Icesave gæti orðið okkur happadráttur

Við eigum og við getum snúið þessu Icesave máli okkur í hag og látið Icesave verða að gæfuspori í okkar sögu. Í öllum erfiðleikum eru falin tækifæri, í miklum erfiðleikum er falin mikil tækifæri.

Það liggur fyrir að þjóðin mun eiga í miklum erfiðleikum með að standa undir greiðslu þeirra lána sem á ríkissjóði hvíla. Erlendar skuldir þjóðarbúsins eru komin yfir þessi 240% af landsframleiðslu sem AGS miðar við sem hættumörk. Það er því fyrirséð að við munum ekki geta aflað nægjanlegs gjaldeyris til að geta staðið í skilum af öllum okkar lánum.

Á það ber að líta að þó þessar skuldir séu svimandi háar miðað við okkar litla samfélag þá erum þetta lágar tölur í öllu samhengi hjá milljónaþjóðunum hér í kring.

Þess vegna eigum við að segja við þær: Þið viljið að við bætum Icesave ofaná skuldum hlaðinn ríkissjóð og við sem þjóð viljum gera allt sem við getum til að standa við okkar skuldbindingar. Við sjáum fram á að það verður mjög erfitt og tvísýnt fyrir okkur að greiða ykkur Icesave skuldina með evrum en við getum borgað ykkur með rafmagni.

Við eigum að segja við Breta og Hollendinga: Ef þið viljið að við samþykkjum þennan Icesave samning sem nú liggur fyrir Alþingi, þá verðið þið að lána 500 milljarða króna til að setja upp vindmyllugarða, sólarpanelekrur, vatnsaflsvirkjanir, jarðhitavirkjanir og gufuaflsvirkjanir ásamt því að gerðir verða og lagðir verða tveir 500 MW sæstrengir, annar til Holland og hinn til Skotlands. Ef þið lánið ekki í þessar framkvæmdir þá munum við ekki borga af því að við getum ekki borgað. Það verða að koma nýjar fjárfestingar inn í landið sem skapa tækifæri til að nýta náttúruauðlindirnar ef við eigum að geta borgað.

Hollendingar og Bretar hafa þá um tvennt að velja: Vilja þeir hjálpa okkur og fá greidda 900 milljarða króna sem Icesave endar væntanlega í eða hjálpa okkur ekki og fá ekki neitt.

Vilji þeir hjálpa okkur þá lána þeir fyrir þessum framkvæmdum. Þeir gætu fengið veð í rafmagnssölusamningunum sem gerðir verða um leið og ofangreindir lánasamningar yrðu undirritaðir. Vextir á þessum lánum ættu að vera hagstæðir því það verða Bresk og Hollensk orkufyrirtæki sem verða kaupendur að rafmagninu og þar með í raun greiðendur að þessu framkvæmdaláni.

Væri þessi leið valin þá myndi sæstrengurinn borga sjálfan sig, orkumannvirkin og Icesave upp á 8 til 10 árum. Icesave myndi þá ekki snerta almenning á Íslandi því við hefðum aldrei lagt út eina einustu krónu. Þvert á móti kæmu hingað inn í landið miklir fjármunir og umsvif við gerð þessara orkumannvirkja og gerð sæstrengsins. Kreppan á Íslandi myndi hverfa eins og dögg fyrir sólu.

Einfaldasta og öruggasta leiðin í dag er að nota sömu tækni við gerð sæstrengsins og notaður var við Nordned sæstrenginn. Það er álstrengur, 580 km langur, 700 MW og liggur á milli Noregs og Hollands. Orkutapið um 10%. Sæstrengur frá Íslandi til Skotlands og Hollands yrði tekin upp í Færeyjum til kælingar og þá yrðu lengstu leggirnir álíka langir og þessi Nordned strengur er. Slíkur sæstrengur gæti verið kominn í gagnið innan 3 til 4 ára.

