellow reglunni á Akureyri.

 

Ísbjörninn blekking

Köllum sendiherrann í London heim og lokum sendiráðinu.

Forsætisráðherra Breta veit hver goggunarröðin er á Íslandi, hver það er sem hér hefur öll völd og hver það er sem hér stjórnar. Breski forsætisráðherrann er því í viðræðum við Alþjóða gjaldeyrissjóðinn hve hratt við Íslendingar eigum að greiða Icesave skuldirnar. Ljóst er að erlendis er litið svo á að þeir sem eiga kröfur á hendur Íslenska ríkinu, þeir snúa sér til AGS með þær kröfur, ekki til ríkisstjórnarinnar.

Það hefur verið með ólíkindum af fylgjast með því frá í haust hvernig Bretar hafa komið fram við okkur sem þjóð. Það var ekki hægt að sýna okkur meiri fyrirlitningu en þegar þeir settu hryðjuverkalög á ekki bara Landsbankann og Kaupþing heldur einnig Seðlabankann og frystu þar með inni gull- og gjaldeyrisforðann okkar. Þetta gull og gjaldeyrisforðinn er af einhverjum furðulegum ástæðum geymdur í London.

Mér er sagt að þetta gull sé að stærstum hluta komið frá Danmörku. Þetta sé "tannfé" Íslenska lýðveldisins, gjöf frá Danska kónginum. Nú liggja bresk stjórnvöld eins og ormur á þessu gulli og mun aldrei láta það af hendi fyrr en þau eru sátt við Icesave uppgjörið.

Ég hef á þessu bloggi kvatt til þess að við Íslendingar skerum niður utanríkisþjónustuna um 80%. Ég hef kvatt til þess að við fækkum sendiráðum okkar úr 17 í 6. Sjá m.a. þessa grein hér. Utanríkisþjónusta Íslands er eins og bankakerfið okkar, allt, allt of stórt fyrir umfang og stærð þjóðarinnar.

Ef einhvern tíma hefur verið ástæða til að spara og draga saman seglin hjá hinu opinbera þá er það nú.

Ef einhvern tíma hefur verið ástæða til þess að loka einhverstaðar sendiráði þá er það í dag í London.

Ég er ekki að tala um að slíta stjórnmálasambandi við Breta, bara kalla sendiherrann heim, loka sendiráðinu og selja allar eignir þess. London ætti að vera fyrsta af 11 sendiráðum sem við eigum að loka á næstu 12 mánuðum.

Hvort ætla menn að skera niður heilbrigðisþjónustuna eða utanríkisþjónustuna?

Auðvita á að skera utanríkisþjónustuna niður í það sem hún var fyrir 1960. Það mun enginn finna fyrir því.

 

Mynd: Þingeyrarkirkja.

 

 

Hafa fengið nóg af Bretum

Rekum útlendinginn úr Seðlabankanum og Alþjóða gjaldeyrirssjóðinn úr landi.

Ég er með óbragð í munninum eftir að hafa lesið það sem fram kom á blaðamannafundinum með Seðlabankanum.

Það er ljóst að Alþjóða gjaldeyrissjóðurinn, AGS, er að herða tökin og beitir fyrir sig þessum norðmanni sem AGS krafðist að yrði gerður að Seðlabankastjóra þó svo það væri brot á Stjórnarskránni. Nú er þessi norski fjósamaður byrjaður að moka flórinn fyrir AGS. 

Tilgangur AGS með veru sinni hér á landi og tilgangurinn með veru þessa norðmanns í Seðlabankanum kom skýrt fram á þessum blaðamannafundi:

Gert er ráð fyrir verulegum niðurskurði útgjalda hins opinbera og að skattar verði hækkaðir, auk annarra tekjuaukandi aðgerða sem kæmu til framkvæmda í áföngum fram til ársins 2011. Gert er ráð fyrir að jöfnuður náist í rekstri ríkisins árið 2012 og að þannig skapist forsendur fyrir hægfara lækkun skulda ríkissjóðs.

Með öðrum orðum blóðmjólka á íslenska þjóð og leggja atvinnulífið í rúst í þeim tilgangi einum að þóknast hagsmunum erlendra lánadrottna. Tilgangurinn með þessum aðgerðum og veru AGS hér er bara einn og hann er að skapa forsendur til þess að ríkið geti farið að borga erlendar skuldir sínar innan þriggja ára.

Á þetta að vera aðal markmið efnahagsaðgerða stjórnvalda á þessum mestu krepputímum frá lokum seinni heimstyrjaldarinnar? Að geta farið að borga af erlendum skuldum Seðlabankans 2012?

Þetta er að mínu mati alröng markmið og alröng nálgun. Þessi stefna Seðlabankans og AGS hefur það eina markmið að tryggja hag erlendra lánadrottna.

Ætlum við virkilega að láta hagsmuni þessara lánadrottna ráða för hér á næstu misserum og árum. Gleymum því ekki að það tók Kanadísku stjórnina fjögur ár að losa sig við þessa nábíta þegar þeir voru einu sinni komnir inn í Kanada og höfðu lagt landið næstum í rúst.

Markmiðið Seðlabankans með sínum aðgerðum eiga að snúa að því að viðhalda atvinnu og óbreyttu menntunar- og velferðarkerfi. Látum það hafa forgang og frystum allar greiðslur af öllum erlendum lánum í 3 til 4 ár þar til við erum búnir að vinna okkar út úr mesta áfallinu eftir bankahrunið.

