Rjúpnaveiðar.

Engu virðist vera til sparað þegar kemur að því að vernda rjúpnastofninn. Nú virðist vera byrjað að vakta með þyrlum svæði þar sem rjúpnaveiði er bönnuð og rjúpnaveiðimenn eltir uppi á þyrlum sjáist til þeirra á þessum svæðum. 

Lögreglan stöðvar líka rjúpnaskyttur og gerir afla og skotvopn upptæk hafi menn ekki á sér veiðikortið við rjúpnaveiðarnar.

Það er eins gott að lögreglan hafi ekki sama háttinn á og geri bíla og farangur upptækan þegar lögreglan stöðvar ökumenn sem hafa ekki á sér ökukortið.

Ég held lögreglan ætti nú að taka þessu aðeins rólega þó menn séu að sportast við að ná sér í rjúpur í jólamatinn. Á mörgum heimilum landsins þá eru engin jól nema það séu rjúpur á borðum enda ilmurinn af þeim þegar þær eru steiktar í ofni einstakur. Þetta er fyrir mörgum hin eina og sanna jólalykt. Ef það eru ekki rjúpur um jólin þá eru engin jól.

Nú er bannað að selja rjúpur þannig að þeir sem vilja halda sínum gömlu jólasiðum, þeir verða að fara á stúfana og veiða þær sjálfir.

Fjölmargir virðast vera tilbúnir að leggja mikið á sig til að eyðileggja þennan gamla jólasið fyrir þessum "rjúpnafjölskyldum" og hafa allt á hornum sér þegar rjúpnaveiðimenn fara til rjúpnaveiða.

Það er ljóst að þetta árið verða þessir rjúpnaveiðimenn ekki teknir neinum vettlingatökum og þó að ekki finnist fé til að kaupa eldsneyti á þyrlur Landhelgisgæslunnar þegar þarf að sinna einhverjum ferðalöngum í vandræðum á hálendinu þá virðist vera nægt fé til þegar þarf að vakta rjúpnaveiðilendur.

Alvarlegustu aðförina að þessum sið að hafa rjúpur í jólamatinn gerði þó Sif Friðleifsdóttir í ráðherratíð sinni í Umhverfisráðuneytinu. Hún bannaði alfarið alla rjúpnaveiði í nokkur ár. 

 

Mynd: Í Elliðaárdalnum, 1.11.2009.

 

 

Skyttur teknar á Þingvöllum

Athugasemdir

[Þorsteinn H. Gunnarsson, 8.11.2009 kl. 19:12]

F.v. umhverfisráðherra Sif Friðleifsdóttir tók rétta ákvörðun þegar hún stöðvaði veiðar á rjúpu í nokkur ár.

Skotveiðimenn búa yfir miklum sóknarþunga og ef honum er beitt af fullum þunga án aðhalds stendur rjúpan höllum fæti. Þar að auki er auðveldara að fara um allt hálendið ólíkt því sem áður var þegar bændur og lausamenn gengu til rjúpna frá byggð.

Sú tilhögun sem nú er varðandi  rjúpnaveiðar er skynsamleg að mínu mati og rjúpunni gefið undanfæri og dálítil forgjöf.

Þyrluflug sýnist mér ekki réttlætanlegt og hélt ég að það væri einhver þjóðgarðsvörður á Þingvöllum og væri hægt að sinna þessu með ódýrari hætti.

[Eiður Svanberg Guðnason, 8.11.2009 kl. 23:13]

Það er sem sé  ástæðulaust að framfylgja lögum,sem þér eru ekki að  skapi !  Þetta er mjög sérstakur hugsunarháttur, sjálfhverfur umfram allt.

[Friðrik Hansen Guðmundsson, 9.11.2009 kl. 00:00]

Sæll Eiður

Þessar rjúpnaveiðar hreyfa við mörgum. Það er ekki óeðlilegt, þetta er tilfinningamál hjá þeim sem veiða rjúpurnar og borða í jólamatinn og þetta er tilfinningamál hjá þeim sem vilja ekki að þær séu veiddar.