Að selja rafmagn úr landi í gegnum sæstreng er örugg, einföld og fljótleg leið sem mundi hafa það í för með sér að afborganir af Icesave myndu ekki íþyngja almenningi á Íslandi. Þvert á mót. Verði þessi leið valin yrði Icesave okkur happadráttur.

Miðað við þær þreifingar sem þegar eru í gangi þá sýnist mér að við gætum auðveldlega selt 5.000 MW til 10.000 MW austur og vestur um haf, vildum við það.

Ef við tökum einfalt dæmi og segjum að við seldum 1.000 MW úr landi gegnum sæstreng á 35 kr/KWst þá væru tekjur af því um 306 milljarðar á ári.

35 kr/KWst x 24 tímar x 365 dagar x 1.000.000 KWst = 306,6 milljarðar

Segjum sem svo að samningar Íslenska ríkisins vegna sölu á rafmagni um sæstreng frá landinu væru þannig að ríkið fengi í sinn hlut 17% af endanlegu raforkuverði. Það þýddi að af 300 milljörðum á ári fengi ríkið í sinn hlut í skatt 50 milljarða strax á fyrsta ári sem kapalinnn er tekinn í notkun. Ef við seldum úr landi 5.000 MW þá fengi ríkið í sinn hlut 250 milljarða á ári. Það fer að slaga hátt í 50% af útgjöldum ríkisins. Ef við værum að fá 250 milljarða í tekjur á ári í hreinum gjaldeyrir, án áhættu ef það væru einkaaðilar sem ættu sæstrenginn, vindmyllurnar o.s.frv. þá yrðum við ekki í vandræðum að borga þessar erlendu skuldir okkar.

Ef við seldum 10.000 MW úr landi, og það væri ekkert vandamál að selja það, þá værum við að fá með 17% skatti á endanlegt verð 500 milljarða á ári fyrir þessa rafmagnssölu. Til að setja þetta í samhengi þá erum við að fara í það að skera niður fjárlögin úr 600 milljörðum í 400 milljarða.

Nú er það svo að ég er í sambandi vð erlenda aðila sem væru tilbúnir að gera slíkan samning við ríkið, samning þar sem ríkið fengi ákveðinn hundraðshluta af endanlegu söluverði. Þeir væru tilbúnir að aðstoða við fjármögnun ásamt því að búa til og leggja slíka sæstrengi.

Ef við veljum þessa leið að selja rafmagn í stórum stíl með sæstrengjum austur og vestur um haf þá gæti ríkið innan fárra ára fengið allar sínar tekjur af sölu af rafmagni sem unnið er með endurnýjanlegum orkugjöfum. Við værum komin með eilífðarvél sem framleiddi fyrir okkur skattpeninga fyrir ríkið þannig að við myndum sjálf ekki þurfa að borga skatta. Alaska er skattlaust samfélag. Olían er þeirra auðlind og þeir borga enga skatta. Við eigum gríðarlegar náttúruauðlindir, jarðhitann, vatnsaflið, vindinn og eiðisanda fyrir sólarpanela sem við erum í tilgangsleysi að sá Alasklúpínum í.

Við höfum hér allt til þess að framleiða það sem öllum vantar í dag sem er "grænt" rafmagn. Icesave gæti orðið lykillinn að því að gætum hjálpað þessum þjóðum og sent þeim grænt rafmagn héðan um leið og við stefnum að því að innan fárra ára hættum við að borga skatta á Íslandi.

PS, Steingrímur er búinn að hringja.

 

Nánar um þetta mál í eftirfarandi greinum:

Sæstrengur vestur um haf mjög álitlegur

Borgum Icesave með rafmagni til Bretlands gegnum sæstreng

Mynd: Við veiðar fyrir Norðan.

 

Dýrustu milljarðar Íslandssögunnar

Athugasemdir

[Eiríkur Sjóberg, 3.7.2009 kl. 01:19]

Sæll Friðrik

 Enn á ný, þetta er bara alls ekki galin hugmynd!