Fram kom í máli norðmannsins að tólf mánaða verðbóla frá janúar 2008 til 2009 hefði verið 18,6%. Tólf mánaða verðbólgan frá apríl 2008 til 2009 er hins vegar 11,9% Þetta þýðir að verðbólgan hér á síðustu þrem mánuðum hefur verið 4% til 7%. Samt er stýrivextir ennþá langt yfir öllum sársaukamörkum, 13% og miklu hærri en þriggja mánaða verðbólgan. Að keyra með 13% stýrivexti er bara fáránlegt við núverandi aðstæður.

Tilgangur AGS og norðmannsins með þessum háu vöxtum er bara einn. Hann er sá að tryggja Seðlabankanum nægt fé svo bankinn geti greitt vexti af erlendum lánum sínum.

Okkar var seld þessi hugmynd að fá AGS hingað inn því okkur skorti erlent lánsfé. Lánið sem við áttum að fá í febrúar hefur ekki borist enn. Ef við getum lifað af þennan ársfjórðung án láns frá AGS af hverju getum við ekki lifað af allt árið?

Hendum AGS úr landi, hættum að brjóta stjórnarskrána með því að hafa útlending Seðlabankanum, hættum í 3 til 4 ár að greiða af erlendum lánum Seðlabankans, lækkum stýrivexti niður í 2% og hefjum uppbyggingu hér á landi í samstarfi við lífeyrissjóði landsmanna en ekki AGS. Þá um okkur vel farnast og við ná að vinna okkur hratt og öruglega út úr þessari kreppu.

 

 

Umtalsverð vaxtalækkun í júní

Alþjóða gjaldeyrissjóðurinn kúgar stjórnvöld.

Þetta er hræðileg staða sem við eru í, að vera upp á Alþjóða gjaldeyrissjóðinn, AGS, komin. Þessi sjóður er hér í þeim eina tilgangi að tryggja stöðu eigenda sinna sem eru Seðlabankar Evrópu og Bandaríkjanna. Þessir Seðlabankar eru að tapa óhemju fé á gjaldþroti íslensku bankana. Gjaldþrot Kaupþings er þriðja stærsta gjaldþrot í heimi. Gjaldþrot Glitnis það fimmta stærsta.

Að kalla AGS hingað og fá þeim yfirstjórn efnahagsmála og setja síðan útlending yfir Seðlabankann er einhver mestu mistök sem gerð hafa verið. Enda erum við að horfa upp á samfélagið ekki brotlenda heldur hrynja. Samdráttur í verslun og þjónustu er frá 50% til 95%.

Eini tilgangur AGS hér á landi er að sjá til þess að Seðlabanki Íslands greiði fulla vexti af sínum lánum og AGS mun sjá til þess að Seðlabanki Íslands greiði að fullu upp öll sín lán og ríkissjóður standi að fullu við allar sínar skuldbindingar. Af þessum lánum er þjóðin í daga að greiða okurvexti miðað við vaxtakjör á erlendum mörkuðum. AGS er að öðru leiti nákvæmlega sama um hvað annað gerist á Íslandi.

Við sjáum hvernig AGS vinnur, komið er fram í maí og greiðslan sem þeir ætluðu að koma með í febrúar hefur ekki borist enn. Hún hefur ekki borist því AGS er ekki sátt við það sem íslensk stjórnvöld eru að gera eða réttara sagt er ekki gera. AGS er að kúga stjórnvöld til hlýðni.

Sendum þessa fulltrúa Seðlabanka Evrópu og Bandaríkjanna til síns heima og tökum stjórn efnahagsmála í okkar eigin hendur. Við vitum þá í það minnsta að þær ákvarðanir sem verið er að taka, þær eru teknar með hagsmuni Íslensku þjóðarinnar í huga, ekki eins og er í dag þar sem hagsmunir erlendra lánadrottna eru látnir ráða. 

 

Mynd: Í Kerlingafjöllum.

 

 

Þumalskrúfur og vinarklær AGS

Áframhaldandi okurvextir í boðið AGS

Með AGS við stjórnvölinn og með Norðmanninn í Seðlabankanum þá er engin von til þess að vextir fari undir 12%-14% á næstu misserum.

Með þessu vaxtaokri fær Seðlabankinn fé til að borga vexti til erlendra lánadrottna bankans. Hvernig annars ætti Seðlabankinn af fá fé til að greiða vexti? Nota til þess skatttekjur ríkissjóðs?

Nei, fyrr leggur AGS og Norsarinn samfélagið í rúst en láta verða greiðslufall á greiðslu vaxta til erlendra lánadrottna, enda er AGS hér fyrst og fremst í þeim tilgangi að tryggja hagsmuni eigenda sinna sem eru Seðlabankarnir í Evrópu og Bandaríkjunum. Þessum Seðlabönkum skuldar íslenska bankakerfið óhemju fé. Tap erlendra banka sem eru nú að tapa á gjaldþroti íslensku bankanna lendir með einum eða öðrum hætti á Seðlbönkum Evrópu og Bandaríkjanna.

Fulltrúi þeirra, AGS, fer með yfirstjórn allra fjármála á Íslandi. Ef stýrirvextir verða lækkaðir á Íslandi þá mun Seðlabanki Íslands ekki geta staðið í skilum við greiðslu á vöxtum til erlendra lánadrottna sinna. 

Afleiðingar þessa vaxtaokurs eru skelfilegar fyrir land og þjóð.

 

Mynd: Lind í Bjarnalækjabotnum.

 

Margir íhuga greiðsluverkfall