En er það ekki aðeins of langt gengið að vera að elta þessar rjúpnaskyttur uppi á þyrlum á sama tíma og Landhelgisgæslan neitar að senda þyrlu vegna kostnaðar að aðstoða björgunarsveitarmenn við að koma líki ofan af fjöllum til byggða eins og gerðist í sumar?

Hvaða forgangsröðun er það?

Ég skal viðurkenna að mér er mjög illa við að fara eftir reglum sem eru ranglátar og byggja ekki á neinu öðru en duttlungum þeirra einstaklinga sem fyrir tilviljun setjast í ráðherrastóla í nokkur misseri. Reglum sem vitað er að verður breytt um leið og nýr ráðherra tekur við.

Með lögum skal land byggja en með ólögum eyða.

Það þýðir ekki að setja einhver lög sem brjóta í bága við almenna réttlætiskennd, siðgæðisvitund og viðteknar venjur og gildi. Slík ólög þau brjóta samfélagssáttmálann og þá verður friðurinn í landinu úti.

Að banna rjúpnaveiðar sem hér hafa verið stundaðar frá landnámi, það er dæmi um slík ólög.

[Björn (IP-tala skráð) 9.11.2009 kl. 12:45]

Sælir félagar

Sem rjúpnaskyttu langar mig til að leggja orð í belg. 

Varðandi þyrluna þá segir í fréttinni að þyrluna hafi hvort eð er átt að nýta við æfingar og því ekki um aukin útgjöld að ræða. Hvað varðar veiðikort og skotvopnaleyfi er sjálfsagt og eðlilegt  að sá sem stundar veiðar, geti fært sönnur á að hann hafi tilskilin leyfi. Ef gera á undantekningar frá þessu, er þá ekki rétt að gera almennt undantekningar frá öllum reglum sem einhverjum bloggurum kunna þykja fáránlegar. Þeir sem alist hafa upp við ilminn af rjúpunum yfir jólin verða bara að fylgja reglum eins og við hinir. Það er ekkert óeðlilegt við það.  Að lokum vil ég benda veiðimönnum á að hirða upp eftir sig notuð skothylki. Flestar byssur þ.m.t. pumpur, hálfsjálfvirkar og betri tvíhleyupur eru með búnaði sem kasta hyulkjunum sjálfvirkt út þegar hlaupið er opnað. Skotin kastast samt ekki nema í ca meters fjarlægð (ekki meters radíus) og mönnum ekki vorkunn að hirða þau upp. Annað er óvirðing við náttúruna.

Góðar stundir.

[Friðrik Hansen Guðmundsson, 9.11.2009 kl. 14:09]

Sæll Björn

Það má ekki skilja orð mín svo að ég sé að mæla með því að menn séu á veiðum á svæðum þar sem rjúpnaveiði er bönnuð eða að menn séu að stunda veiðar án tilskilinna leyfa.

Ég er að gagnrýna það offors og þær öfgar sem opinberir aðilar eru með og hafa verið með gagnvart rjúpnaveiðum. 

[Eiður Svanberg Guðnason, 10.11.2009 kl. 08:23]

 Ég held ,Friðrik, að það sé hvorki hægt að tala um offors eða öfga af hálfu   opinberra aðila  gagnvart  rjúpnaveiðum. Ég beitti mér á sínum tíma  fyrir upptöku  veiðikorta, þá ætluðu ýmsir að ganga af göflunum  í þinginu. Nú þykir þetta sjálfsagt mál.  Þjóðfélagið væri  ekki  á hliðinni eins og það er , ef allir  hefðu farið að settum reglum.

[Friðrik Hansen Guðmundsson, 10.11.2009 kl. 18:53]

Sæll Eiður

Ég man að menn voru mjög ósáttir þegar þessi veiðikort voru lögleidd. Áður þá fóru menn á námskeið hjá lögregluembættum landsins og lærðu á meðferð skotvopna og var kynnt lög og reglur sem gilda um veiðar á villtum dýrum. Í lok námskeiðsins var haldið próf og í framhaldi fengu menn byssuleyfi og þar með leyfi til veiða á þeim fuglum og dýrum sem ekki eru friðaðuð.  