 Og meiri þykja mér skilaboðin í því að hugsa jákvætt!  Jákvæðni er skapandi!  Neikvæðni eyðileggur.

 Þakka þér fyrir!

[Haraldur Aðalbjörn Haraldsson (IP-tala skráð) 3.7.2009 kl. 08:49]

sæll

Þetta er fín hugmynd hjá þér en þetta lengir þann biðtíma sem er fyrir þessar þjóðir eftir endurgreiðslunni eða ígildi greiðslu og þess vegna myndir skuldin hækka um einhverja tugi milljarða ef ekki meir. Við erum ekki aflögufærir um rafmagn og einhvern tíma tekur það ferli allt og framkvæmt.

[Friðrik Hansen Guðmundsson, 3.7.2009 kl. 09:35]

Sæll Haraldur

Jú allt tekur þetta sinn tíma. Við eigum að byrja að borga af Icesave eftir 7 ár þannig að okkur vinnst tími bæði til að virkja og búa til og leggja sæstrenginn.

Aðal málið er að við verðum, ef við ætlum að lifa hér í þessu landi við sæmileg lífskjör á næstu árum og áratugum, að hefja hér einhverja þá starfsemi sem getur skapað okkur verulegar gjaldeyristekjur. Þá vinnu þarf að setja í gang núna.

Þessi leið sem ég lýsir fyrir ofan er fær leið sé vilji til að fara hana.

[Mofi, 3.7.2009 kl. 11:04]

Þetta hljómar alveg frábærlega Friðrik!  Hvað sagði Steingrímur? 

[Jón Rúnar Ipsen, 3.7.2009 kl. 11:15]

Þetta hljómar áhugavert en ef þetta er virkileg raunhæfur möguleiki afhverfu er hann ekki kominn fram mun fyrr ??

Hver þig til að koma þessu á framfæri við fjölmiðla 

[Friðrik Hansen Guðmundsson, 3.7.2009 kl. 11:32]

Sæll Jón.

Þegar menn voru að reikna þetta síðast þá var hugtakið "grænt" rafmagn ekki til, hvað þá að það ætti að borga meira fyrir það. Í USA er greitt aukalega 24 cent per KWst fyrir "grænt" rafmagn. Í Bretlandi taka gildi lög innan tveggja ára sem skattleggja mengandi rafmagnsframleiðslu og verða þar með mjög hagstæð "grænu" rafmagni. Þeir sjá fyrir sér að fullt af kolaorkuverum verður lokað í framhaldi og fyrirséður er orkuskortur í Bretlandi á komandi árum.

Í eldri forsendum þá voru menn að reikna með mjög lágu orkuverði í Bretlandi og 25% orkutapi í strengnum að mig minnir. Ný tækni við gerð háspennustrengja og hærra orkuverð fyrir "grænt" rafmagn breytir þessu öllu.

[Fannar frá Rifi, 3.7.2009 kl. 17:58]

Að leggja sæstreng fyrir rafmagn til Evrópu yrði versta framkvæmd sögunar. Við yrðum að nýlendu sem er mergsoginn af öllu sem hún á. Ekkert rafmagn mun fást framkvæmda innanlands. Að selja rafmagn beint úr landi án þess að það sé "unnið", er hræðileg hugmynd. Engin störf við orku frekan iðnað mun verða til á Íslandi í þessari framtíðarsín þinni og valla nóg til að knýja ljósastaura hvað þá meir. Ég óska þess heit að þessi hugmynd þín verði aldrei að veruleika.

[Friðrik Hansen Guðmundsson, 3.7.2009 kl. 18:04]

Það hefur enginn minnst á það Fannar að það eigi að hætta við allt hér innanlands þó það rafmagn sem ekki er nýtt hér innanlands verði selt til útlanda.

Þó Norðmenn séu að selja olíu þá er samt næg olía í Noregi til innanlandsnotkunar.

