Bíllaus lífstíll er ávísun á félagslega einangrun

Með því að borgaryfirvöld ákveða að byggja mikinn fjölda fjölbýlishúsa án bílastæða í anda stefnunnar um bíllausan lífstíl þá eru yfirvöld um leið að gera atlögu að öllu félagsstarfi í borginni og ljóst að þessi met þátttaka borgarbúa í öllu menningarstarfi, leikhúsum og tónleikum mun minnka.

Verður einhver verðandi íbúi í “bíllausu blokkunum” á Ártúnsholtinu tilbúinn að mæta á fund í Lions klúbbnum mínum í Lionsheimilinu á Hlíðarsmára í Kópavogi og mæta á þessa kvöldfundi að vetrarlagi, gangandi, hjólandi eða í strætó? Munu þessir verðandi íbúar á Ártúnsholtinu verða duglegir að sækja leikhús og tónleika í Miðbænum að vetrarlagi, gangandi, á hjólum eða í strætó?

Nei, þetta fólk mun ekki verða virkir þáttakendur í slíku, fólk sem flytur í fjölbýli fyrir bíllausan lífstíl er að flytja inn í félagslega einangrun. Það sýnir sig að fjöldi þeirra sem býr í slíku húsnæði vill ekki þessa félagslegu einangrun, það er á bíl og vill geta mætt á fundi í Hjálparsveitinni, hitt Bridge félagana og farið á tónleika óháð veðri og tímatöflu strætó. Þessi bílaeign í “bíllausu” blokkunum veldur svo nágranna óeirðum þegar “bíllausa” fólkið leggur í stæði nágranna sinna, eins og illindin við Móaveg í Grafarvogi sýna.

Þessi hugmyndafræði örfárra kverúlanta sem hafa komist tímabundið til valda í Reykjavík og eru að þvinga hluta borgarbúa inn í félagslega einangrun og gera um leið óafturkræfar breytingar á borginni með því að byggja fjölbýlishús án bílastæða, þetta er sú mannfjandsamlegasta stefna sem nokkurn tíma hefur verið reynt að þvinga upp á okkur Reykvíkinga.

Og til hvers eru Borgaryfirvöld að reyna að einangra stóran hóp borgarbúa í íbúðum sínum uppi í Gufunesi og á Ártúnsholti? Til að fækka fólki í leikhúsum og á tónleikum, fækka Bridge klúbbunum og fækka í Golfklúbbum Höfuðborgarinnar?

Frá 1994 hefur stefna Borgarinnar verið að “Auka ekki umferðarrýmd vestan Elliðaár”. Eina leiðin til að halda í þessa hugmyndafræði nú 30 árum síðar er að fækka þeim sem nota göturnar vestan Elliðaár og loka hluta borgarbúa af inni í íbúðum sínu og kalla það stofufangelsi “bíllausan lífstíl”.

Er ekki löngu tímabært að sturta þessari 30 ára gömlu hugmyndafræði niður um klósettið og ganga í að auka og bæta flæði umferðar vestan Elliðaár, í stað þess að dæma þúsundir borgarbúa í félagslega einangrun undir merkjum “bíllaus lífstíls”?