Fyrsta græna kapalverksmiðjan í heiminum rís á Íslandi

 

Fréttatilkynning.

Á næstu árum er ætlunin að hér á landi rísi fyrsta græna kapalverksmiðjan í heiminum sem framleiða mun, til notkunar innanlands en þó einkum til útflutnings, háspennukapla og sæstrengi og nota til þess rafmagn og ál sem hvoru tveggja er framleitt á Íslandi. Um er að ræða grænan hátækniiðnað og mun kapalverksmiðja þessi veita á bilinu 300 til 500 manns græn störf þegar hún nær fullum afköstum og ámóta fjölda starfsmanna þarf til að reisa verksmiðjuna. Þetta verða að teljast ákaflega góð og mikilvæg tíðindi.

The North Pole Wire vill skapa hér eitt öflugasta útflutningsfyrirtæki landsins byggt á innviðum hins íslenska atvinnulífs. The North Pole Wire vill eins og fuglinn Fönix rísa upp úr öskunni og reisa á Íslandi fyrstu og einu kapalverksmiðjuna í heiminum sem framleiðir kapla með grænni orku.

Ráðgert er að verksmiðjan rísi á næstu 3-4 árum, þar af tekur fyrsti áfangi 1-2 ár - en allt er þetta háð því til verkefnisins fáist tilskilin leyfi. Staðsetning verksmiðjunnar hefur ekki enn verið ákveðin, en ýmis landsvæði hafa verið skoðuð og sum teljast mjög vænleg.

Að verkefninu stendur íslenskt félag The North Pole Wire. Stofnendahópur er innanlands í umsjá Verkfræðistofu FHG ehf (Friðriks Hansen Guðmundssonar verkfræðings), en að baki verkefninu eru öflugir erlendir aðilar, sem ekki er að sinni tímabært að greina nánar frá - en rétt að taka fram að þeir hafa ekki áður komið að starfsemi á Íslandi. Auk áætlana um að reisa verksmiðjuna á Íslandi hafa þessir aðilar átt í viðræðum við erlenda kaupendur, enda hefur verkefnið verið lengi í undirbúningi.

Ef vel tekst til mun kapalframleiðslan á Íslandi ýta mjög undir að allar nýjar rafmagnslínur fari í jörð, sem og endurnýjum á eldri línum og gera lagningu sæstrengja til annarra landa fýsilega.

 

Nánari upplýsingar veita:

Friðrik Þ. Guðmundsson                                           

Fjölmiðlafulltrúi

566-7000 eða 864-6365

 

Friðrik Hansen Guðmundsson 

Framkv./Verkfr.  -   566-7000

 

Vilja reisa fyrstu grænu kapalverksmiðju heimsins

Athugasemdir

[Hólmfríður Bjarnadóttir, 24.3.2009 kl. 22:42]

Virkilega áhugaverð frétt og jákvætt að fá hana inn núna þegar svo margt er á hinn veginn. Mun fylgjast vel með málinu og óska ykkur góðs gengis sem að þessu standa

[Árni Gunnarsson, 25.3.2009 kl. 11:31]

Sannarlega ánægjuleg frétt og tímabært að nýta verðmætt hugvit og orku. Of lengi erum við búin að hlýða á mærðarfullar ræður á hátíðarstundum um allan þann auð sem þarna sé að finna.

Nú spyr ég: Hversu mikillar orku krefst þessi framkvæmd og er vinna í gangi við að semja um þá orku? 

[Halldór Jónsson, 25.3.2009 kl. 11:47]

Þetta er næstum of gott til að geta verið satt. Þvílk frétt  í eymdinni. Bara að maður gæti verið með í einhverju svona.

[Finnur Bárðarson, 25.3.2009 kl. 13:43]

Þú átt heiður og hrós skilið Friðrik. Ég var lengi að átta mig á þessu hvað væri í gangi. Gangi þér vel. Þetta er uppörvun til allra

[Halldór (IP-tala skráð) 25.3.2009 kl. 16:04]

framleiðir kapla með grænni orku

Ég vona að þetta séu ekki einu skilyrðin fyrir því að verksmiðjan kallast "græn" sérstaklega þar sem hátækniverksmiðjum fylgir vanalega svakaleg mengun, ef svo er þá má kalla hverja einustu verksmiðju á landinu græna verksmiðju, alltaf gaman að vita af því að við framleiðum "grænt" ál.