Sala á rafmagni eða olíu til útlanda þarf ekki að leiða til skorts á rafmangi eða olíu á heimamarkaði, er það?

[Hallgrímur Andri (IP-tala skráð) 3.7.2009 kl. 18:46]

Svona bjartsýni kann ég að meta, í öllum erfiðleikum fáum við tækifæri til að sýna hver við erum í raun!

Nú er tími fyrir aðgerðir.. bravó :)

[Einar (IP-tala skráð) 3.7.2009 kl. 20:02]

Ef menn skoða þessa frétt http://mbl.is/mm/frettir/innlent/2009/06/16/ekki_til_orka_fyrir_helguvik/ er einhver umfram rafmagnsorka sé til staðar til að selja til útlanda ?

[Sigtryggur Arnþórsson (IP-tala skráð) 3.7.2009 kl. 20:17]

Gaman að sjá fólk sem hugsar um lausnir ekki bara vandamálin...

[Guðrún S (IP-tala skráð) 3.7.2009 kl. 20:41]

Nú eru útlendingar að kaupa HS-Orku.

Sjáið fyrir ykkur stöðuna:

Útlendingar eiga orkufyrirtækin og raforkan seld um sæstreng til evrópu.

Náttúru yrði fórnað fyrir virkjanir og ekki evra í gjaldeyri yrði eftir í landinu!

Þetta er arfavondhugmynd.

[baldur (IP-tala skráð) 3.7.2009 kl. 23:04]

það sýnir kannski best desperasjón ríkistjórnarinnar að Steingrímur sé búinn að hafa samband... Á ísland inni 1000 MW?, neðri þjórsá + búðarháls gefa samtals 345 MW(skv, vef LV), vindmyllur eru í áruatuga fjarlægð frá landinu og sólarpanelar eru óraunhæfir á okkar staðsetningu á hnettinum til orkuöflunnar, nb, Icesace verður ekki  leyst með bellibrögðum. Það verður ALDREI lagður háspennustrengur frá íslandi til annars lands, hvað sem hver segir. Okkur ber að neita ríkisábyrgð á icesave!

[Mofi, 3.7.2009 kl. 23:24]

Hvað með að virkja sjávarföllin?  Veit ekki betur en bretar gera það að einhverju leiti svo við ættum að geta gert það í einhverjum mæli.

[Finnur Hrafn Jónsson, 4.7.2009 kl. 00:00]

Mér finnst þetta alveg frábært að þú ert að koma með jákvæðar og uppbyggilegar tillögur að lausn vandans þegar aðrir eru að velta sér upp úr sjálfsvorkunn.

Það er alveg nóg til af vatnsafli og jarðvarma til að virkja hér. Ég er þó frekar efins um sólarorkuna.

[Sævar Einarsson, 4.7.2009 kl. 10:38]

"Erlendar skuldir þjóðarbúsins eru komin yfir þessi 240% af landsframleiðslu sem AGS miðar við sem hættumörk."

Ég er ansi smeykur um að þessi tala sé kominn í 270 - 300%, það veit enginn í raun hvað skuldir þjóðarbúsins eru því stjórnvöld neyta að gefa það upp, hvernig er þá hægt að samþykkja eitthvað sem maður veit ekki hvað maður er að samþykkja.

[Kristján Sigurður Kristjánsson, 4.7.2009 kl. 12:46]

Mér lýst vel á þetta nema verðið. Hvernig væri að selja kwst. á kr. 1.000 eða kr.10.000?

[Hólmfríður Bjarnadóttir, 5.7.2009 kl. 02:01]

Þarna er talað í anda þess kjörorðs sem ég hef að leiðarljósi og er svona. ÞÚ FINNUR ALLTAF LEIÐ EF ÞÚ LEITAR.  Þessi setning kom til mín fyrir nokkrum árum og hefur reynst mér afar vel síðan. Hugmyndin er góð Friðrik og allrar skoðunar verð.