Þessi veiðikort, var þetta nokkuð annað en enn ein leiðin fyrir ríkið til að ná sér í skattpeninga?

Ég er alltaf að bíða eftir því að stjórnvöld krefjist þess að tekin verði upp og lögleidd hér á landi bláberjakort.

Þeir sem ætla að tína bláber þeir verði að kaupa sérstök kort hjá Umhverfisráðuneytinu og borga fyrir það nokkra þúsundkalla. Þar sem almennt er meira af krækiberjum þá má kannski leyfa að þau séu tínd eitthað ókeypis áfram en er ekki rétt að ríkið fari að rukka fyrir þau bláber sem fólk er að tína?

Ætli það gangi ekki allt af göflunum í þinginu þegar rædd verður upptaka á bláberjakortum en munu þau ekki eftir nokkur ár þykja sjálfsagt mál?

[Eiður Svanberg Guðnason, 10.11.2009 kl. 20:34]

 Þú missskilur málið algjörlega, Friðrik. Veiðikort hafa langalengi  verið notuð í grannlöndum okkar  fyrst og  fremst til að  fylgjast með því hve mikið er veitt úr hverjum stofni. Því er treyst að menn segi rétt og  heiðarlega frá feng sínum. Röksemdir þínar um bláber og krækiber koma þessu máli ekkert við.

Ég er  sömuleiðis stoltur af því að hafa átt  svolítinn þátt í koma á friði í kringum  hreindýraveiðarnar, þjálfun leiðsögumanna  o.fl.  Það var ekki vinsælt  hjá öllum á sínum tíma en er óumdeilt nú að ég hygg.

Þig dreymir greinilega um að tímar „villta vestursins" renni upp hér á landi.

[Þorsteinn H. Gunnarsson, 10.11.2009 kl. 21:31]

Þetta eru allt saman viðkvæm mál. Veiðikortin eru ákveðin viðurkenning á réttindum en þau ein og sér ákvarða ekki veiðimagn. Ólíkt með bláberin sem mætti tína öll upp vegna þess að þau eru uppskera, má ekki skjóta alla rjúpu því þá koma engir ungar.

Hugsanlega yrði að setja á bláberjakort og kvóta ef sú hætta skapaðist að menn færu að troðast undir við bláberjatínslu.

Samkvæmt  fréttum af Öxarfjarðarheiði er þar allt að komast í óefni við rjúpnaveiðar þó að ekki liggi haldbærar skýrslur fyrir um hvað er rétt í málflutningi oddvitans. Þar virðist villta vestrið vera að rísa í austrinu.

[Friðrik Hansen Guðmundsson, 11.11.2009 kl. 00:41]

Sæll Eiður

Ég er sammála þér í því að það hefur tekist mjög vel til með hvernig staðið er að veiðum á hreindýrum. Þessar reglur henta vel þeim veiðum.

Mikil hefð er á sölu veiðileifa í ár og vötn og er það fyrirkomulag lítið breytt frá tímum Einars Ben frá því hann fór að selja útlendingum laxveiðileyfi.

Ég set spurningamerki við núverandi fyrirkomulag varðandi fuglaveiðarnar, sérstaklega þessi miklu bönn um allt og ekkert. Stöðugt er verið að fækka veiðidögunum varðandi rjúpuna. Búið að setja reglur um á hvaða vikudögum má veiða og á hvaða vikudögum má ekki veiða. Þegar vond veður trufla veiðar þá þessa fáu daga sem gefur til veiða þá fyllist allt af veiðimönnum á þeim fáu svæðum sem enn má veiða á. 

Menn "gripnir" án veiðikorta og sektaðir eins og glæpamenn þó svo þeir séu sem ferðalangar / aðstoðarmenn við bjargfuglaveiðar eins og hann lenti í hann Einar  Kr. Guðfinnsson og fleiri.

Ég er ekki að mæla með "villta vestrinu" en þetta þarf ekki að vera annað hvort í ökkla eða eyra. Menn verða líka að fá að lifa í þessu landi án þess að allt sé bannað.